Հաղորդագրութիւն Հ.Յ.Դ. Պատանեկան Միութիւններու տարածաշրջանային խորհրադաժողովին Մոնթրէալ( 1-3 Նոյեմբեր 2024) 06 Նոյեմբեր 2024

1-3 Նոյեմբեր 2024-ին, Մոնթրէալի մէջ, նախաձեռնութեամբ Հ.Յ.Դ. Բ.-ի Երիտասարդական Գրասենեակին եւ կազմակերպութեամբ Հ.Յ.Դ. Գանատայի Պատանեկան Միութեան Ընդհանուր Վարիչ Մարմնին գումարուեցաւ Հ.Յ.Դ. Պատանեկան Միութիւններու պատանիներու յատուկ խորհրադաժողովը, որուն կը մասնակցէին ԱՄՆ-ի, Աւստրալիոյ եւ Գանատայի պատանեկան միութիւններէ 50 պատանիներ ու վարիչներ:

Եռօրեայ խորհրդաժողովին պատանիները դասախօսութիւններ լսեցին պատանիի դաստիարակութեան, տիպարին ու առաքելութեան նաեւ Արցախի ու Հայ Դատի մասին:

Մարդուժի պատրաստութեան շրջագծէն ներս կազմակերպուած այս գործունէութիւնը հիմնականօրէն կը նպատակադրէր պատանիներու ներկազմակերպական տեղեկութիւններու, գիտելիքներու ու հմտութիւններու տարածքը ընդարձակել ընդգրկելով՝

ա.տարածաշրջանի Հ.Յ.Դ. պատանեկան միութիւններուն վերաբերող կազմակերպական քննարկումներ ու սերտողութիւններ,

բ.ծանօթանալ տարածաշրջանի պատանիներու մտահոգութիւններուն, ազգային ու միութենական հարցերու մօտեցումներուն, մտահորիզոնին եւ հեռանկարներուն,

գ.նպաստել պատանիներու կազմակերպական փորձառութեան ձեռքբերման եւ տարածաշրջանի պատանեկան միութիւններու ու պատանիներու միջեւ ընկերական յարաբերութիւններու սերտացման:

Խորհրդաժողովը նաեւ կը միտէր խորացնել Հ.Յ.Դ. պատանեկան միութիւնները մէկ ընտանիքի պատկանելու միտքը եւ մեր գաղափարական դաստիարակութիւնը ներթափանցելի դարձնել պատանիներու կրթութեան մէջ, միաժամանակ պատրաստելով ապագայ մարդուժի տուեալներու անձնադարան:

Խորհրդաժողովի օրակարգը ընդգրկեց նաեւ զրոյցներ եւ շրջապտոյտներ:

Հ.Յ.Դ. Բ.Ի ԵՐԻՏԱՍԱՐԴԱԿԱՆ ԳՐԱՍԵՆԵԱԿ