Դիւանագէտների համահայկական խորհրդի յայտարարութիւնը՝ ի աջակցութիւն «Տաւուշը յանուն Հայրենիքի» շարժմանը
Իշխող վարչախումբը, զգալով համազգային ցասումի ծաւալման թափն ու իր համար անկանխատեսելի հետեւանքները, որոշել է սահմաններն անցնել նաեւ բարոյական արժէքների տիրոյթում՝ գաւառական ու ցածրորակ դատողութիւններ տարածելով խորհրդարանի ամպիոնից եւ սոցիալական տարբեր հարթակներից՝ յանդգնելով վարուելակերպ սովորեցնել Հայաստանեայց Առաքելական Սուրբ Եկեղեցու բարձրաստիճան հոգեւորականներին՝ գլխաւոր թիրախ դարձնելով Տաւուշի մարզում հայրենակիցների ցաւն ու ապրումները կիսող թեմի առաջնորդ Բագրատ Արքեպիսկոպոս Գալստանեանին։
Տաւուշում ծաւալուող այսպէս կոչուած սահմանազատման եւ սահմանագծման, իսկ իրականում միակողմանի զիջումների հակաիրաւական ու հակաօրինական գործընթացն ամէն գնով տեղայնացնելու վարչախմբի մանիպուլիատիւ փորձերն ու ձգտումները տապալուել են, քանի որ հակառակ սպասուածին, հենց տաւուշեցիների ջանքերով ձեւաւորուած «Տաւուշը յանուն Հայրենիքի» ազգային շարժումը տարածուել է ողջ Հայաստանով։ Հասարակութեան լայն շերտերի մօտ այլեւս սկսել է արմատաւորուել, որ օրահասական խնդիրը միայն տաւուշեցիներին չի վերաբերում։ Սա է պատճառը, որ խորը վախերով պայմանաւորուած, վարչախումբը սարսափում է հասարակական լայն համախմբումից եւ ներքին համերաշխութեան տանող ցանկացած դրսեւորումից։ Հետեւաբար, գործի է դրել իրեն շատ յատուկ ստի, կեղծիքի, հանրահռչակ ու ազդեցիկ անհատներին պիտակաւորելու, վարկաբեկելու եւ սեւացնելու կեղտոտ գործիքակազմը՝ սեփական ժողովրդին անդադար վախեցնելով պատերազմով եւ այլընտրանքի ի սպառ բացակայութեան անհիմն թեզերով։
Դիւանագէտների համահայկական խորհուրդը վերստին հաստատում է իր անվերապահ աջակցութիւնը «Տաւուշը յանուն Հայրենիքի»՝ բացարձակապէս ազնիւ, ազգային ու հայրենապաշտպան մղումներով կեանքի կոչուած շարժմանը եւ խստօրէն դատապարտում իրենց հայրենական օճախի, հողի ու ջրի, արժանապատուութեան ու արդարութեան համար ոտքի ելած մեր հայրենակիցների նուիրեալ պայքարն արատաւորելու ցանկացած փորձ։
Այս պայքարը միայն Տաւուշի խնդիրը չէ, այս պայքարը ողջ հայութեան եւ Հայաստանի հարցն է, պայքար՝ ստի եւ կեղծիքի դէմ՝ յանուն ճշմարտութեան եւ արդարութեան։ Եւ այս պայքարն անպայման յաջողելու է։
1 Մայիսի, 2024 թ.
Երեւան
Comments are closed.