Այս իշխանութեան վարած քաղաքականութիւնը տանում է Հայաստանի անկախութեան եւ ինքնիշխանութեան վերացման

Նիկոլ Փաշինեանը Փետրուարի 15-ն Կառավարութեան նիստի ուղիղ եթերում յայտարարեց, որ այն, ինչ հայկական կողմն առաջարկում է Ատրպէյճանին, մերժւում է, եւ Ատրպէյճանը շարունակում է վարել «այն, ինչ ուզում եմ, տուէք բանակցային եղանակով, հակառակ դէպքում՝ ես դա կը վերցնեմ պատերազմով» քաղաքականութիւնը։

«Մեր վերլուծութիւնը ցոյց է տալիս, որ սրա համար կարող է լինել մէկ պատճառ: Ռազմական գործողութիւններ սկսել սահմանի որոշ հատուածներում՝ հետագայում ռազմական էսկալացիան Հայաստանի դէմ լայնածաւալ պատերազմի վերածելու հեռանկարով», ասաց Փաշինեանը։

168 TV-ի «Ռեվիւ» հաղորդաշարի եթերում ՀՅԴ անդամ, ԱԺ «Հայաստան» խմբակցութեան պատգամաւոր Արթուր Խաչատրեանը նորութիւն չհամարեց այն, որ Ալիեւը պատրաստւում է Հայաստանի դէմ պատերազմի՝ ի հեճուկս Հայաստանի իշխանութիւնների կողմից հնչող խաղաղասիրական թեզերի։

«Այնպէս որ, Փաշինեանի այսօրուայ ասածի մէջ միակ դրական բանն այն է, որ կրկնում է այն, ինչը վաղուց ասել է ընդդիմութիւնը։ Ասել ենք՝ Ալիեւին Փաշինեանը չի՛ կարողանալու պարտադրել, այսպէս կոչուած, խաղաղութեան օրակարգ։ Փաշինեանը ձախողել է իր խաղաղութեան օրակարգը, դրանից յետոյ Արցախն է յանձնել՝ «փոքրը տամ, մեծը պահեմ» տրամաբանութեամբ, եւ հիմա արդէն Հայաստանը չի կարողանում պահել», ասաց Խաչատրեանը։

Անդրադառնալով Փաշինեանի այն դիտարկման, որ միեւնոյն ժամանակ ՀՀ իշխանութիւնն ամուր կանգնած է ՀՀ բոլոր լեգիտիմ շահերի պաշտպանութեան դիրքերում, եւ այդ լեգիտիմ շահերն են՝ ՀՀ տարածքային ամբողջականութեան, ինքնիշխանութեան պաշտպանութիւնը, Արթուր Խաչատրեանը Փաշինեանին յիշեցրեց՝ ատրպէյճանցիները Հայաստանի տարածքի ներսից են արդէն սպանում հայ զինուորին, ի՞նչ տարածքային ամբողջականութեան մասին է խօսում։

«Աւելին, թուրքը Հայաստանի տարածքից սպանել է 4 երկրապահի, եւ թուրքին քշելու փոխարէն՝ Փաշինեանն ասում է՝ պէտք է պարզեմ, թէ այդ ո՞ր հայ զինուորն է կրակել Հայաստանն բռնագրաւած ատրպէյճանցու վրայ», նկատեց ԱԺ «Հայաստան» խմբակցութեան պատգամաւորը՝ ընդգծելով՝ զուր է Հայաստանի իշխանութեան վախուորած քաղաքականութիւնը, թէ ատրպէյճանցիներին պէտք է չպատասխանել, որ պատերազմ չսկսուի։

«Ատրպէյճանին եթէ պէտք լինի պատերազմ, ինքը դա կը սկսի՝ անկախ Փաշինեանի վարած քաղաքականութիւնից», շեշտեց նա՝ հարցնելով՝ իսկ ի՞նչ լուծում է առաջարկում Հայաստանի իշխանութիւնը՝ սպասուող պատերազմին ընդառաջ։

«Փաշինեանը նստել է ճոխ թախտին, սպասում է բախտին, մտածում է՝ մէկը կը գայ, իրեն կը փրկի։ Ասում է՝ ես չեմ կարողանում, գուցէ մէկն ինձ օգնի, բայց ո՞վ է օգնելու. եւրոպացիները զուսպ են, ամերիկացիներն ասում են՝ գնացէ՛ք, ինչ ուզում էք՝ արէք երկկողմ ֆորմատով։ ՆԱՏՕ-ն Նիկոլ Փաշինեանին չի պատրաստւում ընդունել։ Փաշինեանը, խոշոր հաշուով, ձախողել է մեր յարաբերութիւնները բոլորի հետ, ձեռք չի բերել գէթ մէկ դաշնակից։ Ինքն ամէն ինչ ձախողել է։ Փաշինեանը վտանգաւոր է Հայաստանի համար», ասաց Արթուր Խաչատրեանը՝ յաւելելով՝ Հայաստանի անկախութեան եւ ինքնիշխանութեան վերացմանն է տանում այս իշխանութեան վարած քաղաքականութիւնը։

Աղաւնի Սուքիասեան

Հարցազրոյցի մանրամասները՝ տեսանիւթում՝