Արցախ, անվտանգութիւն եւ արտաքին քաղաքականութիւն. ՀՅԴ Նախընտրական Ծրագիր

Մենք ձգտում ենք կերտել Ազատ, Անկախ ու ՄիացեալՀայաստան: Մեր անկախ պետականութեան վերակերտումը սկսուեց արցախեան գոյամարտով, նրա գոյութիւնը պայմանաւորուած է արցախեան ճակատում մեր յաղթանակով: Յստակ պէտք է գիտակցել, որ չկայ առանձին Արցախի հարց: Արցախը հայկական հարցի, Հայ Դատի անբաժան մաս է: Այս հարցում մեր դիրքորոշումն անփոփոխ է՝ Արցախը պէտք է վերամիաւորուի Մայր Հայաստանի հետ: Արցախի անկախութիւնը մեզ համար մարտավարական նշանակութիւն ունեցող ժամանակաւոր լուծում է:

Մենք ինքներս պէտք է ապահովենք մեր երկրի անվտանգութիւնը՝ քաջ գիտակցելով, որ միայն պատերազմին պատրաստ լինելն է կանխում պատերազմի վտանգը: Այս հարցում միակողմանի զիջումների մասին յայտարարութիւնները միայն մօտեցնում եւ աւելի իրական են դարձնում պատերազմի սպառնալիքը:

Հայրենիքի պաշտպանութիւնը մեր բոլորիս սրբազան պարտականութիւնն է՝ անկախ մեր քաղաքական հայեացքներից, սոցիալական կարգավիճակից, եկամտի մեծութիւնից: Բանակը պէտք է գտնուի բոլորիս հոգածութեան կենտրոնում:

Հայաստանը պէտք է վարի անկախ արտաքին քաղաքականութիւն՝ հիմնուած բացառապէս ազգային շահի եւ պետութեան հեռանկարային ռազմավարական զարգացման տեսլականի վրայ: Մենք հայամէտ եւ հայաստանակենտրոն ենք: Արտաքին քաղաքականութեան վեկտորն ընտրելիս պէտք է առաջնորդուենք բացառապէս մեր ազգային շահով: Մեր կազմած դաշինքները պէտք է լինեն ոչ թէ ընդդէմ որեւէ կողմի, այլ բացառապէս յանուն մեր նպատակաների իրականացման:

Մենք առաջարկում ենք.

Ամրապնդել Հայաստանի Հանրապետութեան եւ Արցախի Հանրապետութեան ռազմաքաղաքական համագործակցութիւնը, տնտեսական, ֆինանսական, սոցիալական, մշակութային, կրթական համարկումը: Հայաստանն Արցախի անվտանգութեան, ինքնիշխանութեան եւ տարածքային ամբողջականութեան երաշխաւորն է: Անհրաժեշտ է Հայաստանի եւ Արցախի Հանրապետութիւնների միջեւ կնքել ռազմաքաղաքական համագործակցութեան պայմանագիր:

– Շարունակել աշխատանքները Արցախի Հանրապետութեան միջազգային ճանաչման ուղղութեամբ:

– Ջանքեր գործադրել Արցախն իր ապագային վերաբերուող բանակցութիւններում որպէս լիիրաւ կողմ ներգրաւելու համար:

– Ազգ-բանակ հայեցակարգի տրամաբանութեամբ զարկ տալ հայրենական գիտական եւ տեխնոլոգիական մտքի վրայ հիմնուած ռազմարդիւնաբերական համալիրի ստեղծմանը: Հակառակորդն ունի նաֆթային տոլարներ, մենք ունենք տաղանդաւոր գիտնականներ, գիւտարարներ, ինժեներներ:

– Խրախուսել պրոֆեսիոնալ-կամաւոր զինուորական ծառայութեան շրջանակի ընդլայնումը: Պարտադիր զինուորական ծառայութեան զօրակոչուած երիտասարդ զինուորի կողքին մինշտ պէտք է կանգնած լինի պրոֆեսիոնալ զինուորականը:

– Սպաների ու պայմանագրային զինծառայողների աշխատավարձերը համապատասխանեցնել արժանավայել ապրուստի պահանջներին: Սպան ու զինուորը, ովքեր ամէն օր իրենց կեանքը վտանգի են ենթարկում, չպէտք է նիւթական նեղութիւն զգան:

– ՀՀ արտաքին քաղաքականութեան օրակարգի անքակտելի մաս դարձնել Հայոց ցեղասպանութեան ճանաչման եւ փոխհատուցման հարցերը, բացառել Հայոց Ցեղասպանութեան միջազգային ճանաչման գործընթացը թուլացնող որեւէ գործողութիւն: Ձեւաւորել անհրաժեշտ դիմակայութիւն ընդդէմ թուրք-ատրպէյճանական տանդէմի հակահայկական ծրագրերի:

– Վրաստանի հետ յարաբերութիւնները կառուցել բարեկամութեան ու ազգային շահերի փոխադարձ յարգանքի սկզբունքների վրայ: Բարիդրացիական յարաբերութիւններն իրենց դրական ազդեցութիւնը կ“ունենան ջաւախահայութեան եւ ընդհանրապէս վիրահայութեան իրաւունքների լիարժէք իրականացման վրայ:

– ՀՀ արտաքին քաղաքականութեան մէջ առաջնորդող սկզբունք համարել այն, որ Հայոց պետականութիւնը ոչ միայն Հայաստանի քաղաքացիների, այլեւ համայն հայութեան ազգային նպատակների իրականացման երաշխաւորն է: Ըստ այդմ՝ ամէն ինչ անել սփիւռքահայութեանը հայոց պետականութեան գործընթացում լիարժէք ներգրաւելու համար: Գործադրել Հանրապետութեան եւ հայութեան տարբեր հատուածների առջեւ ծառացած մարտահրաւէրների յաղթահարման, համազգային ներուժի բացայայտման եւ օգտագործման ամբողջական ռազմավարութիւն:

ՀՅԴ Նախընտրական Ծրագիր

Հատուած

Leave a Comment

You must be logged in to post a comment.