Արցախի ժողովուրդի անվտանգութիւնը, բարօրութիւնը եւ զարգացումը բացարձակ առաջնահերթութիւններ են Դաշնակցութեան համար
Դաւիթ Իշխանեանի Արցախի Ազգային Ժողովի նախագահ ընտրուելու կապակցութեամբ «Ապառաժ»-ը իր հարցերն է ուղղել ՀՅԴ Բիւրոյի ներկայացուցիչ Յակոբ Տէր-Խաչատուրեանին.
—Արցախի Հանրապետութեան այս ծանր օրերին ՀՅԴ Բիւրոյի անդամ ընկեր Դաւիթ Իշխանեանը ընտրուեց ԱՀ ԱԺ նախագահ: Ի՞նչ ընթացք է ունեցել ընկեր Իշխանեանի առաջադրումն այս կարևորագոյն պաշտօնին և ի՞նչ հիմունքներով ՀՅԴ-ն ընդունեց այդ առաջարկը:
-ՀՅԴ Բիւրոն ստացաւ Արցախի ներկայ ու վերջին երկու նախագահներու համախորհուրդ առաջարկը, որպէսզի Դաշնակցութիւնը իր դերակատարութիւնը բարձրացնէ Արցախի պետական համակարգէն ներս՝ ընդառաջելով ընկեր Դաւիթ Իշխանեանի ԱՀ Ազգային Ժողովի նախագահ առաջադրելու իրենց խնդրանքին, բնական է, որ մենք ամենայն լրջութեամբ վերաբերուեցանք այդ առաջարկին, միաժամանակ ունենալով մտահոգութիւններ. քաջ կը գիտակցէինք այն ծանր պատասխանատվութեան բեռին, որուն դէմ հանդիման կը դրուէր մեր աշխարհատարած կազմակերպութիւնը: Գնահատեցինք նաեւ այն իրողութիւնը, որ Արցախի մեր քաղաքական գործընկերները անվերապահօրէն թիկունք կանգնեցան այսպիսի պատասխանատու պաշտօն ստանձնելու առաջարկին:
-Արդեօ՞ք որևէ պայմաննաւորուածութիւն կայացել է այս ընտրութեան նախօրէին:
-Այս առաջարկին կ’ընկերակցէր նաեւ խոստում, որ ԱՀ Ազգային Ժողովի դերն ու պատասխանատւութեան ծիրը պիտի ընդարձակուին եւ Խորհրդարանի նախագահը պիտի ունենայ վճռորոշ դերակատարութիւն քաղաքական հիմնական բոլոր գործընթացներումն մէջ, ի մասնաւորի Արցախի կարգավիճակի, անվտանգութեան, բանակցութիւններու եւ առհասարակ արտաքին յարաբերութիւններու ոլորտներուն մէջ: Ազգային ժողովը ԱՀի ժողովրդընտիր երկու սիւներէն մէկն է Նախագահական հաստատութեան հետ: Ան լիազօրուած է ներկայացնել ժողովուրդին կամքը եւ խօսիլ անոր անունէն: Այդ իսկ պատճառով անհրաժեշտ է, որ ԱԺ-ի Նախագահն ունենայ ազդու լիազօրութիւն, գործիքակազմ եւ քաղաքական հնարաւորութիւններ իր գործունէութինը արդիւնաւէտ կերպով կատարելու համար:
—Այս վճռորոշ օրերին ՀՅ Դաշնակցութեանը բաւականին ծանր ու պատասխանատու պաշտօն է վստահուել: Որո՞նք են լինելու ՀՅԴ հետագայ քայլերը:
-Արցախի ժողովուրդի անվտանգութիւնը, բարօրութիւնը եւ զարգացումը բացարձակ առաջնահերթութիւններ են Դաշնակցութեան համար եւ մենք երբէք չենք խուսափած պատասխանատւութեան մեր չափն ու կշիռը բարձրացնելու ի սպաս Արցախին, մանաւանդ օրհասական պահերուն: Այդ համոզումով ենք գտնուած Արցախեան գոյամարտի ակունքներուն մէջ առաջին օրերէն իսկ՝ պատերազմի դաշտին մէջ, համաշխարհային զօրաշարժ իրագործող հայ դատի բանակով եւ Արցախի զարգացման աշխատանքներու նուիրումով: Որովհետեւ Հ.Յ.Դ.-ի համար Արցախի հիմնահարցի կարգաւորումը ինքնորոշման իրաւունքի հիման վրայ, արցախահայութեան անվտանգութեան ապահովումը եւ ընկերա-տնտեսական ճգնաժամի վերացումը մեր համաշխարհային շարունակական աշխատանքի առանցքը կը կազմէին ցարդ եւ կը կազմեն այսօր:
Համաձայն գտնուելով ընկեր Դաւիթ Իշխանեանի որպէս ԱՀ Ազգային Ժողովի նախագահ առաջադրուելու առաջարկին, կ’ակնկալենք որ Արցախի քաղաքական բոլոր ոյժերը կը համախմբուին խորհրդարանին շուրջ, լաւագոյնս արտայայտելով իր ճակատագրին տէր Արցախահայութեան վճռակամ կամքը: Միաժամանակ խթան հանդիսանալով մեր աշխարհով մէկ տարուող պայքարին ի դէմ Ադրբեջանի եւ Թուրքիոյ հայատեաց եւ ցեղասպանական քաղաքականութեան:
Արցախը մինակ չի մարտնչիր, ան ունի ամբողջ հայութեան նեցուկը:
Մենք կը հաւատանք որ 2020ի պարտութիւնն ու այսօրուան ճգնաժամը ժամանակաւոր են եւ համազգային ճիգերով յաղթահարելու ենք ներքին թէ արտաքին ամէն խոչընդոտ:
Կը շնորհաւորենք ընկեր Դաւիթ Իշխանեանին իր նոր ու պատասխանատու պաշտօնին ընտրուելուն առիթով եւ կը մաղթենք բեղուն գործունէութիւն եւ լիակատար յաջողութիւն:
«Ապառաժ»
Comments are closed.