Հայաստանի Հանրապետութեան 100-ամեակի Մոնթրէալի տօնախմբութիւնը կը ճոխացնեն երգիչներ Կապի Կալոյեան եւ Ռուբէն Սասունցի
Քէպէքի Հայ Համայնքի Միացեալ Մարմնի կազմակերպութեամբ եւ
հովանաւորութեամբ Գանատայի մօտ ՀՀ արտակարգ եւ լիազօր դեսպան պրն. Լեւոն Մարտիրոսեանի Մայիս 13-ին Մոնթրէալի մէջ պիտի նշուի Հայաստանի Հանրապետութեան հիմնադրման եւ Մայիսեան հերոսամարտերուն հարիւրամեայ յոբելեանը։
Օրուան պատգամաբերն է պատմաբան Աշոտ Մելքոնեան։ Գեղարուեստական յայտագիրին իրենց մասնակցութիւնը պիտի բերեն հայրենի երգիչներ՝ Կապի Կալոյեան եւ Ռուբէն Սասունցի
ընկերակցութեամբ՝ Համազգայինի «Անի» պարախումբերուն։
Հանդիսութեան գլխաւոր հովանաւոր նուիրատուներն են՝ տէր եւ տիկին Ալպէր եւ Լէյլա Արոյեան
Հայրենի պատմաբան, Հայաստանի Ազգային ակադեմիոյ պատմաբանութեան բաժինի տնօրէն փրոֆ. Աշոտ Մելքոնեանը ծնած է Ախալքալաքի մէջ, 1969-ին։ Բարձրագոյն կրթութիւնը ստացած է Երեւանի համալսարանի պատմութեան բաժանմունքին մէջ, ուրկէ 2004 թուականին ստացած է փրոֆեսէօրի գիտական կոչում։ 11 գրքի և աւելի քան 150 պատմագիտական յօդուածի հեղինակ է։ Իր աշխատութիւնները լոյս տեսած են աշխարհի 12 երկիրներու մէջ՝ 10 լեզուներով։ Գիտական զեկուցումներով հանդէս եկած է աշխարհի տարբեր քաղաքներու մէջ։
Երգչուհի Կապի Կալոյեան ծնած է 1988-ին, Երեւանի մէջ։ Վեց տարեկանին համերգով ելոյթ ունեցած է Կլէնտէյլի «Ալեքս» սրահին մէջ։ Երաժշտական նախնական ուսումը ստացած է Սայաթ Նովայի անուան երաժշտական դպրոցին մէջ, աւելի ուշ՝ Ռոմանոս Մելիքեանի անուան պետական երաժշտական գոլեճի ճազի բաժանմունքին մէջ։ Երաժշտական իր երգացանկը կ՚ընդգրկէ Գուսան Խերամի, Սայաթ Նովայի, Կոմիտասի, Խաչատուր Աւետիսեանի, Գուսան Շահէնի, Գուսան Աշոտի եւ այլ երաժիշտներու ստեղծագործութիւնները։
Հայրենասիրական և ժողովրդագրական երգերի կատարող։ Ռուբէն Սասունցի ծնած է 1979-ին Երեւան։ Աւարտած է Երևանի էստրադային-ճազային արուեստի պետական գոլեճի ժողովրդական երգի բաժինը, ինչպէս նաև Երևանի թատրոնի և կինոյի պետական ինստիտուտի երաժշտական թատրոնի դերասանի բաժինը։ Համերգներով ելոյթ ունեցած է Հայաստանի, Եւրոպայի, Ռուսաստանի եւ Միացեալ Նահանգնետու մէջ։
Թողարկած է 2 ձայնասկաւառակ` «Սասնայ մէկ օր», «Սասնայ եարխուշտա» խորագրով։
Հանդիսութիւնը կը կայանայ Կիրակի, 13 Մայիս 2018-ին, երեկ. ժամը 6։30-ին
Հիւրասիրութիւն ձեռնարկի աւարտին. մուտքի նուէր՝ 20$։
Հասցէ՝ Centre Armenie
(1025 Boulvard Elisabeth, Laval, QC H7W 3J7)
Տոմսերու համար դիմել՝
Nora Gurunlian, Hamazkayin 514 856 0868
Salpi Margossian, Tekeyan 514 747 6680
AGBU office 514 748 2428