Ատրպէյճանն առաջնորդւում է ուժի իրաւունքով. պէտք է անվաւեր ճանաչել Կարսի պայմանագիրը, վերցնել Նախիջեւանը

Հիմնաւորուած չէ «Հայոց պատմութիւն» առարկայի փոփոխութեան մօտեցումը։ Մի քանի ուսուցիչների առաջարկով առարկայի փոփոխութիւնը միանգամից կառավարութեան օրակարգ տանելը եւ որոշման նախագիծ ներկայացնելը լուրջ մօտեցում չէ։ «ՓաստԻնֆոյի»եթերում ասել է ՀՅԴ Հայաստանի ԳՄ անդամ, պատմաբան, պ․գ․ դոկտոր, պրոֆեսոր Խաչատուր Ստեփանեանը։

Բանախօսի դիտարկմամբ, բովանդակային առումով մտավախութիւններ կան, քանի որ մի բան է՝ Հայոց պատմութիւնը, մէկ այլ բան՝ Հայաստանի պատմութիւնը։ Հայոց պատմութիւնը միայն Հայաստանի պատմութիւն չէ, այլեւ հայ ժողովրդի պատմութիւնն է։ Ինքնին Հայոց բառը արդէն իսկ Հայաստան է նշանակում։ Դատելով փորձից, մտավախութիւն կայ, որ կարող են պարտադրել, որ Հայաստանը 29,800 քառ․ քմ է եւ դա է ամբողջ Հայաստանի պատմութիւնը։ Դրան գումարած, կարող է սահմանազատում տեղի ունենալ եւ տարածքը աւելի փոքրանայ։

Պրոֆեսորը կարծում է, որ մեզ համար վիրաւորական է, երբ թշնամական երկիրը ստիպում է մեզ Սահմանադրութիւն փոխել։ Պէտք է խոստովանել, որ անկախութեան հռչակագիրը մեր վերջին 32 տարուայ պատմութեան կարեւորագոյն փաստաթուղթն է։ Այս փաստաթղթից շեղուելը, նշանակում է շրջել պատմութեան ընթացքը։ Ատրպէյճանի պահանջները բաւարարելով, փաստօրէն, թաղում ենք մեր պետականութիւնը։

Պատմաբանի խօսքերով, Ատրպէյճանի նախագահը յայտարարել է, որ չկայ իրաւունքի ուժ, կայ ուժի իրաւունք։ Սա պատահական յայտարարութիւն չէր։ Որտեղ որ Ատրպէյճանին ձեռնտու է իրաւունքի ուժը՝ կ’առաջնորդուի իրաւունքի ուժով, որտեղ որ ձեռնտու է ուժի իրաւունքը՝ կ’առաջնորդուի ուժի իրաւունքով։ Սահմանազատման ընթացքում Ատրպէյճանն առաջնորդուելու է ուժի իրաւունքով, քանի որ 1918-20 թթ․ քարտէզներով Ատրպէյճանի սահման գոյութիւն չունէր եւ Արցախը պաշտօնապէս չի եղել Ատրպէյճանի կազմում։

«Կարսի պայմանագրով սահմանազատում անելը մեզ կը զրկի Նախիջեւանին տիրելու իրաւական հիմքից, քանի որ ցանկացած պահի կարող ենք անվաւեր ճանաչել Կարսի պայմանագիրը եւ վերցնել Նախիջեւանը», ասել է Խ․ Ստեփանեանը։

Մանրամասները՝ տեսանիւթում.