Արծուիկ Մինասեան. «Մեր Ռազմավարութիւնը Պէտք Է Ըլլայ Աշխատանքը Ժողովուրդի Եւ Ազգային Հաստատութիւններուն Հետ»

Մեր ո՛չ քաղաքական նպատակադրումներուն մէջ փոփոխութիւն կատարուած է, ո՛չ ալ տրուած գնահատականներուն մէջ: Ո՛չ «Վերածնուող Հայաստան»-ը իր տուած գնահատականները փոխած է այս իշխանութիւններուն նկատմամբ, ո՛չ Հայ յեղափոխական դաշնակցութիւնը, ո՛չ ալ առհասարակ «Հայաստան» խմբակցութիւնը»: Այս մասին Ազգային ժողովին մէջ լրագրողներու հետ զրոյցի ընթացքին ըսաւ ՀՅԴ Հայաստանի Գերագոյն մարմինի անդամ, Հայաստանի Հանրապետութեան Ազգային ժողովի «Հայաստան» խմբակցութեան քարտուղար Արծուիկ Մինասեան:

«Մարտավարական խնդիրը չի կրնար նկատուիլ գաղափարական ընդհանուր նպատակներէն շեղում: Մեր պայքարի շարունակութիւնը, ռազմավարութիւնը պէտք է ըլլայ աշխատանքը ժողովուրդին հետ, պէտք է ըլլայ աշխատանքը ազգային հաստատութիւններուն հետ: Այն հաստատութիւններուն, որոնք մեր ազգի ողնաշարն են, պետականութեան ողնաշարն են, եւ իրենց առաւել աշխուժ ներգրաւումը Հայաստանին սպառնացող այս մարտահրաւէրներու դիմագրաւման գործին մէջ: Եթէ դուք նկատէք, որ օրինակ Հայ առաքելական եկեղեցին կամ մեր կրթական հաստատութիւնները, Գիտութիւններու ազգային ակադեմիան եւ բազմաթիւ համահայկական կառոյցներ ու կազմակերպութիւններ այստեղ ընելիք ունին, կը նշանակէ պէտք է ըլլան ձեւակերպումներ, նշանակումներ, որոնք պէտք է առաւելագոյնը ներգրաւուածութիւն ու մասնակցութիւն ունենան», ըսաւ ան:

Պատասխանելով այն հարցումին, որ արդեօք «Հայաստան» դաշինքը կը քանդուի, եւ այդտեղ կը մնայ միայն Դաշնակցութիւնը, պատգամաւորը ըսաւ.

«Պարոն Վարդեւանեանը կը տեսնէ, որ այդտեղէն կրնայ աւելի շատ օգտակար դեր խաղալ: Միշտ ալ կարելի է գտնել պատճառներ, ես չեմ ուզեր արհեստական պատճառներ բերել, այո՛, մենք տակաւին չենք յաջողած իրագործել այն հիմնական նպատակադրումները, զորս դրած էինք մեր առջեւ, բայց արդեօք միջանկեալ, կամ որոշակի արդիւնքներ մենք չունինք: Սա կը խնդրեմ չանտեսել, մենք ունեցած ենք արդիւնքներ, ունեցած ենք, որ այս իշխանութիւնը չէ կրցած իրականացնել թուրք-ազրպէյճանական ծրագիրները, աւելի՛ն` ազրպէյճանցիները եւ թուրքերը իրենք հրապարակային կերպով կը գնահատեն, թէ Հայաստանի ընդդիմութիւնը թոյլ չի տար Հայաստանի իշխանութիւններուն, որպէսզի անոնք աւելի յանձնուող ըլլան: Երբ Հայաստանը չըլլար, պիտի հարցնէիք չէ, որ Հայաստանը չկայ, բայց հայը տակաւին կայ: Այն համաձայնագիրները, զորս կը նախատեսուէր  ստորագրել, եւ իրականացնել այդ յանձնումները, չկրցան իրականացնել», ըսաւ ան:

Անոր համաձայն, իշխանութեան կողմէ միշտ ալ ճնշումներ եղած են պատգամաւորական լիազօրութիւններէն հրաժարելու հարցին մէջ, բայց սա բացառութիւն է:

«Իշխանութիւնը ամէն օր ճնշում կը գործադրէ, թէ՛ իր ապօրինի գործողութիւններով, թէ՛ իրեն սպասարկող լրատուամիջոցներով կեղծ լուրեր տարածելով: Ու ես կը զարմանամ, թէ՛ ձեր եւ թէ՛ հանրութեան այն հատուածին վրայ, որոնք այս կեղծ լուրերը չբացայայտելով, ընդդիմութեան հարցադրումներ կ՛ուղղեն, թէ արդեօք կա՞յ խնդիր մը, ատոր համա՞ր կը հրաժարին եւ այլն», նշեց ան:

Պատասխանելով այն հարցումին, թէ արդեօք պատգամաւորները, որոնք իրենց պաշտօններէն հրաժարեցան, կը շտապէին, որ իշխանափոխութի՞ւն պիտի ըլլայ, Մինասեան նշեց.

«Որեւէ պայքար իր մէջ կը պարունակէ որոշակի ակնկալիքներ` ժամանակի առումով, ստեղծուող արդիւնքի տեսանելութեան առումով եւ այլն: Հիմա պայքարը տակաւին կ՛ընթանայ, պայքարը կը շարունակուի: Մարտավարական տեսակէտէն մեր գործընկերները կրնայ ըլլալ կը նկատեն, որ այստեղ` խորհրդարանին մէջ պայքարը անիմաստ է, խորհրդարանէն դուրս պէտք է պայքարին: Մենք կը նկատենք, թէ՛ փողոցին մէջ, թէ՛ խորհրդարանին մէջ պէտք է բոլոր հարթակներուն մէջ տանիլ պայքարը: Ի հարկէ բոլորս ալ կ՛ուզէինք, որ շուտ տեղի ունենար իշխանափոխութիւնը, ձեւաւորուէր ազգային համաձայնութեան կառավարութիւն, որ կարենար այդ կառավարութիւնը մեր երկիրը այս իրավիճակէն շուտ դուրս բերել, բայց հիմա իրավիճակը այսպիսին է»:

Leave a Comment

You must be logged in to post a comment.