Տիգրան Աբրահամեան. «Յաջորդիւ Ատրպէյճանը նոր պատրուակ է գտնելու առաջնագծի որեւէ ուղղութեամբ առաջխաղացում ապահովելու»
ՀՀ ԱԺ պատգամաւոր Տիգրան Աբրահամեանն իր «Ֆէյսպուք»-եան էջում գրել է.
«Եթէ Ատրպէյճանը իր յայտարարած վիրաւոր ատրպէյճանցու դիմաց 4 հայ զինծառայողի կեանք է խլում եւ մարսում է, ապա յաջորդիւ էլ նոր պատրուակ է գտնելու եւ ոչ միայն նոր զոհեր պատճառելու, այլ առաջնագծի որեւէ ուղղութեամբ առաջխաղացում ապահովելու:
Յիշո՞ւմ էք, թէ ինչ էր ասում Ալիեւը Ջերմուկի եւ միւս բնակավայրերի մասով: Ասում էր` ՀՀ տարածք ենք ներխուժել, որ աւելի յստակ հասկանանք, թէ հայերը ռեւանշի՞ են դիմում, թէ՞ ոչ:
Այս տրամաբանութեան եւ ՀՀ իշխանութեան լուռ կամ քօղարկուած համաձայնութեամբ, ատրպէյճանցիները յետոյ էլ կը հարուածեն ու կ’ամրանան այն հատուածներում, որտեղ իրենց տրամաբանութեամբ ճանապարհ կամ միջանցք պէտք է անցնի:
Կ’ասեն` մեր խաղաղ բնակիչների անվտանգ անցումն ենք ապահովում:
Ի դէպ, ատրպէյճանական այս արիւնալի յարձակումը վերջիններիս համար նաեւ թեստի նշանակութիւն ունի` հասկանալու, թէ այս փուլում, երբ ՀՀ իշխանութիւնը մեծ-մեծ խօսելու չեմպիոնական մրցավազքի է ելել, ինչպէ՞ս կը վարուի:
Սրանք, ի հարկէ, մեծ-մեծ խօսում են միայն երկրի ներսում` ուժայինների յետեւում թաքնուելով եւ մարդկանց նստացնելով»:
Ստեղծուած իրադրութիւնից է նաեւ կախուած, թէ Ատրպէյճանն իր սցենարային զարգացման համար հետագայում ինչ մարտավարութիւն կ’ընտրի:
Յ. Գ. – Երէկ նկատեցի, որ անուղղակի ձեւով, որոշները գրում էին, որ եթէ ՀՀ-ն պատասխանի ատրպէյճանցիներին, ապա կարող է սադրանքի ծաւալը ընդլայնուել` ակնարկելով, որ ոչինչ չպէտք է անել:
Մի գուցէ ընդլայնուէր, կրակն ինտենսիւանար, բայց ոչինչ չանելու դէպքում այսպիսի ողբերգութիւնները ոչ միայն կը շարունակուեն, այլ ատրպէյճանական ագրեսիայի լայն ճանապարհ կը բացեն»:
Comments are closed.