Երուսաղէմի մէջ Հայ հոգեւորականներու դէմ թքնելու արարքները կը դատապարտուին
Մարմարա.- Իսրայէլի միջ-կրօնական յարաբերութիւններու հարցերու հրէական խորհուրդը դատապարտեց Երուսաղէմի մէջ հայ հոգեւորականութեան դէմ ատելութեան ու մոլեկրօնութեան թքնելու վերջին արտայայտութիւնները։
«Մենք կոչ կ՚ուղղենք որ անյապաղ դադրին ու կանխարգիլուին անմեղ հայ հոգեւորականներու դէմ բռնութեան շարունակական արտայայտութիւնները»։
«Երուսաղէմի հին քաղաքին մէջ թքնելու, հայհոյանքի եւ կրաֆիթիի դէպքերը տեղ չունին Սուրբ հողին վրայ գտնուող հրէական մեր ժողովրդավարական պետութեան մէջ։ Այդ անճոռնի, անհանդուրժելի արարքները կը խախտեն Իսրայէլի եւ յուդայականութեան հիմնական արժէքները ու կը դաւաճանեն մեր այն գաղափարին, ըստ որուն, բոլոր մարդիկ ստեղծուած են Աստուծոյ պատկերով։ Եւ քանի որ անոնք ստեղծուած են աստուածային պատկերով, բոլոր մարդիկ սուրբ են եւ պէտք է վերաբերիլ արժանապատուութեամբ ու յարգանքով։ Որպէս հրեաներ՝ մենք յատուկ պարտաւորութիւն ունինք մեր ընկերութեան մէջ օտարին չճնշելու», կը նշուի յայտարարութեան մէջ։ Խորհուրդը պահանջած է որ ոստիկանութիւնը պատժէ այսպիսի արարքներու հեղինակները, աւելցնելով որ այն ծայրայեղականները, որոնք կը գործեն այդ յանցանքները, ամօթ կը պատճառեն հրեայ ժողովուրդին, Իսրայէլի պետութեան, Երուսաղէմ քաղաքին, անոր կառավարութեան ու քաղաքականութեան։
նշենք, որ ծայրայեղ ուղղափառ հրեաներ (haredi jew) հայ եւ այլ քրիստոնեայ հոգեւորականներու վրայ կը թքնեն: Տարիներու ընթացքին այդ պատճառով բախումներ տեղի ունեցած են քրիստոնեաներու եւ ծայրայեղ ուղղափառ հրեաներու միջեւ: