Ոչ զիջումով, ոչ վախով չի կարելի ապրել. պէտք է ապրել պայքարելով
«Մեր նպատակը Ատրպէյճանին դէմ յանդիման հակաատրպէյճանական ցոյց անելն է», «Փաստինֆոյի» հետ զրոյցում ասաց «Կամաւորական շարժում» ՀԿ նախագահ Հրանդ Մարգարեանը՝ անդրադառնալով Կոռնիձորում Մայիսի 20-ին հանրահաւաք անցկացնելու նախաձեռնութեանը։
Հրանդ Մարգարեանի խօսքերով՝ հաւաքը որոշել են սահմանում անցկացնել, քանի որ միջանցքը փակուած է, եւ մեր կապը խզուած Արցախի հետ։ «Հայ ժողովուրդը պէտք է ցոյց տայ իր դժգոհութիւնն ու անհամաձայնութիւնը այն ամէնին, որը պարտադրւում է մեզ։ Ի հարկէ մի ծաղկով գարուն չի գայ եւ մի ակցիայով բոլոր հարցերը չեն լուծուի, բայց դա մի նոր սկիզբ է, որը, կարծում եմ, կարեւոր է», ասաց գործիչը։
Նրա արձանագրմամբ՝ Ատրպէյճանը դարձրել է սովորութիւն, որ ամէն անգամ բանակցութիւնների նախօրեակին լարում է ստեղծում սահմանի վրայ՝ դա օգտագործելով որպէս ճնշման միջոց։ «Քանիերորդ անգամն է նոյն սցենարը կրկնւում է։ Ատրպէյճանը նաեւ մի պարզ բան է հաստատել. քանի մենք ընտրել ենք զիջման քաղաքականութիւնը, ուրեմն ինքն ուժով, կոնֆլիկտ հրահրելով կը կարողանայ իր հարցերը լուծել։ Մինչեւ մի տեղը չցաւացնենք, այս ընթացքը շարունակուելու է», նշում է Հրանդ Մարգարեանը՝ ընդգծելով, որ իշխանութեան ցանկացած զիջողական համաձայնութիւն չեն ընդունելու։
«Ոչ միայն չենք նահանջելու, այլեւ ասում ենք, որ ինչ էլ համաձայնէք, դա անարժէք է, որովհետեւ մենք մեր դատից չենք հրաժարուի,մենք չենք նահանջի, եւ Ատրպէյճանը լաւ օր չի տեսնի։ Ատրպէյճանը անընդհատ կը պարտաւորուի շատ մեծ գին վճարել։ Սա այն խաղաղութիւնը չէ. սա ոչ մեզ պէտք կը լինի, ոչ իրենց, որովհետեւ խաղաղութիւնը պէտք է արդարութեան հիմքի վրայ ստեղծուի,ոչ թէ պարտադրանքի։ Դա ենք ուզում ասել, որ հայ ժողովուրդը որեւէ նման համաձայնութեան, նման պայմանագրի, նման յայտարարութեան հետ հաշտ չի ապրի եւ կ’ընդվզի», ասել է գործիչը։
Անդրադառնալով Կոռնիձորի ակցիային՝ Հրանդ Մարգարեանը նշեց, որ իրականութիւնն օրհասական է, եւ նման պայմաններում հայ ժողովուրդը ոչնչից չի վախենում։
«Ես կարծում եմ որ կը գան, որովհետեւ մեր ժողովուրդը քաջ ժողովուրդ է, էդպէս բաներից չի վախենայ։ Մեր նպատակը խաղաղ ցոյց անելն է, մենք չենք գնում արշաւելու, չենք գնում յարձակուելու։ Մենք պէտք է կարողանանք հասկացնել, որ այդ տեսակ բաներից վախեցող չենք։ Սա ոչ միայն բանակի եւ զինուորների այլ հենց ժողովրդի մակարդակով պէտք է ցոյց տալ։ Մենք ամէնքս եթէ պէտք է՝ զինուոր ենք, եթէ պէտք է՝ մահապարտ, բայց մեր հայրենիքը չենք զիջի երբեք, չենք նահանջի, չենք վախենայ, չենք ընկրկի։ Կարծում եմ պահը դրան է հասել։ Վիճակն այնպիսին է, որ եթէ մենք այդ վճռականութիւնը ցոյց չտանք եւ այդ ձեւով չարտայայտուենք, շատ բան ենք կորցնելու։ Ոչ զիջումով, ոչ վախով չի կարելի ապրել. պէտք է ապրել պայքարելով», «Փաստինֆոյի» հետ զրոյցում նշեց Հրանդ Մարգարեանը։
Comments are closed.