Գանատայի հայ համայնքում յստակ է դիրքորոշումը՝ Հայաստան-Սփիւռք-Արցախ եռամիասնութիւնը մեր միակ փրկութիւնն է. Սեւակ Պելեան
- (0)
Գանատայի Հայ Դատի գրասենեակի պատասխանատու Սեւակ Պելեանը ցաւով արձանագրում է, որ թէ՛ Պաքուում պահուող հայ գերիների, Արցախի ռազմաքաղաքական ղեկավարութեան վերադարձի հարցի բարձրաձայնման, Պաքուի դատարան դիտորդներ ուղարկելու ուղղութեամբ աշխատանք տանելու ուղղութեամբ, թէ՛ միւս հարցերի շուրջ Հայ Դատի յանձնախմբերը մենակ են մնացել, չունեն ՀՀ իշխանութիւնների աջակցութիւնը, եւ կատարում են այն աշխատանքը, որ պէտք է կատարէր ՀՀ ԱԳ նախարարութիւնը:
«Գանատայի ԱԳ նախարարը մի քանի յայտարարութիւն է արել այս ուղղութեամբ, նա վերջերս գրութեամբ պատասխանել էր մեր առաջարկներին՝ յստակ ձեւակերպում անելով, որ Գանատան կոչ է անում Պաքուի իշխանութիւններին՝ անպայմանօրէն ազատ արձակել հայ ռազմագերիներին՝ հիմնուած միջազգային օրէնքի վրայ, ապահովել արդար դատավարութիւն: Մենք պահանջել ենք նաեւ գործնական քայլեր», 168TV-ի «Ռեվիւ» հաղորդման ընթացքում ասաց նա:
Սեւակ Պելեանը նշեց, որ Գանատայի հայ համայնքը կուռ շարքերով ընդդիմանում է ՀՀ իշխանութիւններին. «Առաջիկայ շաբաթներին սփիւռքեան գաղթօճախներում տեղի են ունենալու Հայոց ցեղասպանութեան 110-ամեակին նուիրուած միջոցառումներ, ակցիաներ, որոնց ժամանակ Սփիւռքը յստակ պատգամ պէտք է ուղղի, որ՝ մենք այստեղ ենք, մենք պահանջատէր ենք եւ ականջ չենք դնում այս իշխանութեան ասածներին: Դժուար թէ որեւէ մէկը տրուի իշխանութեան այս խաղերին եւ թակարդներին, որ լարում են Սփիւռքում: Աւելին ասեմ, Սփիւռքում թէ՛ մեր կուսակցականները, թէ՛ համակիրները դիմակազերծել են այս իշխանութիւններին, եւ նրանց հաճոյանալու փորձերին, որ փորձում են անել Սփիւռքի մէջ, ոչ ոք լուրջ չի վերաբերւում: Սփիւռքը լաւ հասկանում է, որ եթէ մենք թոյլ տանք՝ ազգային գաղափարախօսութեան հիմքերն այսպէս թուլանան, Սփիւռքի գոյութիւնն ուղղակիօրէն վտանգի մէջ կը գտնուի: Այսօր Սփիւռքը զօրաւոր է, որոշիչ դեր ունի, որովհետեւ հիմնուած է ազգային գաղափարախօսութեան վրայ, որի ջատագովը միշտ եղել է ՀՅԴ-ն»:
Նա շեշտեց, որ Գանատայի հայ համայնքում յստակ է դիրքորոշումը՝ Հայաստան-Սփիւռք-Արցախ եռամիասնութիւնը մեր միակ փրկութիւնն է. «Արցախի ֆիզիքական կորստից տանջւում ենք, բայց հոգեպէս այդ եռամիասնութիւնը դեռ կայ, եւ ամէն ինչ պէտք է անենք, որ Արցախի գոյութիւնն այս ժամանակաշրջանում առնուազն մեր հոգեմտաւոր աշխարհի մէջ մնայ, այդ համոզմունքով զինուենք, որ կարողանանք մի օր վերադարձնել Արցախը»:
Թուրքիայի նախագահ Էրտողանը յայտարարել էր, որ Հայաստանը պէտք է ձերբազատուի արտերկրում երրորդ երկրների եւ իր սփիւռքի վնասակար ազդեցութիւնից: Սեւակ Պելեանի խօսքով՝ Էրտողանի այս յայտարարութիւնները Սփիւռքի յաջողութեան վկայութիւնն են.
«Քաղաքական յստակ ենթատեքստ կայ, պատգամ են փոխանցում ՀՀ իշխանութիւններին, որ՝ եթէ դուք իսկապէս ուզում էք լաւ ապրել, խաղաղ ապրել, պէտք է ձերբազատուէք ձեր Սփիւռքից եւ այնտեղ արմատաւորուած մօտեցումներից: Ես վստահաբար ասում եմ, որ այդ մէկը երբեք չի յաջողուելու ՀՀ իշխանութիւններին: Քանի դեռ ունենք կենսունակ, քաղաքականացուած Սփիւռք, ՀՅԴ նման ուժեր Սփիւռքում, որ առաջնորդում են, այդ ամէնը չի յաջողուի, եւ իսկապէս ուրախ ենք, որ Էրտողանը նման բաներ է ասում, որովհետեւ դա մեր յաջողութեան կարեւորագոյն փաստն է»:
Նա նկատեց, որ Հայաստանի իշխանութիւններն ուզում են ապրել ծնկած վիճակում.
«Մենք պատրաստ չենք զիջելու ամէն ինչ, ՀՅԴ-ն էլ է ուզում խաղաղութիւն, բայց արժանապատիւ խաղաղութիւն ենք պահանջում: Պէտք է լինի Արցախի ժողովրդի հաւաքական վերադարձ՝ հիմնուած ինքնորոշման իրաւունքի վրայ, արցախեան հիմնահարցի համապարփակ լուծում, Թուրքիայի իշխանութիւններին մղել, որ առերեսուեն իրենց պատմութեան հետ, Հայոց ցեղասպանութեան ճանաչում, հատուցում եւ Սփիւռքի քաղաքականացում: 135 տարի Դաշնակցութիւնն այդ ուղու վրայ է: Մեր վերջին ընդհանուր ժողովը վերահաստատեց այս ամէնը: Մենք ունենք իրաւունքներ, որոնք պէտք է պաշտպանենք: Նոյնիսկ արեւմտեան ուժեր կան, որ ասում են՝ այսօր Հայաստանի տարածքային ամբողջականութիւնը խախտուած է, ինչպէ՞ս կարելի է այս իրավիճակում խօսել տարածքային ամբողջականութեան մասին կամ Փաշինեանի ասած «իրական Հայաստանի» մասին: Հաւատացէք՝ արեւմտեան աշխարհում այնքան անլուրջ են վերաբերւում այս իշխանութիւններին, որ երեւի այս իշխանութիւններն էլ տեղեակ չեն»:
Նա նկատեց, որ Հայաստանի ներկայիս արտաքին քաղաքականութիւնը պալանսաւորած որակելով՝ Փաշինեանը ցոյց է տալիս իր քաղաքական մտքի սնանկութիւնը. «Արտաքին ճակատը Հայաստանի նման երկրների համար շատ զգայուն է, եւ նման խաղերի մէջ մտնելը Հայաստանի համար միայն ողբերգութեան պիտի առաջնորդի: Մենք պէտք է ունենանք յստակ հայեցակարգ եւ պէտք է վերականգնենք մեր յարաբերութիւնները բոլոր ուժերի հետ»:
