Արցախի Հանրապետութեան Ազգային Ժողովի Խմբակցութիւններու Յայտարարութիւն

Սոյն թուականի փետրուարի 27-ին Հայաստանի հանրային հեռուստաընկերութեան եթերում Հայաստանի Հանրապետութեան փոխվարչապետ Տիգրան Խաչատրեանն անդրադարձել է ցեղասպանութեան եւ նրա սպառնալիքի տակ Արցախից բռնի տեղահանուած մեր հայրենակիցների համար Հայաստանի Հանրապետութեան կառավարութեան կողմից առաջարկուող աջակցութեան ծրագրերին:

Մեր գնահատմամբ` փոխվարչապետի միջոցով արցախեան հանրութեանը մատուցուող Հայաստանի Հանրապետութեան կառավարութեան կողմից նախատեսուող ծրագրերը համարժէք չեն տիրող իրավիճակին:

Հարկ ենք համարում շեշտել, որ մինչ այժմ իրականացուած որեւէ ծրագիր չի քննարկուել Արցախի Հանրապետութեան ժողովրդի կողմից օրինական լիազօրութիւն ունեցող որեւէ կառոյցի, այդ թւում ժողովրդի ուղղակի քուէով ընտրուած Ազգային ժողովի հետ: Իսկ զանազան միջոցներով մեր կողմից ներկայացուած առաջարկներն անտեսուել են:

Յատկապէս անընդունելի է Արցախից տեղահանուած ժողովրդի համար բնակարաններ ձեռք բերելու կապակցութեամբ դեռեւս քննարկուող ծրագիրը, որը, հարցի քաղաքական եւ ընկերային համակողմանի քննարկման արդիւնքում, ակնյայտօրէն, չի բաւարարելու բռնի տեղահանուած մեր հայրենակիցների նուազագոյն սպասելիքներն ու ակնկալիքները: Նման որոշումների կայացումը յանգեցնելու է մեր հայրենակիցների հիասթափութեանն ու դժգոհութեանը, որի արդիւնքում կը խթանուի արտագաղթը եւ բողոքների ալիքը, կը խաթարուի մեզ համար օրախնդիր` հաւաքական վերադարձի ակնկալիքը:

Կոչ ենք անում զերծ մնալ չկշռադատուած ոչ համարժէք քայլերից: Միաժամանակ, վերահաստատում ենք փոխադարձ հետաքրքրութիւն ներկայացնող խնդրայարոյց հարցերի շուրջ կառուցողական քննարկումներ իրականացնելու մեր պատրաստակամութիւնը` ողջախոհ, արժանապատուութիւնը չնսեմացնող որոշումների յանգելու համար:

«ԱԶԱՏ ՀԱՅՐԵՆԻՔ-ՔՄԴ» ԽՄԲԱԿՑՈՒԹԻՒՆ
«ՄԻԱՍՆԱԿԱՆ ՀԱՅՐԵՆԻՔ» ԽՄԲԱԿՑՈՒԹԻՒՆ
«ԱՐԴԱՐՈՒԹԻՒՆ» ԽՄԲԱԿՑՈՒԹԻՒՆ
«ՀՅ ԴԱՇՆԱԿՑՈՒԹԻՒՆ» ԽՄԲԱԿՑՈՒԹԻՒՆ
«ԱՐՑԱԽԻ ԺՈՂՈՎՐԴԱՎԱՐԱԿԱՆ ԿՈՒՍԱԿՑՈՒԹԻՒՆ» ԽՄԲԱԿՑՈՒԹԻՒՆ

Երեւան
28 փետրուար 2024