«Ադրբեջանը փորձում է օգտուել Ուկրաինայի շուրջ իրավիճակից»․ իրադրութիւնն Արցախում
Ռուս-ուկրաինական զարգացումների ֆոնին իրադրութիւնն Արցախում լարուել է։ Վերջին օրերին Ադրբեջանի զինուժը պարբերաբար խախտում է հրադադարի ռեժիմը տարբեր ուղղութիւններով՝ հնչեցնելով նաև «տարածքը լքելու, ուժ կիրառելու» սպառնալիքներ։
Մարտի 11-ին Արցախի ներքին գործերի նախարարութեան ոստիկանութիւնը հաղորդեց, որ Ադրբեջանը Խնապատ գիւղի ուղղութեամբ ականանետ է կիրառել, իսկ Թաղավարդում բարձրախօսով հնչեցրել գիւղը լքելու կոչեր։
Այս ամէնի հետ մէկտեղ ադրբեջանական կողմը մեդիայ հարթակներում տարածում է տեղեկութիւններ, թե ՌԴ խաղաղապահ զօրակազմի մի մասը դուրս է բերւում Արցախից՝ Ուկրաինա ուղարկուելու համար։
Իրադրութիւնն Արցախում
Վերջին օրերին Ադրբեջանի զինուած ուժերը մեծ տրամաչափի հրաձգային զինատեսակներից, այդ թւում՝ ականանետերի կիրառմամբ ակտիւ կրակ են վարում Մարտունու շրջանի Խնուշինակ և Կարմիր Շուկայ, Ասկերանի շրջանի Խրամորթ և Նախիջևանիկ գիւղերի ուղղութեամբ՝ թիրախաւորելով նաև խաղաղ բնակչութեանը։
Մարտի 10-ին իրենց տան բակում գիւղատնտեսական աշխատանքներ կատարելու ժամանակ ականանետի կրակոցից վիրաւորում էր ստացել խրամորթցի մի տղամարդ։
Մարտի 11-ին ադրբեջանական կողմը թիրախաւորել է Արցախի ևս երկու գիւղ՝ Խնապատն ու Թաղավարդը։ Խնապատի ուղղութեամբ կիրառուել է ականանետ, իսկ Թաղավարդում ադրբեջանցի ծառայողները բարձրախօսով հնչեցրել են գիւղը լքելու կոչեր։
«Մարտի 11-ին, ժամը 10:20-ի սահմաններում ադրբեջանական կողմը, նախնական տուեալներով, ականանետի 120 մմ-ոց 2 արկ է արձակել Ասկերանի շրջանի Խնապատ գիւղի դպրոցամերձ տարածքի ուղղութեամբ: Տուժածներ չկան»,– նշուած է Արցախի ՆԳՆ ոստիկանութեան տարածած հաղորդագրութեան մէջ:
Արցախի ԱԳՆ-ն դատապարտել է Ադրբեջանի գործողութիւնները՝ շեշտելով, որ դրանք «սպառնալիք են տարածաշրջանային խաղաղութեան ու կայունութեան համար, հարուած՝ ռուս խաղաղապահ առաքելութեանը, մարտահրաւէր՝ ողջ քաղաքակիրթ աշխարհին»։
«Պաշտօնական Բաքուի քաղաքականութիւնն ինչպէս միշտ խիստ ապակառուցողական է, կոպտօրէն խախտում է միջազգային իրաւունքի հիմնադրոյթները, մարդասիրութեան հիմունքները, իր էութեամբ հայատյացութեան, նացիզմի և ահաբեկչութեան համակցում է»,- ասուած է ԱԳՆ տարածած հաղորդագրութիւնում։
«Խաղաղապահներն Արցախից չեն հեռանում»․ ԱԽ-ն հերքում է
Արցախի Անվտանգութեան խորհրդի գրասենեակը շեշտել է՝ հակառակորդը դրսևորում է «ագրեսիւ պահուածք», «զինուած սադրանքներին» աւելացել է նաև ականանետերի կիրառումը։
Խորհուրդը վստահեցրել է՝ Արցախի իշխանութիւններն ու ռուս խաղաղապահները լիարժէքօրէն վերահսկում են իրավիճակը, ինչպէս նաև հերքել տարբեր հարթակներում տարածուող լուրերը, թէ խաղաղապահների մի մասը լքում է Արցախն ու մեկնում Ուկրաինա․
«Ադրբեջանական տեղեկատուական հարթակներում տարածուող տեղեկութիւնները, որոնց համաձայն՝ Արցախից ՌԴ խաղաղապահ զօրակազմն իր ուժերի մի մասը դուրս է բերում Ուկրաինա տեղափոխելու նպատակով, չի համապատասխանում իրականութեանը: Արցախում տեղակայուած ՌԴ խաղաղապահ զօրակազմը շարունակում է իրականացնել իր առաքելութիւնը՝ համաձայն 2020 թ. նոյեմբերի 9-ի եռակողմ յայտարարութեան դրոյթների»։
«Ադրբեջանը փորձում է օգտուել Ուկրաինայի շուրջ իրավիճակից»․ Արցախի նախագահ:
Անվտանգութեան խորհրդի ընդլայնուած նիստի ժամանակ Արցախի նախագահն անդրադարձել է ստեղծուած անվտանգային ու հումանիտար խնդիրներին՝ ընդգծելով, որ արդէն երեք օր է ադրբեջանական կողմը խոչընդոտում է գազատարի նորոգմանը՝ առանց հիմնաւորման: Վստահ է՝ ինչպէս գազատարի վնասումը, այնպէս էլ Արցախի խաղաղ բնակչութեան հանդէպ ցուցաբերած «ագրեսիւ վարքագիծը ունեն աշխարհաքաղաքական ենթատեքստ»:
«Վերջնանպատակը բնակավայրերը հայաթափելն է»․ ՀՀ ՄԻՊ
Հայաստանի մարդու իրաւունքների պաշտպան Քրիստինէ Գրիգորեանը ադրբեջանական զինուժի գործողությունները բնորոշել է որպէս խաղաղ բնակչութեան նկատմամբ յանցաւոր ոտնձգութիւն։
Ասում է՝ սա Ադրբեջանի «յանցաւոր քաղաքականութիւնն» է՝ միտուած իրենց բնօրրանում ապրող մարդկանց կեանքն ու անվտանգութիւնը ոտնձգելուն, նրանց ահաբեկելուն և մշտական տագնապի մէջ պահելուն․
«Ակնյայտ է նաև, որ նման գործողութիւնների վերջնանպատակը բնակավայրերը հայաթափելն ու դատարկելն է իր բնիկ ժողովրդից, ինչն Ադրբեջանի կողմից շարունակուող հայատյացութեան ու էթնիկ ատելութեան քաղաքականութեան դրսևորում է»,- ընդգծել է պաշտպանը։
Քրիստինէ Գրիգորեանի խօսքով՝ Ադրբեջանի «անպատասխանատու վարքագիծը» վնասում է խաղաղապահ առաքելութեան հեղինակութիւնն ու նսեմացնում խաղաղ կեանքի ապահովման ուղղութեամբ գործադրուող ջանքերը։