Լեհաստանի մէջ Հայոց ցեղասպանութեան նուիրուած Լռութեան Երթ
2017 թուականի Ապրիլ 24-ին, Լեհաստանի տարբեր քաղաքներուն մէջ գործող հայկական կազմակերպութիւնները՝ Հայ-լեհական հասարակական կոմիտէն, Հայկական հիմնադրամը, Լեհ-հայկական հիմնադրամը, Հայկական գոնկրէսը, Լոձ քաղաքի հայկական ասոցիացիան, Էլպլոնկ քաղաքի հայկական ասոցիացիան, «Մուսա լեռ» հայկական մշակութային կեդրոնը, Պլոցկ քաղաքի հայկական համայնքը, Շլոնսկ քաղաքի հայկական ասոցիացիան Վարշավայի մէջ կազմակերպեցին ամէնամեայ Լռութեան Երթ՝ նուիրուած Հայոց ցեղասպանութեան 102-րդ ամեակին։
Երթին բազմաթիւ մասնակիցներ հայկական դրօշներով, ցեղասպանոութեան ենթարկուածներուն տանջանքները ներկայացնող ցուցանակներով, մոմերով եւ ծաղիկներով իրենց քայլերը ուղեցին դէպի թրքական դեսպանատուն։ Լռութեան Երթին բացման խօսքով հանդէս եկաւ Հայ-լեհական հասարակական կոմիտէի նախագահ Հրաչեայ Պոյաճեան: Ելոյթ ունեցան նաեւ Հայկական հիմնադրամի ներկայացուցիչ Մացիէյ Պոհոսեւիչը, Պլոցկ քաղաքի հայկական համայնքի ներկայացուցիչ Հրաչ Ղատիմեանը եւ այլք։ Մասնակիցներն ու ելոյթ ունեցողները կը դատապարտէին ցեղասպանութեան ոճրագործներն ու կը պահանջէին ցեղասպանութեան ճանաչումը։ Լեհական Առաջին ալիքը, Փոլոնիան եւ Կիէլցէ քաղաքի հեռուստաընկերութիւնները անդրադաձան եւ մեկնաբանեցին Վարշավայի մէջ կայացած Լռութեան Երթը:
Նշենք, որ 2005 թուականին Լեհաստանը ճանչցաւ եւ դատապարտեց Հայոց ցեղասպանութիւնը։ Նշենք նաեւ, որ Լեհաստանի մէջ կ’ապրին մօտ 40 հազարէն աւելի հայեր:
