Արցախը թշնամի թուրքին զիջողը, այո՛, դաւաճան է. ՀՅԴ Ֆրանսայի «Նոր սերունդ»-ի բողոքագիրը՝ ՀՀ իշխանութիւններին

Նկատի ունենալով Հայաստանի եւ Արցախի անվտանգային լրջագոյն խնդիրները, Ադրբեջանի եւ Թուրքիայի հետ ՀՀ իշխանութիւնների բացայայտ եւ կուլիսային պայմանաւորուածութիւնների յարուցած վտանգներն ու հնարաւոր անդառնալի հետեւանքները` ՀՅԴ կառոյցը աշխարհի տարբեր անկիւններում նոյեմբերի 8-9-ը կազմակերպում է ակցիաներ` ի զօրակցութիւն Հայրենիքում ձեւաւորւող ազգային դիմադրութեան՝ ընդգծելով Հայրենիքի, Սփիւռքի միասնականութիւնը, համախմբուածութիւնը Հայաստանի, Արցախի եւ համայն հայութեան իրաւունքների պաշտպանութեան հարցում:

Երկուշաբթի` ժամը 18:00-ին, Փարիզում ՀՀ դեսպանատան դիմաց կայացած ակցիայից յետոյ, որի մասնակիցները հանդէս են եկել «Ասենք Ո՛Չ մեր հողերի յանձնմանը, Ո՛Չ նոր համաձայնագրի ստորագրմանը» և այլ կարգախօսներով, ՀՅԴ Ֆրանսայի «Նոր սերունդ» կազմակերպութեան ներկայացուցիչները Ֆրանսայում ՀՀ արտակարգ և լիազօր դեսպանի միջոցով բողոքագիր են ներկայացրել ՀՀ իշխանութիւններին։ Ստորև ներկայացնում ենք այն։

Յարգելի՛ տիկին Յասմիկ Տոլմաճեան՝ Ֆրանսիայում Հայաստանի Հանրապետութեան արտակարգ եւ լիազօր դեսպան

Խնդրում ենք սոյն բողոքագիրը փոխանցել, ուր որ հարկն է։

Կանխաւ շնորհակալութիւն:

ԲՈՂՈՔԱԳԻՐ՝ ՀԱՅԱՍՏԱՆԻ ՀԱՆՐԱՊԵՏՈՒԹԵԱՆ ԻՇԽԱՆՈՒԹԻՒՆՆԵՐԻՆ

2020-ի նոյեմբերի 9-ի կապիտուլյացիայի տխրահռչակ ստորագրութեան տարելիցին ընդառաջ՝ Փարիզում Հայաստանի դեսպանատան առջեւ հաւաքուած մեր հայրենակիցների եւ երիտասարդութեան անունից մեր բողոքը եւ ընդվզումն ենք յայտնում Նիկոլ Փաշինեանի վարած քաղաքականութեան դէմ: 

Սրանով յայտնում ենք, որ առանց համազգային համաձայնութեան ոչ ոք իրաւունք չունի տասը միլիոն հայութեան անունից ու նրա հաշուին միանձնեայ որոշումներ կայացնելու թշնամի թուրքի հետ, այսպէս կոչուած, որեւէ յարաբերութեան մասին: Հետեւաբար, վաղը՝  նոյեմբերի 9-ին, Մոսկուայում ստորագրուելիք որեւէ փաստաթուղթ (որ, ի դէպ, կապիտուլյացիայի շարունակութիւնը եւ այս անգամ վերջնականացումը կը լինի) մենք կը համարենք անվաւեր ու մերժելի: 

Եւ նկատի ունենալով թուրք-ադրբեջանական պանթուրանական քաղաքականութիւնը, որը շարունակ միտուած է քարտէզից Արցախն ու Հայաստանը ջնջելուն, եւ դրա դիմաց՝ ձեր «իշխանութեան» ընթացքը, որն առաջնորդւում է պարտուողական միակողմանի զիջումներով՝ կարծեցեալ խաղաղութեան հասնելու ցաւալի ինքնախաբեութեամբ, մենք, յանուն 44-օրեայ պատերազմի ընթացքում զոհուած մեր 5000 երիտասարդների, յանուն վիրաւոր ու անդամահատուած Արցախի Հանրապետութեան, յանուն մեր հայրենիքի ամբողջականութեան, որեւէ ճանապարհ, միջանցք չունենք տալու կամ որեւէ տարածք-հող չունենք զիջելու կամ յանձնելու թշնամուն, ընդհակառակը՝ հողային պահանջներ ունենք նոյն այդ թշնամուց: Այո՛, թուրքն ու ազերին հայութեան թշնամին են ու պիտի մնան՝ մինչեւ Հայ Դատի վերջնական յաղթանակ: Հայաստանի, Արցախի ու հայութեան անվտանգութիւնը եւ հողային ամբողջականութիւնը վեր են ամէն բանից: 

Առ այդ, դաշնակցական երիտասարդութիւնը որոշել է ոչ միայն չյարմարուել ներկայ յանձնուողական ու պարտուողական իրավիճակին, այլեւ, մահն աչքի առաջ, խօսքով եւ գործով պայքարել դրա դէմ ու վերականգնել խոցուած ազգային արժանապատուութիւնը

Մեր պայքարը անտեղիտալի է յանուն Արցախի եւ Հայաստանի հողային ամբողջականութեան ու անվտանգութեան: Արցախը թշնամի թուրքին զիջողը, այո՛, դաւաճան է: Թոյլ չենք տալու:

ՀՅԴ ՆՈՐ ՍԵՐՈՒՆԴ

8 նոյեմբերի 2021, Փարիզ

Leave a Comment

You must be logged in to post a comment.