«Արցախը Պէտք Է Դառնայ Համախմբման Եւ Դիմադրութեան Օճախ». Իշխան Սաղաթէլեան

Յունուար 15-ին, ՀՅԴ Հայաստանի Գերագոյն մարմինի ներկայացուցիչ Իշխան Սաղաթէլեան հետեւեալ յայտարարութիւնը կատարեց Արցախի ներքաղաքական վիճակին մասին.

Վերջին օրերին Արցախի հերոսական ժողովուրդը մէկ անգամ եւս փաստեց, որ չնայած բոլոր դժուարութիւններին եւ զրկանքներին, պատրաստ է պայքարել իր ապրելու իրաւունքի, հայկական Արցախի` իր հայրենիքի համար:

Արցախի քաղաքական վերնախաւը պէտք չէ կատարի քայլեր, որը կը կոտրի ժողովրդի ոգին, կը ստեղծի նոր ճգնաժամ եւ ժողովրդին կը տանի յուսալքութեան:

Արցախի պետական հաստատութիւնների պահպանումը կենսական անհրաժեշտութիւն է, եւ առանց յստակ հաշուարկների եւ երաշխիքների չմտածուած քայլերը կը բերեն նոր ճգնաժամ` իր բոլոր հետեւանքներով, իսկ մենք սխալուելու միջոցներ այլեւս չունենք:

Արցախում անհրաժեշտ է քաղաքական-հասարակական բացառիկ համախմբում:

Համախմբում ոչ թէ ինչ որ անձի կամ ուժի շուրջ, այլ Արցախը հայկական պահելու, թշնամու հայադաւ ծրագրերի դէմ միասնական պայքարելու գաղափարի շուրջ:

Այսօր ստեղծուած իրավիճակից դուրս գալու առաջին կարեւոր քայլը դա է:

Թէ ով որքան է հաւատարիմ այդ գաղափարին, պէտք է դատել յստակ գործերից, որոշ հարցերի պատասխան կը տայ նաեւ ժամանակը:

Արցախը քաղաքական հաշուարկների, անձնական յաւակնութիւնների, տարբեր հաշիւներ պարզելու տեղ չի:

Արցախը պէտք է դառնայ նոր վերածննդի, համախմբման եւ դիմադրութեան օճախ, որի կողքին անվերապահ պէտք է կանգնի ողջ հայ ժողովուրդը Հայաստանի Հանրապետութիւնում եւ սփիւռքում:

Արցախում տեղի ունեցող գործընթացները Հայաստանի իրական ընդդիմադիր դաշտում պէտք չէ դառնան նոր պառակտումների պատճառ:

Ես ըմբռնումով եմ մօտենում հնչեցուած բազմաթիւ հարցադրումների, բայց ամէն դէպքում անընդունելի է այն անիմաստ գզվռտոցը, որը այս պահին կայ իրական ընդդիմադիր-ազգային դաշտում:

Մեր միակ վէճը եւ քննարկումները այս պահին պէտք է լինի ինչպէս մէկտեղել մեր ողջ կարողութիւնները, ինչ ծրագրով դուրս գալ այս իրավիճակից: Վստահեցնում եմ ձեզ` Հայաստանում եւ Արցախում մեր ժողովուրդը այլ բան մեզանից չի ուզում տեսնել եւ լսել, մեր հայրենակիցներին հետաքրքիր չէ ոեւէ մէկի քաղաքական վարկանիշը, անցեալը կամ ապագան, մարդիկ ուզում են համախմբում` ուժի կենտրոն, որը կարող է մեր գոյաբանական հարցերը լուծել:

Հետեւաբար կոչ եմ անում վերադառնալ մեր գլխաւոր օրակարգին` Դիմադրութիւն հայ ժողովրդի թշնամիներին` նրանց շահերը սպասարկող «հայկական» ուժերին:

Վերականգնենք Հայաստան-Արցախ-սփիւռք եռամիասնութիւնը, վերջինիս շուրջ հունաւորենք մեր պայքարը եւ գնանք առաջ:

Ես յոյս ունեմ, որ առաջիկայ ժամերին Արցախի ներքաղաքական հարցերը կը կարգաւորուեն, եւ կը կենտրոնանանք գլխաւոր անելիքի վրայ:

ՀՅԴ-ն, իբրեւ Արցախում ներկայացուած խորհրդարանական ուժ, Արցախի Հանրապետութիւնում, Հայաստանի Հանրապետութիւնում եւ ամէնուր առաջնորդւում է վերը նշուած սկզբունքներով, եւ մենք ամէն ջանք գործադրելու ենք այդ միասնութիւնը ունենալու համար:

ԻՇԽԱՆ ՍԱՂԱԹԷԼԵԱՆ
ՀՅԴ ՀԱՅԱՍՏԱՆԻ ԳԵՐԱԳՈՅՆ ՄԱՐՄԻՆԻ ՆԵՐԿԱՅԱՑՈՒՑԻՉ,
ՀԱՅԱՍՏԱՆԻ ՀԱՆՐԱՊԵՏՈՒԹԵԱՆ ԱԶԳԱՅԻՆ ԺՈՂՈՎԻ
«ՀԱՅԱՍՏԱՆ» ԽՄԲԱԿՑՈՒԹԵԱՆ ՊԱՏԳԱՄԱՒՈՐ