«Միասնական բռունցք դարձած ժողովրդին անհնար է յաղթել». Հարցազրոյց Գանատայի մօտ ՀՀ դեսպան Արմէն Եգանեանի հետ

«Միասնական բռունցք դարձած ժողովրդին անհնար է յաղթել»

Հարցազրոյց Գանատայի մօտ ՀՀ դեսպան Արմէն Եգանեանի հետ

Մայիս 8-ին, Մոնթրէալի «Ցեղասպանութեանց կանխարգիլման քայլարշաւ»ի նախօրեակին, «Հորիզոն»ի խմբագրատուն այցելեց Գանատայի մօտ ՀՀ արտակարգ եւ լիազօր դեսպան Արմէն Եգանեան , որուն հետ «Հորիզոն»ի վարիչ խմբագիր Վահագն Գարագաշեան ունեցաւ ստորեւ ներկայացուած հարցազրոյցը:

Հ.- Յարգելի՛ պարոն Եգանեան, այս տարի կը համալրուի Գանատայի մէջ ձեր պաշտօնավարութեան հնգամեակը: ինչպէ՞ս կ՚արժեւորէք ձեր անցած դիւանագիտական ասպարէզի հնգամեայ այդ  ժամանակահատուածը:

Ա.Ե.- Շնորհակալութիւն, պարո՛ն Գարագաշեան, այս հրաւէրին համար: Այո՛, սա երեւի ինչ որ տեղ արդէն աւանդական հարցազրոյց է դարձել «Հորիզոն»ի հետ: Նախ եւ առաջ պէտք է ասեմ, որ այս 5 տարիները ակնթարթի պէս անցան, բայց հարկ է նշել, որ մենք կառուցում էինք մեր երկրում յարաբերութիւնների բոլոր մասնիկները՝ քաղաքական, դիւանագիտական, առեւտրական, մշակութային առումով, հիմնուելով այն աշխատանքի վրայ, որը արդէն նախկին դեսպանները, հաւատարմատարները կատարել էին այստեղ մինչեւ իմ Գանատա ժամանաումը: Ամէն մէկը իր անձից իր լուման ունէր՝ Հայաստան-Գանատա յարաբերութիւնները զարգացնելու ու խորացնելու ուղղութեամբ:

Ես առաջին հերթին կ՚ուզէի անդրադառնալ այն պահին, երբ 2011 թուականին, այստեղ բաւականին բացասական մթնոլորտ ստեղծուել էր Գանատայի խորհրդարանում, որտեղ մենք ունէինք 4 յայտարարութիւն խոճալուի այսպէս կոչուած «ցեղասպանութեան» մասին, որը իբրեւ հայերն են իրականացրել։ Ստեղծուած կացութիւնը մտահոգիչ էր, եւ անմիջապէս մենք լծուեցինք աշխատանքի եւ Գանատայի Հայ դատի յանձնախումբի հետ միասին Գանատայի Ծերակոյտի անդամներին եւ երեսփոխաններին կապուեցինք, հանդիպեցինք, բացատրեցինք իրողութիւնը, ճշմարտութիւնը, եւ կարելի է ասել, որ այդ խնդիրը լուծուեց ի նպաստ մեզ։ 2011 թուականից ի վեր նման սխալ յայտարարութիւն չի հնչել Գանատայի խորհրդարանում:

