Նիւ Եորքի Մէջ Պիտի Կայանայ Հայաստանի Տնտեսութեան Մէջ Ներդրումներու Ներգրաւման Նուիրուած Համաժողով

 

ԵՐԵՒԱՆ, «ՓանԱրմինիըն».– 10-11 Հոկտեմբերին Նիւ Եորքի մէջ պիտի կայանայ Հայաստանի տնտեսութեան մէջ արտաքին ներդրումներու ներգրաւման նուիրուած ներդրումային համաժողով։ Այս մասին, ըստ  «Ամերիկայի Ձայն» կայանին, յայտարարած է Հայաստանի զարգացման հիմնադրամի ղեկավար Կարէն Մկրտիչեանը։

Անոր համաձայն՝ Նիւ Եորքի ելեւմտական շրջանին՝ Ուոլ Սթրիթի մէջ կայանալիք նախաձեռնութեան ընթացքին ելոյթ պիտի ունենան Հայաստանի նախագահ Սերժ Սարգսեան, ինչպէս նաեւ Համաշխարհային դրամատան եւ Ասիական զարգացման դրամատան բարձրաստիճան պաշտօնեաներն ու ընկերութիւններու ղեկավարներ:

«Սա 15 տարիների ընթացքում առաջին նման միջոցառումն է, եւ մենք դեռեւս չունենք ներդրողների ցուցակ», դիտել տուած է Մկրտիչեան:

Համաժողովի կազմակերպիչներն են Հայաստանի կառավարութիւնն ու Ասիական զարգացման դրամատունը, անոր ներկայ պիտի ըլլան  տնտեսութեան առաջատար կառոյցներու՝ Hyatt Hotels-ի, ABBYY-ի, Reddit-ի, PicsArt-ի եւ շարք մը այլ ընկերութիւններու ղեկավարներ:

«Մենք ներկայացնելու ենք Հայաստանի տնտեսութեան 8 ոլորտ եւ դրանց աջակցմանն ուղղուած պետական ծրագրերը: Դրանից բացի, իւրաքանչիւր ոլորտի մասին կը խօսեն այդ ոլորտում յաջողութիւններ արձանագրած ընկերութիւնների ներկայացուցիչներ», դիտել տուած է Կարէն Մկրտիչեան:

Մասնաւորաբար ներդրողներուն պիտի ներկայացուի Հայաստանի մէջ արեգակնային ուժանիւթի, երկաթուղային բեռնափոխադրումներու, Հիւսիս-Հարաւ մայրուղիի կառուցման, հանքավայրերու գործարկման, գիւղատնտեսութեան զարգացման ծրագիրներու հեռանկարները, ինչպէս նաեւ՝ բարձր արհեստագիտութիւններու զարգացման հեռանկարները:

Կարէն Մկրտիչեանի համաձայն՝ հակառակ շրջափակման եւ փտածութեան, Հայաստանի տնտեսութիւնը կրնայ արտերկրեայ ներդրողներուն համար հետաքրքրութիւն ներկայացնել. «Հայաստանը եւրոպական եւ ամերիկեան ընկերութիւնների համար հարթակ դառնալու ներուժ ունի, որոնք այնուհետեւ կարող են իրենց արտադրանքը տեղափոխել Ռուսաստան եւ Եւրասիական տնտեսական միութեան այլ երկրներ առանց մաքսավճարների»:

Միեւնոյն ատեն, Հայաստանի զարգացման հիմնադրամի ղեկավարը նշած է, որ Հայաստանի տնտեսութեան մէջ արտերկրեայ ներդրումներուն քանակը մեծապէս նուազած է անկէ ետք, երբ Հայաստանի ղեկավարութիւնը Եւրամիութեան հետ տնտեսական համագործակցութեան խորացման փոխարէն նախընտրեց անդամակցիլ Եւրասիական տնտեսական միութեան։

«Ուղղակի արտաքին ներդրումների ծաւալը զգալի նուազել է եւ այն կարող է մի շարք պատճառներ ունենալ: Դրանցից մէկն իմ կարծիքով այն է, որ մենք անցումային շրջանում ենք: Մինչ այն պահը, երբ Հայաստանը որոշեց միանալ Եւրասիական տնտեսական միութեանը, ակնկալիքն այն էր, որ երկիրը կը միանայ Եւրամիութեանը կամ Եւրոպական գործընկերութեանը: Երբ դա տեղի չունեցաւ, մի շարք եւրոպական ընկերութիւններ, որոնք ներդրումներ էին կատարում, այժմ նուազեցնում են սպասելիքները», ըսած է ան։

 

Leave a Comment

You must be logged in to post a comment.