ՀՄԸՄ-ի Կեդրոնական Վարչութեան Անդամ Քարլոս Սէֆէրեանի Կորուստը

ՀՄԸՄ-ի Կեդրոնական վարչութիւնը շաբաթ, 5 օգոստոս 2023-ին, խոր կսկիծով գուժեց մահը իր կազմի անդամներէն, Հարաւային Ամերիկայի շրջանէն Քարլոս Սէֆէրեանին:

Քարլոս Սէֆէրեան ծնած է 16 յուլիս 1954-ին, Պուէնոս Այրէս, Արժանթին: Նախակրթութիւնը ստացած է ՀՅԴ Խրիմեան վարժարանը: Փոքր տարիքէն անդամակցած է ՀՄԸՄ-ի Պուէնոս Այրէսի մասնաճիւղի սկաուտական շարքերուն եւ տարիներու ընթացքին տիրացած է պատասխանատու զանազան պաշտօններու:

1971-ին, ՀՄԸՄ-ի Պուէնոս Այրէսի պատուիրակութեան հետ, Քարլոս Սէֆէրեան մասնակցած է սկաուտական միջազգային 13-րդ Ճամպորիին, Ճափոն: 1978-ին ան մաս կազմած է ՀՄԸՄ-ի Պուէնոս Այրէսի մասնաճիւղի վարչութեան: 1981-1984 եղած է մասնաճիւղի «Արարատ» սկաուտական խումբի Խորհուրդի անդամ, իսկ 1984-1988` սկաուտական խումբի խմբապետ: 1986-ին, Քարլոս Սէֆէրեան գլխաւորած է շրջանի սկաուտական պատուիրակութիւնը` Համա-ՀՄԸՄ-ական Բ. բանակումին, Լոնտոն: 1986-1990 մաս կազմած է ՀՄԸՄ-ի Պուէնոս Այրէսի մասնաճիւղի վարչութեան:

1988-ին Քարլոս Սէֆէրեան մասնակցած է Համա-ՀՄԸՄ-ական սկաուտական խմբապետական երկրորդ համագումարին, Լոս Անճելըս: 1992-ին, իբրեւ Պուէնոս Այրէսի մասնաճիւղի սկաուտական խումբի Խորհուրդի անդամ, ան ստացած է «Wood badge»-ի աստիճան:

ՀՄԸՄ-ական գործունէութեան առընթեր, Քարլոս Սէֆէրեան ունեցած է ազգային-կուսակցական բեղուն ծառայութիւն: Ան մաս կազմած է ՀՅԴ «Արմենիա» երիտասարդական միութեան, որուն շարքերուն մէջ գաղափարական իր կազմաւորումը ստանալէ ետք` ան կատարած է դաշնակցականի իր երդումը եւ նետուած է կուսակցական կեանքի գործադաշտ: Եղած է ՀՅԴ «Ռոստոմ» կոմիտէի ներկայացուցիչ, իսկ աւելի ուշ` ՀՅԴ «Զաւարեան» կոմիտէի անդամ: Բազմիցս մաս կազմած է ՀՅԴ Հարաւային Ամերիկայի «Ահարոնեան» Կեդրոնական կոմիտէի կազմերուն: Այս տարի ան վերընտրուած է Կեդրոնական կոմիտէի անդամ:

Քարլոս Սէֆէրեան 2008-ին եղած է ՀՅԴ «Արմենիա» մշակութային ընկերակցութեան ատենապետ: Մաս կազմած է «Արմենիա» թերթի եւ ՀՕՄ-ի «Օննիկ Պոտուրեան-Յովհաննէս Տիարպէքիրեան» հանգստեան տան յանձնախումբերուն: ՀՄԸՄ-ի 9-րդ Պատգամաւորական ընդհանուր ժողովին, 2007-ին, ան կ՛ընտրուի ՀՄԸՄ-ի Կեդրոնական վարչութեան անդամ` քառամեայ շրջանի մը համար: 10-րդ Պատգամաւորական ընդհանուր ժողովին, 2011-ին, ան կը վերընտրուի քառամեայ երկրորդ շրջանի մը համար:

14 հոկտեմբեր 2019-ին, ՀՄԸՄ-ի 12-րդ Պատգամաւորական ընդհանուր ժողովի բացման պաշտօնական հանդիսութեան (Երեւան, Հայաստան), ի բացակայութեան, Քարլոս Սէֆէրեան կը պարգեւատրուի միութեան բարձրագոյն` «Արժանեաց» շքանշանով: Շքանշանը կը ստանձնէ զաւակը` Կարօ Սէֆէրեան:

ՀՄԸՄ-ի 12-րդ Պատգամաւորական ընդհանուր ժողովէն ընտրուած Կեդրոնական վարչութեան անդամ Արմանտօ Թորգոմեանի անակնկալ մահէն ետք, 26 նոյեմբեր 2021-ին, Քարլոս Սէֆէրեան կը նշանակուի Կեդրոնական վարչութեան անդամ, Հարաւային Ամերիկայի ներկայացուցիչի հանգամանքով:

Քարլոս Սէֆէրեան ամուսնացած է եւ բախտաւորուած չորս զաւակով` Մելինէ, Կարօ, Վիգէն եւ Արի: Անողոք հիւանդութեան դէմ կարճատեւ շրջան մը պայքարելէ ետք, Քարլոս Սէֆէրեան 69 տարեկանին կեանքէն անդարձ հեռացաւ, խոր սուգի մատնելով ՀՄԸՄ-ի մեծ ընտանիքը եւ յատկապէս Հարաւային Ամերիկայի շրջանը, որուն վերջին քառորդ դարու պատմութեան մէջ ան ձգեց իր անջնջելի հետքն ու դրոշմը:

Քարլոս Սէֆէրեանի յուղարկաւորութիւնը տեղի ունեցաւ կիրակի, 6 օգոստոսի երեկոյեան ժամը 8:00-ին (տեղական ժամանակով), Պուէնոս Այրէսի Ս. Գրիգոր Լուսաւորիչ Մայր տաճարին մէջ, իսկ թաղումը կը կատարուի երկուշաբթի, 7 օգոստոսի կէսօրէ առաջ ժամը 11:00-ին, բրիտանական գերեզմանատան մէջ:

Ցաւակցութիւնները կը փոխանցուին ե-նամակի հետեւեալ հասցէով` office@homenetmen.org

Փոխան ծաղկեպսակի նուիրատուութիւնները կը կատարուին ՀՄԸՄ-ի Կեդրոնական վարչութեան, ՀՕՄ-ի «Օննիկ Պոտուրեան-Յովհաննէս Տիարպէքիրեան» հանգստեան տան եւ «Արմենիա» թերթին: