ՀՅԴ Հայաստանի Գերագոյն Մարմինի Յայտարարութիւնը
ՀՅԴ Հայաստանի Գերագոյն մարմինը հետեւեալ հաղորդագրութիւնը հրապարակեց մարտ 1-ին նախորդող եւ յաջորդող դէպքերուն առնչութեամբ:
Սիրելի՛ հայրենակիցներ,
1 մարտ 2008-ից անցել է տասներկու տարի: Անառարկելի է, որ մարտի 1-ը մեր պատմութեան դառն ու ցաւոտ էջերից մէկն է` թէ՛ անդառնալի մարդկային, թէ՛ քաղաքական, բարոյական եւ պետական կորուստների առումով:
Կարող էինք շրջանցել, բացառել այդ էջը, եթէ դրսեւորուէր քաղաքական եւ պետական բաւարար շրջահայեացութիւն, եթէ նախընտրական պայքարը կառուցուէր գաղափարական արժէքների վրայ, եթէ ցանկալի յաղթանակին հասնելու ճանապարհին ատելութեան, թշնամանքի եւ անհանդուրժողականութեան մթնոլորտն այդքան կործանարար եւ աննահանջ չլինէր:
2008 թ. նախագահական ընտրութիւններում Դաշնակցութեան թեկնածուն Վահան Յովհաննիսեանն էր: Մենք գնում էինք ընտրութեան` համոզումով, որ կը յաջողենք երկիրն ու պետականութիւնը հետ պահել ատելութեան եւ առճակատման կործանարար հեռանկարից, կը կարողանանք պետականութեան ընթացքը հունաւորել դէպի կայուն ժողովրդավարութիւն, արժանապատիւ հասարակութիւն:
Մարտի 1-ին նախորդող` օրէցօր թէժացող եւ պայթունավտանգ մթնոլորտում Դաշնակցութիւնը հանդէս եկաւ գործողութիւններով եւ քաղաքական յայտարարութիւններով, որոնք սթափուելու, երկիրն արկածախնդրութեան եւ փորձութեան չտանելու ահազանգ էին ու գնահատականներ: Ցաւօք, մարտի 1-ից չխուսափեցինք:
Հրապարակելով 2008 թ. մարտի 1-ին նախորդող եւ յաջորդող ՀՅԴ յայտարարութիւնները (կը հրատարակենք հետագային «Ա.»), նպատակայարմար ենք գտնում հանրութեանը մէկ անգամ եւս ներկայացնել մեր գնահատականները, նաեւ ափսոսանքով արձանագրել, որ դրանք ցաւալիօրէն արդիական են եւ համահունչ նաեւ մեր օրերում:
Մէկ անգամ եւս կիսելով զոհերի ընտանիքների վիշտն ու ցաւակցելով նրանց, այսօր էլ հաստատում ենք եւ գտնում, որ մեր համազգային եւ պետական շահը պարտադրում է մարտի 1-ից դուրս գալ դասեր քաղած, արժանապատուօրէն, հրաժարուել հասարակութիւնը վրէժխնդրութեան եւ ներքին թշնամիների որոնման ցանցում ջլատելու վարքագծից:
Միայն համախոհութեամբ եւ մեր ներուժի ողջ կարողականութեամբ է հնարաւոր լծուել մեր պետականութեան ամրապնդմանն ու բազմաթիւ մարտահրաւէրների դիմագրաւմանը:
ՀՅԴ ՀԱՅԱՍՏԱՆԻ ԳԵՐԱԳՈՅՆ ՄԱՐՄԻՆ