Հայաստանի Մէջ 30 Տարեկան Քաղաքացիներուն Մէկ Երրորդը Ամուրի Է

\n \n

ԵՐԵՒԱՆ, «Նիուզ».– Հայաստանի մէջ ամուսնութեան միջին տարիքը բարձրացած է: Այս հաստատումը կատարած է Հայաստանի մէջ ՄԱԿի ազգաբնակչութեան հիմնադրամի ներկայացուցիչ Գարիկ Հայրապետեան, 11 Յուլիսին լրագրողներուն հետ ունեցած հանդիպումին ընթացքին։ Անոր համաձայն՝ եթէ 2001 թուականին ամուսնութեան միջին տարիքը 24 տարեկան էր, ապա այսօր 26 է: Ըստ Հայրապետեանի՝ աղջիկները ներկայիս կ՛ամուսնանան 25 տարեկանին, տղաքը՝ 29:
\n «Ներկայում մինչեւ 25 տարեկանը չամուսնացած երիտասարդների թիւը շուրջ 30 տոկոս է: Իսկ 30 տարեկանների շրջանում իւրաքանչիւր երրորդն ընտանիք չի կազմել», նշած է ան:
\n Բանախօսը նաեւ լուսարձակի տակ առած է այն հանգամանքը, որ ընտանեկան կեանքին պատրաստ չըլլալու հիմնական պատճառը տղոց պարագային անկայուն ֆինանսական դրութիւնն է, որ կապուած է երկրին մէջ տիրող անգործութեան բարձր մակարդակի հետ: Աղջիկներուն պարագային, ան դիտել տուած է, որ անոնց մեծ մասը չ՛ամուսնանար, որովհետեւ կեանքի յարմար կողմակից չի գտներ։ «Խնդիրն այն է, որ ժամանակակից կանայք աւելի կրթուած եւ հոգեպէս աւելի զարգացած են», յայտնած է Հայրապետեան։
\n Անդրադառնալով ժողովրդագրական խնդիրներուն՝ Հայրապետեան ընդգծած է, որ այսօր երկրին մէջ մէկ կնոջը միջին բաժին կ՛իյնայ 1.5 երեխայ: «Այդպիսով, եթէ իրավիճակը չփոխուի, ապա 2017 թուականին բնակչութեան բնական աճը կը դառնայ բացասական, այլ կերպ ասած՝ մահացողների թիւը կը գերազանցի նորածիններին թուին», բացատրած է ան։

\n \n

Leave a Comment

You must be logged in to post a comment.