Գանատան շարունակում է պնդել արցախահայութեան ինքնորոշման իրաւունքի իրացման եւ գերիների ազատ արձակման անհրաժեշտութիւնը

Հայ դատի Գանատայի յանձնախումբը տեղեկացնում է, որ Օգոստոսի 10-ին Գանատայի արտաքին գործերի նախարար Անիտա Անանդը, հայ-ատրպէյճանական՝ Ուաշինկթընեան պայմանաւորուածութիւնների վերաբերեալ հանդէս է եկել յայտարարութեամբ, որտեղ, ի թիւս այլնի նկատել է․ «Դիւանագիտական բանակցութիւնների միջոցով ձեռք բերուած այսպիսի համաձայնութիւնները յստակ ուղի են բացում Հայաստանի եւ Ատրպէյճանի միջեւ համապարփակ խաղաղութեան համար, որը կ’օգնի լուծել մնացած խնդիրները, այդ թուում՝ բոլոր հայ ռազմագերիների եւ ձերբակալուածների ազատ արձակումը, հայ քաղաքացիական անձանց անվտանգ եւ արժանապատիւ վերադարձի իրաւունքի ապահովումը, ինչպէս նաեւ մշակութային ժառանգութեան պահպանումը։

Գանատան նկատի է առնում ԵԱՀԿ Մինսկի խմբի լուծարման որոշումը եւ պատրաստակամ է աջակցել ապագայ ցանկացած մեխանիզմի, որը կ’ապահովի ուժի չկիրառման սկզբունքը, տարածքային ամբողջականութեան յարգումը եւ ինքնորոշման իրաւունքը։

Գանատան վերահաստատում է իր յանձնառութիւնը՝ ապահովելու երկարաժամկէտ խաղաղութիւն, կայունութիւն եւ բարգաւաճում Հարաւային Կովկասում՝ ներառեալ Լեռնային Ղարաբաղի հարցի քաղաքական կարգաւորուած լուծման հասնելը»։

Հայ Դատի յանձնախումբը բարձր է գնահատում Գանատայի պաշտօնական դիրքորոշումը, յատկապէս այն պայմաններում, երբ վերջին օրերի զարգացումներից յետոյ, նկատւում է Ղարաբաղեան հակամարտութիւնը, աւելի քան 120․000 անձանց բռնի տեղահանումն ու արցախահայութեան անքակտելի իրաւունքները մոռացութեան մատնելու միջազգային միտում։

Հայ Դատի Գանատայի յանձնախումբը շարունակելու է աշխատանքները Գանատական կառավարութեան հետ, որպէսզի պաշտօնական Օթթաուան առաջիկայում եւս պահպանի իր շատ կարեւոր այս դիրքորոշումը։

ՀՅԴ Հայ Դատի Կեդրոնական գրասենեակ
11․08․2025 թ․