Լիբանանեան Պասքեթպոլ. Այսօր` Հուփս – ՀՄԸՄ


PROFOTO

PROFOTO

Լիբանանի պասքեթպոլի տղոց Ա. դասակարգի ախոյեանութեան 7-րդ հանգրուանի մրցումներուն ծիրին մէջ, այսօր ՀՄԸՄ-ի տղոց կազմը կը մրցի Հուփսի դէմ: Մրցումը, որ տեղի պիտի ունենայ Միշել Մըրի անուան համալիրին մէջ, պիտի սկսի ժամը 17:30-ին:

Ցարդ յաջորդական յաղթանակներով պսակուած իր վեց մրցումներով ՀՄԸՄ կը գրաւէ պարագլուխի դիրքը:

Իսկ Հուփս, որ ցարդ իր կատարած բոլոր մրցումներուն ալ պարտուած է եւ յաղթանակի համը չէ ճաշակած այս տարեշրջանին, կը գրաւէ վերջին դիրքը:

Սակայն հակառակ այս իրողութեան, ՀՄԸՄ այսօրուան իր մրցումը պէտք է կատարէ առանց անտեսելու մրցակից կազմը: Անիկա մրցումը պէտք է կատարէ այնպէս, ինչպէս կը կատարէր իր նախորդ մրցակիցներուն դէմ:

Նշենք, որ 7-րդ հանգրուանը սկսաւ նախանցեալ օր, երբ Սաժես Ղազիրի իր դաշտին վրայ հիւրընկալեց Թատամոնը:

Նախքան մրցումին սկսիլը, յարգուեցաւ յիշատակը երեք անձերու` Էլիաս Ուարտինիի, Ռիթա Շամիի եւ Հայքալ Մսալլեմի, որոնք երեք օր առաջ Պոլսոյ ահաբեկչական յարձակումին զոհ գացին:

Սաժես արձանագրեց իր երրորդ յաղթանակը, երբ 2 կէտի տարբերութեամբ` 86-84 արդիւնքով պարտութեան մատնեց իր հիւրը:

Յաղթական կազմին մարզիկներէն Թերել Սթոկլին նշանակեց 45 կէտ, մինչ Իրվըն Մորիս (Թատամոն)` 28 կէտ:

 


Leave a Comment

You must be logged in to post a comment.