Արա Շահվերտեան Եւ Գեղարդ Մանսուրեան Իրանահայութեան Ներկայացուցիչները` Իրանի Խորհրդարանին Մէջ

1 մարտին Իրանի մէջ կայացան Իսլամական խորհրդարանի 12-րդ գումարման եւ Առաջնորդութեան բանիմացներու խորհուրդի 6-րդ գումարման ընտրութիւնները:

Նախնական, ոչ պաշտօնական տուեալներով` ընտրութիւններուն մասնակցած է աւելի քան 25 միլիոն քաղաքացի:

Իրանահայութիւնը եւս իր իսլամ հայրենակիցներուն կողքին խուռներամ շարքերով մասնակցեցաւ ընտրութիւններուն:

Նախնական, ոչ պաշտօնական տուեալներով` 12-րդ գումարման խորհրդարանին մէջ Թեհրանի եւ Իրանի հիւսիսային շրջանի իրանահայութեան շահերը պիտի պաշտպանէ գործող պատգամաւոր Արա Շահվերտեանը, իսկ Սպահանի եւ Իրանի հարաւային շրջանի իրանահայութեանը` Գեղարդ Մանսուրեանը:

Թեհրանի եւ Իրանի հիւսիսային շրջանի ընտրութիւններուն մասնակցած 6193 ընտրողներէն 5097-ը (82,30%) իրենց ձայնը վստահած են Արա Շահվերտեանին: Ժոզեֆ Ամիրեանի օգտին քուէարկած են 596 ընտրող (9,62%), իսկ Սեւան Սոհրայիի օգտին` 424 ընտրող (6,85%): 76 քուէաթերթիկ նկատուած է անվաւեր:

Ինչ կը վերաբերի Սպահանի եւ Իրանի հարաւային շրջանին, ապա ընտրութիւններուն մասնակցած ընտրողներու 78%-ը իրենց ձայնը վստահած են Գեղարդ Մանսուրեանին, իսկ 22%-ը` Էմին Յովսէփին: