Ճորճ Թոտորովիչ՝ Սերպիոյ Մէջ Հայկական Ծագումով Առաջին Երեսփոխանը

«Քորոնա» ժահրի համաճարակին յարաբերական մեղմացումէն ետք, Եւրոպայի տարածքին խորհրդարանական առաջին ընտրութիւնները տեղի ունեցան Սերպիոյ մէջ: Կիրակի, 21 Յունիսի ընտրութիւններուն իշխող «Սերպիոյ յառաջդիմական կուսակացութեան» (SNS) ընտրացանկէն երեսփոխան ընտրուեցաւ հայկական ծագումով 29ամեայ Ճորճ Թոտորովիչ:

Յառաջդիմականները տիրացան Սերպիոյ խորհրդարանի ընդհանուր 250 աթոռներէն 189ին:

Ճորճին հայրը սերպ է, մայրը՝ հայուհի, Կամիլա Մուրադեան, որ 1990ին ամուսնանալով՝ Երեւանէն Պելկրատ փոխադրուած է: Ան իր երեք զաւակներուն ալ տուած է հայեցի դաստիարակութիւն: Ճորճը կը տիրապետէ հայերէնին:

Ան արդէն կ՛աշխատի Սերպիոյ խորհրդարանի միջազգային յարաբերութիւններու բաժինին մէջ եւ ամէն կերպով կ՛աջակցի Հայաստանի եւ Արցախի հետ Սերպիոյ յարաբերութիւններու զարգացման: Ան երբեք չէ թաքցուցած իր հայկական ծագումը եւ խորհրդարանին մէջ յաճախ շեշտած է, որ ինք հայ է:

Leave a Comment

You must be logged in to post a comment.