Այնուհետեւ, անցնող տարիներին՝ սկսեցինք աշխատել մեր երկրների քաղաքական յարաբերութիւններն ու դիւանագիտական յարաբերութիւնները բարելաւելու ուղղութեամբ, եւ կարելի է ասել, որ առաջին դրական իրադարձութիւնը այն էր, որ հայ-գանատական յարաբերութիւնների պատմութեան մէջ առաջին անգամ Գանատայից պատուիրակութիւն գնաց Հայաստան, Հայաստանի նախագահի ընտրութիւններից յետոյ երդմնակալութեան արարողութեան մասնակցելու համար՝ գլխաւորուած երկու խորհրդարանական քարտուղարների Տիպաք Oպրայ եւ Չանսէն Լանկի կողմից: Դա բաւականին բարձրաստիճան պատուիրակութիւն էր, եւ ընդհանրապէս առաջինն էր, որ Գանատայից նման պատուիրակութիւն մասնակցեց հայկական հողի վրայ այդ կարեւոր իրադարձութեանը: Մենք շատ գնահատեցինք դա: Դրանից յետոյ Հայաստան այցելեցին գանատական բազմաթիւ պատուիրակութիւններ, խորհրդարանական եւ կառավարական մակարդակների վրայ, որոնց շարքին ներգաղթի նախարար Ճէյսըն Քէնիի այցելութիւնը, Խորհրդարանի անդամներ Ճիմ Գարիճիանիսի եւ Սթեֆան Տիոնի այցելութիւնները Արցախ։

2015-ին Գանատա այցելեցին  ՀՀ ուժանիւթի եւ բնական պաշարների նախարար Երուանդ Զախարեան, Սփիւռքի նախարար Հրանոյշ Յակոբեան, ՀՀ Ազգային ժողովի նախագահ Գալուստ Սահակեան: Նաեւ Գանատայից մենք ունեցանք երկու պատուիրակութիւն նախարարների գլխաւորութեամբ. Մէկը՝ Քրիս Ալեքսանտրի պատուիրակութիւնը, որը մասնակցեց Ցեղասպանութեան 100-ամեակի Երեւանում կայացած պետական պաշտօնական հանդիսութեան, բաւականին մեծ եւ տպաւորիչ պատուիրակութեամբ, այնուհետեւ յաջորդեց Քրիսթիան Փարատիի պատուիրակութիւնը, որը այցելել էր Հայաստան Ֆրանքաֆոնիայի նախարարական գագաթաժողովի համար, որտեղ մասնակցում էին 80 պատուիրակութիւններ աշխարհի տարբեր անկիւններից, դա գրեթէ կարելի է ասել 24 տարուան ընթացքին ամենամեծ միջազգային միջոցառումներից մէկն էր: Այս այցերի շնորհիւ մենք Գանատան աւելի մօտեցրեցինք Հայաստանին։ Պէտք է յիշատակեմ նաեւ, որ առեւտրական յարաբերութիւնների բնագաւառում մենք շատ հետաքրքիր նախաձեռնութիւն սկսեցինք գանատական կողմի հետ, Գանատայի դեսպանի հետ, եւ առաջին անգամ անցած տարի առեւտրական առաքելութիւն ճանապարհեցինք դէպի Հայաստան, բաղկացած 20-22 հոգուց, եւ այս տարի արդէն մենք ունեցանք երկրորդ առեւտրական առաքելութիւնը, դա եւս առաջին անգամն էր մեր յարաբերութիւնների պատմութեան ընթացքին. Կազմակերպեցինք գանատացի գործարարների այցը Հայաստան, որպէսզի զարգացնենք մեր յարաբերութիւնները թէ՛ ընդերքի, թէ՛ բարձր տեխնոլոկիաների, թէ՛ գիւղատնտեսութեան բնագաւառներում: Այստեղ հարկ է յիշատակել նաեւ ոստիկանութեան համագործակցութիւնը, որը վերջերս մենք սկսեցինք, քանի որ կարիքը կար ոստիկանութեան բնագաւառում կրթական բարեփոխումների: Այսպիսով Օնթարիոյի ոստիկանութիւնից պատուիրակութիւն ճանապարհեցինք դէպի Հայաստան: Ասեմ ձեզ շատ տպաւորուած էին եւ, իրենց խօսքերով, իրենք շատ բան սովորեցին Հայաստանից: Սա երկարատեւ համագործակցութիւն է, սա սկիզբն է դեռ եւ պէտք է շարունակուի:

Ես շատ շնորհակալ եմ բոլոր մեր գանատացի գործընկերներին, Հայ դատի յանձնախումբին եւ Գանատայի հայ համայնքին, որոնք օժանդակում են, օգնում են, որպէսզի մենք միասին իրականացնենք Գանատա-Հայաստան պետական յարաբերութիւնների զարգացման կարեւոր գործընթացը:

Դեսպան Եգանեան Գանատայի ժառանգութեան նախարար Մելանի Ժոլիի հետ Մոնթրէալի «Ցեղասպանութեանց կանխարգիլման քայլարշաւ»ի ընթացքին 

Հ.- Հայաստան-Գանատա միջպետական կապերուն անդրադառնալով նաեւ կարեւոր են տնտեսական փոխյարաբերութիւնները։ Գանատան կը գտնուոի Հայաստանի մէջ տնտեսական կարեւոր ներդրում ունեցող գլխաւոր երկիրներու շարքին, յատկապէս հանքարդիւնաբերութեան բնագաւառէն ներս: Այսօր ի՞նչ վիճակի մէջ կը գտնուին տնտեսական այդ 1փոխյարաբերութիւններն ու գործակցութիւնը:

Ա.Ե.- Դեսպանութեան ուշադրութեան ներքոյ միշտ եղել են առեւտրական յարաբերութիւնները, որովհետեւ մենք կարծում ենք, որ պատրաստակամութիւն կայ զարգացնելու այդ յարաբերութիւնները երկուստեք: Մենք անշուշտ ունենք բաւականին լաւ համագործակցութիւն, ինչպէս յիշատակեցիք, հանքարդիւնաբերական եւ բարձր տեխնոլոկիաների ոլորտում։ Այս ոլորտին մէջ, տարիներ առաջ մենք օգնեցինք, որպէսզի գանատական Maple Leaves բժշկական հաստատութիւնը Հայաստանում սկսի իր աշխատանքները։ Մենք օժանդակեցինք նաեւ աշխարհի ամենախոշոր անշարժ գոյքի գործակալութեան Remax-ի մասնաճիւղի բացմանը Հայաստանում: Բայց հարկ է նշել, որ, այո՛, 2012-2013 թուականներին Գանատան իր ներդրումների շնորհիւ նոյնիսկ առաջին տեղն էր զբաղեցրել, այժմ դա շարունակւում է, այսօր մենք կարող ենք յիշատակել մի քանի ընկերութիւններ, ինչպիսին են Lydian International-ը կամ Dundee Precious Metals-ը եւ Centerra Gold-ը։ Այս վերջինը նոր ընկերութիւն է, որի հետ մենք պայմանաւորուածութիւն ձեռք բերեցինք 2015-ին նախարար Երուանդ Զախարեանի այցելութեան ժամանակ, իսկ Lydian international-ի Թորոնթոյի մասնաճիւղը այսօր, այս պահին, երբ մենք խօսում ենք իրականացնում է 480 միլիոն տոլարի ներդրում: Ես անընդհատ կապի մէջ եմ իրենց տնօրէնութեան հետ՝ ճշդելու թէ որեւէ հարցեր կա՞ն կապուած օգնութեան հետ, ճշդելու նաեւ տեղեկութիւնը, թէ ի՛նչ են իրենք անում Հայաստանում, եւ իրենք արդէն Ապրիլի սկիզբից սկսեցին ներդրումներ կատարել։ Այս համագործակցութիւնը շատ կարեւոր է, որովհետեւ Հայաստանը կարող է լինել լուրջ հանքարդիւնաբերական երկիր, բայց մեզ համար շատ կարեւոր է, որպէսզի արեւմտեան երկրների ընկերութիւնները, մասնաւորապէս գանատական ընկերութիւնները լինեն հայկական շուկայ, որովհետեւ իրենք շատ պատասխանատու ձեւով են վերաբերւում շրջակայ միջավայրի բնապահպանութեան տեսանկիւնից, ինչը շատ կարեւոր է ՀՀ բնակչութեան առողջութեան համար, եւ այդ առումով ես կարող եմ ասել, որ մենք ի հարկէ զարգացնում եւ խորացնում ենք այդ յարաբերութիւնները։

Հ.- Ի տարբերութիւն այլ երկիրներու դեսպաններու, պարո՛ն Եգանեան, դուք ստիպուած էք միաժամանակ ձեր ուշադրութեան կեդրոն դարձնել երեք բեւեռներ եւ երեք ճակատներ, առաջինը՝ ձեր պետական փոխյարաբերութիւններն են Գանատայի պետութեան հետ, երկրորդը՝ թրքական ճակատն է, թրքական հակաքարոզչական մեքենան դիմագրաւելու բեւեռը, իսկ երրորդը՝ ատրպէյճանականը, եւ այս երեք ճակատներուն վրայ մեր Գանատայի դեսպանները միշտ պատնէշի վրայ են: Ինչպէ՞ս կը հունաւորէք թուրք-ատրպէյճանական հակաքարզչութիւնը սանձազերծելու ձեր աշխատանքը:

Ա.Ե.- Շատ լաւ հարց է: Ե՛ւ դժուարութեամբ, ե՛ւ հեշտութեամբ: Դժուարութեամբ, որովհետեւ մէկ-մէկ երբ խօսում եմ ես իմ գործընկերներին հետ այլ երկրներից, անունները չտամ, ասենք Լատին Ամերիկայից կամ այլ երկրներից, իրենք իրօք որ մէկ portfolio ունեն՝ երկրների յարաբերութիւնների զարգացում: Մեր պարագայում, ինչպէս ասեցիք, բացի այդ մէկ կարեւորագոյն ուղղութիւնից, մենք ունենք եւս երկու ուղղութիւն: Մէկը ուրեմն Թուրքիայի գործօնն է, որը նոյնիսկ այս երկրում, որը ճանաչած է Հայոց ցեղասպանութիւնը բոլոր մակարդակներով, 2006 թուականից Գանատայի բոլոր ընտրեալ վարչապետների յայտարարութիւնները յստակ են, բայց ցաւօք սրտի Թուրքիան շարունակում է իր քարոզչութիւնը կամ հակաքարոզչութիւնը, անընդհատ փորձում է տապալել այն գործընթացը, որը դեռ սկիզբ էր արել այստեղ տարիներ առաջ եւ որը արտացոլուեց Ցեղասպանութեան ճանաչելով: 2013 թուականին մօտ երկու ամիս Գանատայի խորհրդարանում լսումներ տեղի ունեցան, թէ ինչպէ՛ս կարելի է շտկել այն վնասուած յարաբերութիւնները Թուրքիայի հետ, որը յառաջացաւ Գանատայի կողմից Մեծ եղեռնի ճանաչումով: Ես այն ժամանակ անշուշտ անընդհատ կապի մէջ էի Արտաքին Գործոց նախարարութեան հետ՝ բնականաբար ասելու, որ մենք դէմ չենք որ դուք ունենաք լաւ յարաբերութիւններ բոլորի հետ, այդ թւում Թուրքիայի հետ, սակայն այդ լաւ յարաբերութիւնները, կամ վնասը շտկելու հարցը չպէտք է լինի Հայաստանի, հայ ժողովրդի շահերի ի վնաս, մասնաւորապէս Հայոց ցեղասպանութեան ճանաչելու հաշուին: Մի գուցէ որոշ մարդկանց թւում է, թէ ասենք Սէնթ Գաթրինզում յուշարձանի բացումը զուտ մշակութային կամ հոգեբանական նշանակութիւն է, բայց այդպէս չէ, որովհետեւ դա նաեւ կրթութիւն է գանատացի ժողովրդի համար, որոնք տեսնելով այդ յուշարձանը, կարդալով այդ պատմութիւնը՝ սկսում են հասկանալ, հետաքրքրուել:

Թուրքը չի քնում, շարունակում է իր հակահայ գործունէութիւնը, եւ մենք բնականաբար ամէն ջանք կը գործադրենք չէզոքացնելու նրանց այդ աշխատանքը:

Իսկ Ինչո՛ւ է հեշտ մեր աշխատանքը, որովհետեւ մենք արդար ենք, ճիշդ ենք, մենք ճշմարիտ կողմն ենք այս խնդրի: Ես միշտ մտածում եմ, եթէ ես լինէի թուրք դեսպան, ի՛նչ դժուար կը լինէր ինձ (մանաւանդ կիրթ դիւանագէտների համար, որոնք շատ լաւ գիտեն իրենց անցեալը) կատարել Թուրքիայի Արտաքին Գործոց նախարարութեան յանձնարարութիւնները, իմանալով որ ինչ որ կեղծարարութիւն եմ փաստօրէն իրականացնում… դրա համար այդ տեսակէտից մեր գործը հեշտ է: Նոյնը վերաբերւում է Ատրպէյճանին եւ Ղարաբաղի հարցին, որը առանձին հարց է, բայց նաեւ հիւսուած է Ցեղասպանութեան հարցին, որովհետեւ ԼՂՀ խնդիրը ուղիղ կապ ունի Հայոց ցեղասպանութեան հետ, ե՛ւ այն ջարդերի հետ ե՛ւ այն փանթուրանական քաղաքականութեան հետ, որը Թուրքիան դարերէ ի վեր իրականացնում է հայ ժողովրդի նկատմամբ:

Այսօր, ցաւօք սրտի ընդամէնը Պատմական Հայաստանի 10 տոկոսի վրայ է մնացել մեր ժողովուրդը, բայց այն ինչ որ տեղի ունեցաւ Արցախում միայն քառակուսի քիլոմեթրերի համար չեն, որովհետեւ դա վերածնունդ էր մեր ազգին, դրանով մեր ուժը վերածնուեց, մենք զգացինք մեր ուժը, մեր կորովը մեր խիզախութիւնը: Այդ ամէն ինչը իրականացուեց Արցախի ազատամարտի ժամանակ, եւ մենք վստահութիւն ձեռքբերեցինք, մենք հասկացանք, որ մենք արժանի ժողովուրդ ենք, որ կարող ենք մեր իրաւունքների համար պայքարել… եւ հասանք արդիւնքի՝ ոչ միայն Արցախը ազատագրուեց, այլ նաեւ իր շուրջ բոլոր շրջանները ազատագրուեցին։

Մենք ստիպուած ենք մշտապէս այդ քարոզչութեան դէմ պայքարելու բնականաբար, ինչպէս օրինակը բերեցի սկզբում խոճալուի, այսպէս կոչուած, ցեղասպանութեան յայտարարութիւններից սկսած ընդհուպ մինչեւ ապրիլեան չորսօրեայ պատերազմը, այդ մեր աշխատանքի մշտական մաս է կազմում, իսկ այս օրերին, այս շաբաթներին գրեթէ միմիայն դրանով էինք զբաղւում, տասնեակ հանդիպումներ քաղաքական ղեկավարների հետ, որպէսզի յստակ բացատրուի իրականութիւնը: Դա կարեւոր է, որովհետեւ 200 միայն երեսփոխան կայ, որոնք նոր են եւ շատերը չեն էլ լսել այդ խնդրի մասին, եւ իրենց պէտք է բացատրել, ինչը մենք հիմա իրականացնում ենք:

Գանատայի նախկին պաշտպանութեան նախարար Ճէյսըն Քէնիի հետ

Հ.- Անցնող Ապրիլի սկիզբը, Արցախեան ճակատին վրայ նոր Աւարայր, նոր Սարդարապատ կը կերտէր հայ զինուորը։ Այսօր Արցախը «ամրոց պետութեան» իրավիճակի մէջ կը գտնուի։ Ի՞նչպէս կը բնութագրէք Պաքուի յարձակապաշտ ռազմական քայլը։

Ա.Ե.- Բոլորս տեսանք, թէ ի՛նչ տեղի ունեցաւ Ապրիլի առաջին օրերից սկսած: Բանակցային գործընթացում ամբողջովին ձախողուած Պաքուի ռեժիմը փորձեց սեփական մաղձը նետել մարտի դաշտ, որտեղ, սակայն, նոյնպես լիակատար ձախողում ապրեց: Ատրպէյճանը շարունակաբար մերժել է խնդրի բացառապէս խաղաղ կարգաւորման վերաբերեալ միջազգային հանրութեան կոչերը: Ապրիլի սկզբին Լեռնային Ղարաբաղի դէմ ալիեւեան ռեժիմի կողմից սանձազերծուած լայնածաւալ ռազմական ակրեսիւ գործողութիւնները պատճառ դարձան բազմաթիւ զոհերի եւ վիրաւորների: Դրանք, միաժամանակ, ուղեկցուեցին միջազգային մարդասիրական եւ միջազգային իրաւունքի ոլորտում ստանձնած պարտաւորութիւնների կոպտագոյն խախտումներով:

Չնայած Ատրպէյճանի, Լեռնային Ղարաբաղի եւ Հայաստանի կողմից կնքուած զինադադարի հաստատման վերաբերեալ 1994 թ. եւ հրադադարի ամրապնդման 1995 թ․եռակողմ համաձայնագրերն անվերապահ կատարելու վերաբերեալ Մինսկի խմբի համանախագահների պարբերական կոչերին՝ Պաքուն փորձեր է կատարում կասկածի տակ դնելու այդ համաձայնագրերի վաւերականութիւնը` ԵԱՀԿ-ում եւ ՄԱԿ-ում համապատասխան նամակներ տարածելու ճանապարհով: Այդ փորձերը ձախողուեցին Մինսկի խմբի համանախագահ երկրների արագ արձագանգի շնորհիւ, որոնք կոչ արեցին ամբողջովին յարգել 1994-1995 թթ. զինադադարի համաձայնագրերը:

Ատրպէյճանը շարունակում է զինադադարի խախտումները` շփման գծի ողջ երկայնքով կեդրոնացնելով ծանր զինտեխնիկա եւ զօրքեր, առաւել ուժգնացնելով իր ռազմատենչ հռետորաբանութիւնը եւ իրականացնելով սադրիչ քարոզչութիւն միջազգային հարթակում` փորձելով հայկական կողմին մեղադրել այն ամէնում, ինչ հենց ինքն է անում՝ այդպիսով փորձելով հող նախապատրաստել նոր ռազմական յարձակումների համար, որոնք կարող են ունենալ անկանխատեսելի հետեւանքներ ողջ տարածաշրջանի համար:

Այսօրուայ հրամայականն է կանխել Ապրիլի սկզբին տեղի ունեցածի կրկնութիւնը ապագայում, երաշխաւորել, որ այս խնդրին ռազմական լուծում տալու վտանգաւոր փորձերն արդիւնաւէտ կերպով կը սանձահարուեն: Համանախագահների կողմից առաջադրուած վստահութեան ամրապնդման միջոցների կեանքի կոչումը, ներառեալ՝ հրադադարի ռեժիմի խախտումների հետաքննութեան մեխանիզմի ստեղծումը եւ ԵԱՀԿ գործող նախագահի անձնական ներկայացուցչի գրասենեակի եւ թիմի կարողութիւնների մեծացումը, անկասկած, կը նպաստեն այդ նպատակի իրագործմանը։ Նման որոշակի քայլերը կարող են թոյլ տալ վերականգնել բանակցային մթնոլորտը, շարունակելու խաղաղ գործընթացը: Մենք ջանք չենք խնայի համանախագահ երկրների հետ միասին աշխատելու՝ միտուած Լեռնային Ղարաբաղի հակամարտութեան բացառապէս խաղաղ կարգաւորմանը:

Մենք բազմաթիւ հանդիպումներ ենք ունեցել Գանատայի իշխանութեան բարձրաստիճան ներկայացուցիչների եւ հասարակական-քաղաքական շրջանակները ներկայացնող մեր գործընկերների հետ: Նրանց մանրամասն ներկայացնելով ստեղծուած իրավիճակը` կոչ ենք արել զերծ մնալ հաւասարութեան նշան դնելուց եւ հասցէական կոչերով դատապարտել ակրեսորի քաղաքականութիւնը, քանզի հաւասարութեան նշան դնելն էլ աւելի է ոգեւորում Պաքուի` իրականութիւնից կտրուած բռնապետին:

– Պրն. Եգանեան, Արցախի համար եւ հայութեան համար պատմական այս օրերուն, ի՞նչ է ձեր ուղերձը գանատահայութեան։

Ա.Ե.- Գանատահայ համայնքը մշտապէս աչքի է ընկել Հայրենիքի նկատմամբ իր ուշադրութեամբ եւ Հայաստանի առջեւ ծառացած խնդիրների ժամանակ միաւորուած կերպով իր ուժն ու աջակցութիւնը ցոյց տալու կարողութեամբ: Ցանկանում եմ հիացմունքս արտայայտել Գանատայում բնակուող մեր բոլոր հայրենակիցների դրսեւորած հայրենասէր եւ հոգատար վերաբերմունքի համար: Դուք կրկին ցոյց տուեցիք, որ միասնական բռունցք դարձած ժողովրդին անհնար է յաղթել: Վերջին մէկ ամսուայ ընթացքում Գանատայի հայ համայնքը լրջագոյն օգնութիւն է ցուցաբերել Հայաստանին եւ Արցախին: Այդ օգնութիւնն ունեցել է դրամական մեծաքանակ փոխանցումների տեսք, այն ունեցել է Հայաստան եւ Արցախ հարիւրաւոր արկղերով ուղարկուած հագուստի եւ զինուորական առաջին անհրաժեշտութեան պարագաների, նիւթական այլ միջոցների տեսք: Այդ աջակցութեան եւ Հայրենիքի նկատմամբ հոգատարութեան մէկ այլ եւ ամենավառ ապացոյցն են այն բոլոր հեռախօսազանգերն ու արձագանգները, որ դեսպանութիւնը ստացել է` սկսած ապրիլեան առաջին օրերից եւ շարունակում է ստանալ մինչ այժմ: Մեր հարիւրաւոր հայրենակիցներ Գանատայի տարբեր քաղաքներից` Վանգուվըրից մինչեւ Նիւուֆաունտլենտ, կապուելով մեզ հետ, պարզապէս խնդրում էին իրենց ուղղութիւն ցոյց տալ` Արցախ հասնելու եւ առաջին գիծ մեկնելու համար: Սա հայի ուժեղ բռունցքն է, որին, ինչպէս նշեցի, յաղթել չի լինի:

Սիրելի՛ հայրենակիցներ,

Ատրպէյճանի ղեկավարութեան սանձարձակ պահուածքն այսօր էլ շարունակւում է: Ստեղծուած իրավիճակում իւրաքանչիւրիս պարտքն է լաւ անել մեր գործը` ամէն մէկս մեր տեղում: Բոլորիդ հանգստութեան կոչ եմ անում: Հետեւէք դեսպանութեան կողմից ամէնօրեայ ռեժիմով տարածուող տեղեկատուութեանը եւ կարող էք ցանկացած հարցի դէպքում կապուել մեզ հետ:

Հայերն առաջին անգամ չէ, որ ցոյց են տալիս, որ իրենց միասնականութեամբ, համախմբուածութեամբ եւ աշխատասիրութեամբ դարեր են կտրել-անցել ու դեռ երկար դարեր են յարատեւելու: Շնորհակալութիւն:

Հարցազրոցը վարեց Վահագն Գարագաշեան