Արցախի մարդու իրաւունքների պաշտպանի հետ աշխատանքային քննարկում «Եւրոպացիները յանուն Արցախի» հարթակում

Նախորդ շաբաթ գումարուած «Եւրոպացիները յանուն Արցախի» հարթակի նիստում քննարկուել է Զուիցերիայի Դաշնային ժողովի վերին պալատի՝ Կանտոնների խորհրդի, «Խաղաղութեան ֆորում Լեռնային Ղարաբաղի համար․ հնարաւորութիւն տալ հայերի վերադարձին» որոշումը: Զուիցերիայի հայ համայնքի ներկայացուցիչ Սարգիս Շահինեանը մանրամասնել է որոշման գործընթացը։ Նկատի ունենալով, որ այս որոշումը պարտաւորեցնում է Զուիցերիայի կառավարութեանը մէկ տարուայ ընթացքում գումարել Ատրպէյճանի եւ արցախահայութեան ներկայացուցիչների միջեւ միջազգային ֆորում՝ միջազգային անվտանգութեան երաշխիքների ներքոյ խթանելու արցախահայութեան վերադարձի իրաւունքը՝ Շահինեանը ներկայացրեց հաւանական գործընթացի կարելիութիւնները։

Այնուհետեւ Արցախի Մարդու իրաւունքների պաշտպան Գեղամ Ստեփանեանը ներկայացրել է արցախահայերի վերջին օրերի նախաձեռնութիւնները, Արցախի ժողովրդի հաւաքական հայրենադարձութեան եւ հիմնարար այլ իրաւունքների պաշտպանութեան նպատակին կոչուած յանձնախմբի աշխատանքները։

Հարթակի անդամները որոշել են առաջիկայում իրենց համայնքներում նախաձեռնել միջոցառումներ։

Վերոնշեալ նիստում «Եւրոպացիները յանուն Արցախի» հարթակը որոշել է նաեւ բողոքի նամակ յղել Վատիկանի Գրիգորեան համալսարանի տնօրինութեանը՝ Ապրիլի 10-ին Սուրբ Աթոռում Ատրպէյճանի դեսպանութեան եւ ատրպէյճանական որոշ կազմակերպութիւնների նախաձեռնութեամբ կազմակերպած «Քրիստոնէութիւնը Ատրպէյճանում. պատմութիւն եւ արդի ժամանակներ» վերտառութեամբ միջոցառման նախաձեռման համար, որտեղ ջանք է թափուել ամբողջապէս ժխտել հայկական քրիստոնէական ներկայութիւնն Արցախում։

Որոշուել է իւրաքանչիւր համայնք նոյնաբովանդակ բողոք-նամակ յղի Վատիկան՝ պահանջելով արդարութեան եւ իրականութեանը համապատասխան յայտարարութիւն։

Տեղեկացնենք՝ Վատիկանի Գրիգորեան համալսարանի տնօրինութեանը բողոքի նամակ է յղել նաեւ ՀՅԴ Եւրոպայի Հայ դատի գրասենեակի նախագահ Գասպար Կարապետեանը։ Վերջինս դատապարտել է համալսարանի կողմից նման հակագիտական միջոցառման հիւրընկալումը, ներկայացրել է Ատրպէյճանում պետական քաղաքականութեան մակարդակի բարձրացուած պատմական ու մշակութային զեղծարարութիւնը: Հայ դատի գրասենեակի նախագահը համալսարանի տնօրինութիւնից պահանջել է անմիջապէս եւ հրապարակայնօրէն դատապարտել Ատրպէյճանի կառավարութեան քայլերը՝ ուղղուած պատմութիւնը վերաշարադրելուն, հայկական մշակութային եւ կրօնական ժառանգութիւնը ջնջելուն եւ պատմական խեղաթիւրումը որպէս էթնիկ եւ մշակութային ոչնչացման գործիք օգտագործելուն, ինչպէս նաեւ խզել բոլոր կապերն ու համագործակցութիւնները ատրպէյճանական կառոյցների հետ:

ՀՅԴ Բիւրոյի Հայ դատի կեդրոնական գրասենեակ
15 Ապրիլ 2025 թ․