«Ունենք երկու ճանապարհ՝ կա՛մ պատերազմում ենք, կա՛մ դուրս ենք գալիս, բայց իմացէք՝ Արցախի կորստից յետոյ է՛լ հայ չի մնալու, վերանալու ենք»․ Դաւիթ Պապայեան

«alikonline.ir» – Ալմա-Աթայի հռչակագրում բազմաթիւ հակասութիւններ կան։ եւրոպական խորհրդի նախագահ Շառլ Միշէլի երէկուան յայտարարութիւնը որեւէ իրաւական ու մարդասիրական հիմք չունի։ Ի դէմս այդ պաշտօնեայի՝ Եւրոպան ցոյց տուեց, որ թքած ունի ժողովրդավարական ու համամարդկային արժէքների վրայ։ Այդ յայտարարութիւնը մեզ համար, բնականաբար, անընդունելի է։ Այդ մասին «Փաստինֆոյին» ասաց Արցախի նախագահի յատուկ յանձնարարութիւնների գծով ներկայացուցիչ Դաւիթ Պապայեանը։

«Եւրոպան՝ ի դէմս Միշէլի, փաստօրէն, լեգիտմիացրեց 2020 թ․ Արցախի նկատմամբ Ատրպէյճանի ու Թուրքիայի իրականացրած ռազմական ագրեսիան, ինչպէս նաեւ Արցախի ներկայ պաշարումը։ Ոչ մի բանով Միշէլը չի տարբերւում Չեմբեռլինից․ Եւրոպան ցոյց տուեց, որ որեւէ առնչութիւն չունի ժողովրդավարական արժէքների հետ։ Թող է՛լ չխօսեն ժողովրդավարութեան, արժէքների մասին, քանի որ վերջապէս պարզ ասացին, որ աշխարհաքաղաքականութեամբ կաշկանդուած, կոռումպացուած մարդիկ են, ուրիշ ոչինչ։ Շնորահակալ ենք այդ «անկեղծութեան», Եւրոպայի իրական դէմքը ցոյց տալու համար», նշեց Պապայեանը։

Ստեղծուած վիճակում, ըստ Դաւիթ Պապայեանի, երկու ճանապարհ ունենք՝ կա՛մ պատերազմում ենք, կա՛մ Ատրպէյճանին ենթարկուելու որեւէ պայման չընդունելով՝ դուրս գալիս մեր հայրենիքից՝ Արցախից։

«Շատ վճռական փուլում ենք։ Երկու տարբերակ ունենք՝ կա՛մ կռւում ենք մեր հողում ապրելու համար ու յաղթում, կամ զոհւում, կամ էլ չընդունելով Ատրպէյճանի վերահսկողութիւնը՝ դուրս ենք գալիս։ Շատ լաւ գիտէք, որ Ատրպէյճանի վերահսկողութեան տակ անհնար է ապրելը, ուղղակի կը մորթուենք։ Եթէ չենք ուզում ոչխարի պէս մորթուել, ուրեմն պէտք է արժանապատուօրէն կռուենք կամ էլ թողնենք ու դուրս գանք՝ թոյլ չտալով, որ մեզ մորթեն։ Բայց, բոլորը պէտք է հասկանան, շատ լաւ պատկերացնեն, որ դուրս գալու դէպքում, այսինքն՝ Արցախը կորցնելու դէպքում, է՛լ հայ չենք մնալու, կորցնելու ենք ինքներս մեզ, մեր պետականութիւնը։ Ազգը պէտք է ինքնորոշուի, հասկանայ՝ ինչ է ուզում՝ ապրե՞լ, թէ՞ վերանալ։

Արցախի կորստից յետոյ բոլորը պէտք է ձայնները կտրեն։ Ցաւօք, չկայ 1988 թուականի ազգը… Կրկնում եմ՝ վճռական փուլում ենք, պէտք է որոշել՝ պատերազմո՞ւմ ենք, արժանապատուօրէն յաղթում կամ զոհուում, թէ՞ դուրս ենք գալիս ու կորցնում Արցախը», եզրափակեց Պապայեանը։