Գարեգին Բ. կաթողիկոս Արցախցի Պաշտօնատարներու Հետ Քննարկեց Արցախցիներու Եւ ռազմագերիներու Հարցերը

  • Հոկտեմբեր 09, 2025
  • (0)

8 Հոկտեմբերին Գարեգին Բ. Ամենայն Հայոց կաթողիկոսը Մայր Աթոռ Ս. Էջմիածինի մէջ ընդունեց արցախցի պետական պաշտօնատարներ ու քաղաքական ուժերու ներկայացուցիչները` գլխաւորութեամբ Արցախի նախագահի պաշտօնակատար Աշոտ Դանիէլեանի եւ Արցախի թեմի առաջնորդ Վրթանէս եպս. Աբրահամեանի, յայտնեց Ս. Էջմիածինի տեղեկատուական գրասենեակը:

Հանդիպումին ընթացքին, կաթողիկոսը եւ այցելուները քննարկեցին հայրենազրկուած արցախցիներուն դիմացը ծառացած մարտահրաւէրները յաղթահարելուն եւ արցախահայութեան իրաւունքներու պաշտպանութեան վերաբերող հարցեր:

Անդրադարձ կատարուեցաւ նաեւ Ս. Էջմիածինի կողմէ իրականացուող ընկերային աջակցութեան ծրագիրներուն եւ արցախցիներուն հետ բնակութեան վայրերուն մէջ տարուող հոգեխնամ աշխատանքներուն:

Կաթողիկոսը ընդգծեց, որ հայ եկեղեցին այս ուղղութեամբ ջանքերը պիտի շարունակէ։

Զրուցակիցները կարեւոր նկատեցին միջազգային հարթակներու վրայ միացեալ հետեւողական քայլեր ձեռնարկելը` Արցախի ժողովուրդի իրաւունքները բարձրաձայնելու, Ատրպէյճանի մէջ պահուող պատանդները եւ ռազմական գերիները ազատ արձակել տալու, անհետ կորսուածները յայտնաբերելու եւ Արցախի հոգեւոր-մշակութային ժառանգութիւնը պահպանելու համար:

Աւարտին, արցախցի պաշտօնատարները իրենց որդիական երախտագիտութիւնը եւ առաքելական մայր եկեղեցւոյ հաւատարմութիւնը յայտնեցին:

Related Articles