Ամերիկացի Խումբ Մը Քոնկրեսականներ Դարձեալ Ներկայացուցիչներու Տան Ներկայացուցած Են Հայոց Ցեղասպանութեան Կրթական Հրամանագիրը

Միացեալ Նահանգներու Քոնկրեսի ստորին պալատի անդամ խումբ մը քոնկրեսականներ անգամ մը եւս Ներկայացուցիչներու տան ներկայացուցած են Հայոց ցեղասպանութեան կրթական հրամանագիրը` հիմնուելով այն իրողութեան վրայ, որ Միացեալ Նահանգներու Քոնկրեսն ու Միացեալ Նահանգներու նախագահը պաշտօնապէս ճանչցած են զայն: Այս մասին հաղորդեց Ամերիկայի Հայ դատի յանձնախումբը:

Հրամանագիրը դարձեալ ներկայացնելու նախաձեռնութիւնը կատարած են քոնկրեսականներ Աննա Էշուն, Տէյվիտ Վալատաոն, Թետ Լիուն եւ Կաս Պիլիրաքիսը: Միջոցը կը նախատեսէ ֆինանսաւորել Քոնկրեսի գրադարանի կրթական ծրագիրները Հայոց ցեղասպանութեան պատմութեան, ատկէ քաղուած դասերու, հետեւանքներու եւ ատոր համար ներկայիս վճարուող գինին վերաբերեալ:

Այս օրինագիծով կը նախատեսուի 5 տարուան ընթացքին 10 միլիոն տոլարի ֆինանսաւորում տրամադրել Քոնկրեսի գրադարանին` ամերիկացիները կրթելու 1915-1923 թուականներուն միլիոնաւոր հայերու, յոյներու, ասորիներու, քաղդէացիներու, սուրիացիներու, արամէացիներու, մարոնիներու եւ այլ քրիստոնեաներու` Օսմանեան Թուրքիոյ կողմէ համակարգուած եւ կանխամտածուած, պետականօրէն հովանաւորուող զանգուածային սպանութիւններու, ազգային մշակոյթի իւրացման կամ ոչնչացման եւ աքսորի մասին:

Հայոց ցեղասպանութեան կրթական հրամանագիրը կը փորձէ հակազդել այն քարոզչութեան, որ կը պնդէ, որ, իբրեւ թէ, «1915-1923 թուականներուն Օսմանեան Թուրքիոյ կողմէ միլիոնաւոր քրիստոնեաներու համակարգուած զանգուածային սպանութիւնները տեղի չեն ունեցած»:

«Որովհետեւ Ազրպէյճանը Թուրքիոյ աջակցութեամբ բացայայտօրէն կը ձգտի աւարտին հասցնել Հայոց ցեղասպանութիւնը, ամերիկացի դպրոցականներուն աւելի քան երբեւէ անհրաժեշտ է դասեր քաղել ամբողջ մարդկութեան դէմ տակաւին անպատիժ, տակաւին շարունակուող յանցագործութենէն», կը յայտնէ Ամերիկայի Հայ դատի յանձնախումբի գործադիր տնօրէն Արամ Համբարեան: