ՀԱՆՐԱՅԻՆ ՀԵՌՈՒՍՏԱԸՆԿԵՐՈՒԹԵԱՆ ՀԱՐՑԱԶՐՈՅՑԸ ՀՅԴ ԲԻՒՐՈՅԻ ՆԵՐԿԱՅԱՑՈՒՑԻՉ ՀՐԱՆԴ ՄԱՐԳԱՐԵԱՆԻ ՀԵ

«Անհրաժեշտ Են Հիմնական Փոփոխութիւններ»

 

Վարեց՝ ԱԳՆԵՍԱ ԽԱՄՈՅԵԱՆ

 

Հանրային հեռուստաընկերութեան «Օրակարգից Դուրս» հաղորդաշարի հիւրն է ՀՅԴ Բիւրոյի ներկայացուցիչ Հրանտ Մարգարեանը։

 

ԱԳՆԵՍԱ ԽԱՄՈՅԵԱՆ.- Այս օրերի զարգացումների եւ հանգուցալուծման մասին զրուցելու ենք ՀՅԴ Բիւրոյի ներկայացուցիչ Հրանտ Մարգարեանի հետ: Պարոն Մարգարեան, արդէն որերորդ օրն է շարունակւում են Նիկոլ Փաշինեանի եւ նրա կողմնակիցների բողոքի ակցիաները (գործողութիւնները-Խմբ.): Ին՞չ է կատարւում Երեւանի փողոցներում:

ՀՐԱՆԴ ՄԱՐԳԱՐԵԱՆ.- Ժողովրդի մի մասը փողոց է դուրս եկել եւ դա վկայութիւնն է այն բանի, որ երկրում առկայ են դժգոհութիւններ: Մենք գիտենք, որ դժգոհութիւններ կան: Դրանք վերացնելու առումով, մենք արդէն նախաձեռնութիւններ ունէինք, նոյնիսկ դրա հետ կապուած գնացել էինք համագործակցութեան Հանրապետական կուսակցութեան հետ եւ ստորագրել համապատասխան համաձայնագիր, միասին աշխատելու, այդ պատճառները վերացնելու համար: Սա առաջին փաստն է, որ արձանագրւում է:

Երկրորդ փաստն այն է, որ մեր ճիգն ու ջանքը բաւարար արդիւնք չէին տուել, դանդաղ էր ընթացքը եւ հէնց դա պատճառ դարձաւ, որ ժողովուրդը առիթն օգտագործի ընտրութիւնների հարցում եւ դուրս գայ փողոց: Մինչեւ այստեղ դրական է: Այն, որ փողոցում չկան բախումներ, տհաճ երեւոյթներ, ժողովուրդը իր պարզ բողոքն ու դժգոհութիւնն է արտայայտում, դրական է: Հարցն այն է, որ մենք կարողանանք այս ամէնից դրական եզրայանգումներ անել: Շատ անգամներ դա տեսել են Հայաստանում. Ստեփան Դէմիրճեանը, Րաֆֆի Յովհաննիսեանը, Սասնայ ծռերը… Ամէն անգամ Դաշնակցութիւնը հրապարակ է իջել միջնորդութիւններով, որ կարողանայ ստեղծուած վիճակը օգտագործել երկրում հիմնական հարցեր լուծելու համար: Յաճախ ուժերը առաջնորդուել են ամէն ինչ կամ ոչինչ սկզբունքով եւ ոչ մի կողմը դրանից չի շահել: Այս անգամ, յոյս ունեմ, որ Դաշնակցութեան երկխօսութեան, բանավէճի նախաձեռնութիւնը, հարթակ ստեղծելու՝ արդիւնք կ՛ունենայ, որի մասին նշւում է նաեւ մեր յայտարարութեան մէջ: Փաստ է, որ մենք կարող ենք այսօր, այս ստեղծուած իրավիճակում ամենաճիշդ արդիւնքը քաղել:

ԱԳՆԵՍԱ ԽԱՄՈՅԵԱՆ.- Ստեղծել քաղաքական խորհրդածութիւնների հարթա՞կ:

ՀՐԱՆԴ ՄԱՐԳԱՐԵԱՆ.- Այո, արդէն յայտարարութիւնը հրապարակուել է, մենք սկսել ենք խօսել բոլոր ուժերի հետ, որպէսզի բոլորին համոզենք, որ այդ հարթակի շուրջ, որտեղ կոնսենսուսով (համախորհուրդ) պէտք է որոշում կայացուի, պէտք է բոլոր հարցերը քննութեան նիւթ դառնան: Յոյս ունեմ, որ սա մենք կը յաջողենք եւ այս վիճակը, որ ստեղծուել է դրսում, դրանից կարողանանք առաւելագոյն օգուտ քաղել: Հարցն այն է, որ մեր երկիրը շատ նուրբ իրավիճակում է, արտաքին սպառնալիքը իրական սպառնալիք է եւ ամէն վայրկեան կարող է վերածուել իրական վտանգի: Մեր երկիրը դիւրաբեկ է, դրա համար բոլորս պէտք է շատ զգոյշ լինենք: Պէտք է հասկանանք, որ մեր երկիրը, մեր ժողովուրդը մեղք են: Չպէտք է թողնենք, որ այս ամէնը սխալ ուղղութեամբ ընթանայ, երկիրն ու ժողովրդին տանի տկարացման: Ընդհակառակը, այս ամէնը պէտք է տանենք մի ուղիով, որից երկիրն ու ժողովուրդը հզօրացած, ուժեղացած դուրս կը գան: Սա է մեր առաջարկութիւնը: Դժգոհութեան պատճառները պէտք է վերացուեն, պէտք է հիմնական փոփոխութիւններ արուեն:

 

ԱԳՆԵՍԱ ԽԱՄՈՅԵԱՆ.- Այսինքն, այստեղ անելի՞ք ունեն իշխանութիւնները:

ՀՐԱՆԴ ՄԱՐԳԱՐԵԱՆ.- Բնականաբար, իշխանութիւնն էլ ունի, ընդդիմութիւնն էլ:

 

ԱԳՆԵՍԱ ԽԱՄՈՅԵԱՆ.- Ով ի՞նչ պէտք է անի. շատ յստակ:

ՀՐԱՆԴ ՄԱՐԳԱՐԵԱՆ.- Իշխանութիւնը պէտք է կարողանայ հասկանալ, որ առկայ է դժգոհութիւն եւ պահանջ կայ, որ ինչ որ երեւոյթներ արագ տեմպերով սրբագրուեն երկրում, որ պատրաստ լինի զիջումներ անելու, նաեւ ընդդիմութեան դերակատարութիւնը հզօրացնելու իմաստով:

ԱԳՆԵՍԱ ԽԱՄՈՅԵԱՆ.- Լծակնե՞ր տալու:

ՀՐԱՆԴ ՄԱՐԳԱՐԵԱՆ.- Այո: Ընդդիմութիւնն էլ պէտք է հասկանայ, որ չի կարող առաջնորդուել ամէն ինչ կամ ոչինչ սկզբունքով: Այս շարժումից, այս անգամ, պէտք է առաւելագոյն արդիւնք ստանանք: Ընդդիմութիւնն էլ պէտք է հասկանայ, որ այս շարժումը պէտք է առաջ տանի ժողովրդավարական սկզբունքներին համահունչ: Ինչպէս որ մինչեւ օրս եղել է: Նա չպէտք է փորձի ուրիշներին կամք պարտադրել: Պէտք է փորձի երկրի, ժողովրդի շահով առաջնորդուել եւ առաւելագոյնը ստանայ, նրանից ինչ կարող է ստանալ: Կարծում եմ այս երկխօսութիւնը կարեւոր է , անհրաժեշտ է, որ մենք ի սկզբանէ համոզուենք, որ առանց նախապայմանների ենք խօսելու, որ ամէնքս համոզուած պէտք է լինենք, որ կոնսենսուսով խօսակցութիւնը կ՛աւարտուի: Ես վստահ եմ, որ կայ դրա հնարաւորութիւնը: Վստահ եմ, քանի որ մեր երկիրը, մեր ժողովուրդը դրա անհրաժեշտութիւնն ունի: Մենք չպէտք է թողնենք, որ երկիրն ու ժողովուրդը կոտրուեն, երկիրը կոտրուի՝ արտաքին վտանգների առումով, դրա համար ժողովուրդը այս անգամ չպէտք է ձախողուի: Այս անգամ ժողովուրդը պէտք է արդիւնք ստանայ: Եւ այդ արդիւնքի համար պէտք է բծախնդիր լինենք բոլորս: Բոլորս անխտիր՝ սկսած իշխանութիւնից, վերջացրած ընդդիմութեամբ:

 

ԱԳՆԵՍԱ ԽԱՄՈՅԵԱՆ.- Պարոն Մարգարեան բողոքող ցուցարարները պայքարում են Սերժ Սարգսեանի վարչապետութեան դէմ: Գոնէ առաջին օրերին կոչերն այդպիսին էին: Այսօր, ի՞նչ է պատրաստ իշխանութիւնը տալ բողոքողներին: Եւ ի՞նչ են պահանջում Նիկոլ Փաշինեանը եւ նրա կողմնակիցները:

ՀՐԱՆԴ ՄԱՐԳԱՐԵԱՆ.- Ի՞նչ են պահանջում, իբրեւ երեւոյթ, որ արծարծում են, տարբեր է: Տարբեր է եթէ ժողովրդին տոն տուող պատճառները բնականաբար ուրիշ են. երկրի մէջ առկայ կոռուպցիան է, մենաշնորհներն են, անարդարութեան երեւոյթները, հովանաւորչութիւնը, ամենաթողութիւնը: Նմանատիպ երեւոյթներն են, որ պատճառ է դառնում ժողովրդի դժգոհութեան: Եւ այդ դժգոհութիւնը որոշների մօտ արտայայտւում է վարչապետին մերժելու պահանջով: Սակայն բուն հարցը այն երեւոյթներն են, որոնք պատճառ են հանդիսացել այդ տեսակ պահանջ ձեւաւորուելուն: Այդ բուն երեւոյթներն է անհրաժեշտ սրբագրել:

 

ԱԳՆԵՍԱ ԽԱՄՈՅԵԱՆ.- Այսինքն, խնդիրը համակարգի եւ ոչ անձերի մէջ տեսնելն է:

ՀՐԱՆԴ ՄԱՐԳԱՐԵԱՆ.- Վստահ եմ որ այդպէս է: Ասեմ, մենք ինչ լուծում ենք առաջարկում: Մենք ընդունել ենք այս սահմանադրութիւնը: Այս սահմանադրութեան հիմքի վրայ խորհրդարանական ընտրութիւններն են կազմակերպուել, այս սահմանադրութեան հիմքի վրայ ձեւաւորուել է այս խորհրդարանը, սահմանադրութեան հիմքի վրայ խորհրդարանը ընտրել է նախագահ եւ ունեցել վարչապետ: Այս առումով մենք ելք չունենք: Ելքը կամ ցնցումներն են՝ երկրում անկայուն իրավիճակ, քաոս ստեղծելը, որը կը կոտրի երկիրը եւ կամ դրանց պատճառները վերացնելը, որպէսզի ժողովուրդը սրա միջից շահող դուրս գայ, եւ երկիրն առաջ գնայ: Մեր բոլոր միջամտութիւնները, որ արել ենք այս նկատառումով են եղել: Այսօր էլ նոյնն ենք անում: Կոալիցիա ենք կազմել, որ այդ պատճառները վերացնենք: Այսօր փողոցում կայ մէկ պահանջ, որ աւելի է հզօրացնում մեր դիրքերը՝ պատճառները վերացնելու մեր ջանքերը: Մենք այդ առումով ենք ուզում շահել՝ ցոյց տալ ելք, ճանապարհ: Եթէ անձ կը փոխուի, հանրապետականը մէկ ուրիշ թեկնածուի ներկայացնի, նրան էլ մի հազար հոգի չընդունեն, դա ելք չի, դա մեզ տեղ չի հասցնի: Պէտք է պատճառները վերանան, վերանան այնպէս, որ ոչ ոք չկարողանայ այս բացասական երեւոյթների վրայ իշխանութիւն ձեւաւորել:

 

ԱԳՆԵՍԱ ԽԱՄՈՅԵԱՆ.- Պարոն Մարգարեան ստեղծուած իրավիճակում ամենամեծ անելիքը ո՞ւմն է, այս կողմինը, թէ այն կողմինը:

ՀՐԱՆԴ ՄԱՐԳԱՐԵԱՆ.- Իշխանութեանն է: Իշխանութիւնն աւելի մեծ անելիք ունի:

 

ԱԳՆԵՍԱ ԽԱՄՈՅԵԱՆ.- Երբ ասում էք իշխանութիւն, նաեւ ձե՞զ նկատի ունէք եւ Հանրապետականին:

ՀՐԱՆԴ ՄԱՐԳԱՐԵԱՆ.- Այո: Մեր չափով նախաձեռնութիւն արդէն ունեցել ենք: Բնականաբար: Եւ նաեւ ընդդիմութիւն կամ, այսպէս ասած, ժողովրդային դժգոհութիւնն այսօր մարմնաւորող ուժն է, որը հրապարակի վրայ է:

 

ԱԳՆԵՍԱ ԽԱՄՈՅԵԱՆ.- Իսկ Նիկոլ Փաշինեանի խմբակցութեան գործընկերնե՞րը:

ՀՐԱՆԴ ՄԱՐԳԱՐԵԱՆ.- Կարծում են նրանք իրարից տարբերւում են միայն այնքանով, որ մէկը չի ընդունում միւսի այս պահի գործունէութեան ձեւը: Թէ չէ ըստ էութեան նրանք շատ էլ չեն տարբերւում իրարից: Սակայն մենք ասում ենք, որ խորհրդակցութեան սեղանի շուրջ պէտք է հաւաքուենք խորհրդարանական բոլոր ուժերը պէտք է լինեն: «Ելք»ը նաեւ այդ երեք կուսակցութիւնների ղեկավարութեամբ պէտք է ներկայութիւն ունենայ, որովհետեւ այս պահին այնտեղ չկայ միասնականութիւն: Մենք ուզում ենք տալ առաւելութիւն, որ երեք + երեք ձեւաչափով խորհրդակցութեան սեղան ձեւաւորուի, որտեղ կարողանանք ելք գտնել երկրում առկայ դժուարութիւնները յաղթահարելու հարցում:

 

ԱԳՆԵՍԱ ԽԱՄՈՅԵԱՆ.- Պարոն Մարգարեան, շատ անկեղծ, կարծում էք Նիկոլ Փաշինեանը պատրա՞ստ է ընդունել ձեր մեկնած ձեռքը , քաղաքական խորհրդակցութիւնների հարթակ էք առաջարկում ստեղծել:

ՀՐԱՆԴ ՄԱՐԳԱՐԵԱՆ.- Այնքանով, որ ես հետեւել եմ այս քաղաքական գործչի գործունէութեանն ու տրամաբանութեանը, կարծում եմ ինքն այնքան խելացի է, հասկանալու համար, որ այս ճանապարհը թէ՛ իր համար է ելք, թէ՛ երկրի եւ թէ բոլորի: Այլ ճանապարհը իր մօտ… Ինչ որ իմաստով գուցէ յոյս ունենայ համընդհանուր յեղափոխութեան, բայց ես ուզում եմ, որ այն վիճակը, որ Փաշինեանը ստեղծել է երկիրը կարողանայ դրանից օգտուել, պատճառ դառնայ, որ երկիրը դրանով կարողանայ թռիչքային քայլ անել դէպի առաջ, այդ ձեռքբերումն ինքն ունենայ: Նախապէս ասեցի, «Սասնայ Ծռեր», Րաֆֆի Յովհաննիսեան, Ստեփան Դէմիրճեան, ԼՏՊ, չունեցան այդքան խելացիութիւն, համարձակութիւն եւ ճկունութիւն, որպէսզի դրան վերածեն այն ձեռքբերումը, որ ունեցել էին հրապարակի վրայ, փողոցում: Դա չկարողացան վերածել իրական առաւելութեան՝ երկրի եւ ժողովրդի համար: Յոյս ունեմ, որ Նիկոլ Փաշինեանն այն քաղաքական գործիչն է, որ դա կ՛անի: Դա կ՛անի եւ դրանով ինքը բարձր տեղ կը նուաճի Հայաստանի քաղաքական դաշտում:

 

ԱԳՆԵՍԱ ԽԱՄՈՅԵԱՆ.- Խանգարողներ կա՞ն, կը լինե՞ն:

ՀՐԱՆԴ ՄԱՐԳԱՐԵԱՆ.- Բնականաբար, խանգարողներ միշտ էլ կան: Բոլոր ուժերի կողքին էլ խանգարողներ կան. մէկը խորհուրդ է տալիս մի զիջիր, ջարդիր գնա առաջ, միւսը՝ ջարդիր, գնա իշխանութիւնը վերցրու… նման խորհրդատուներ կարող են լինել, կարող են լինել նաեւ մութ նպատակներ հետապնդող խորհրդատուներ, դրանք կարեւոր չեն, կարեւորը քաղաքական անձն է, ով եթէ վերցրել է առաջնորդի դրօշը պէտք է կարողանայ ժողովրդին ցոյց տալ խոհեմութիւն, ցոյց տալ, որ ինքը չունի անձնական շահ, անձնական խնդիր երկրի թիւ 1ը դառնալու, այլ ունի խնդիր երկրի մէջ հարց լուծելու եւ ժողովրդին բարեկարգ վիճակի հասցնելու: Դա իրեն առաջ հեռանկար կը բացի աւելի առաջ գնալու, աւելի մեծ ազդեցութիւն ունենալու Հայաստանի քաղաքական կեանքում:

 

ԱԳՆԵՍԱ ԽԱՄՈՅԵԱՆ.- Պարոն Մարգարեան, Դաշնակցութիւնը առաջարկութիւն է արել, բայց միւս կողմից Դաշնակցութեանը քննադատողների պակաս, յատկապէս այս օրերին, կարծես չի զգացւում սոցիալական ցանցերում եւ ուրեմն կարծում էք այս ֆոնին ընդունելի կը լինի՞ եւ կը կարողանա՞ք կեանքի կոչել ձեր այս առաջարկութիւնը:

ՀՐԱՆԴ ՄԱՐԳԱՐԵԱՆ.- Այն քաղաքական ուժը, որը երբեւէ կարող է մտածել, թէ ինքը կարող է հակառակորդ չունենալ, նշանակում է պէտք է գոյութիւն չունենայ: Այն ուժը որ գոյութիւն չունի, նաեւ հակառակորդ չունի:

Դաշնակցութիւնն իր կողքին միշտ ունեցել է հակադաշնակցութիւն: Դրան մենք ընտելացել ենք մեր ծննդեան օրից: Դա մեզ համար զարմանալի չի: Այսօր սակայն, այդ հարցի մէջ նոր նրբերանգներ են ի յայտ եկել: Կայ մի շերտ, որը քաղաքականացած չի եւ չի հասկանում, չի կարողանում ընկալել թէ Դաշնակցութիւնը ինչ է անում, եւ ինչ է ուզում անել, ուր է գնում, ինչ ռազմավարութիւն, դերակատարութիւն ունի:

 

ԱԳՆԵՍԱ ԽԱՄՈՅԵԱՆ.- Դա միայն ի՞ր խնդիրն է, թէ նաեւ Դաշնակցութեան:

ՀՐԱՆԴ ՄԱՐԳԱՐԵԱՆ.- Բնականաբար Դաշնակցութեան խնդիրն է: Բայց կան մարդիկ՝ նաեւ մեր մէջ, մեր շուրջը, մեզ հարազատ մարդիկ, որ մեր շուրջն են, բայց աւելի շատ զգացական կապերով են մեզ կապուած, եւ ոչ քաղաքական այն ճանաչողութեամբ ու գիտակցութեամբ, որ քաղաքական կուսակցութիւնը պէտք է ունենայ: Դրանք մարդիկ են, որոնք Դաշնակցութեանն այնքան են սիրում, որ ուզում են, որ Դաշնակցութիւնը միշտ ծափահարուի: Նրանք չեն կարողանում հաշտուել այն մտքի հետ, որ Դաշնակցութիւնը քաղաքական կուսակցութիւն է՝ ունի իր ուղին, իր ռազմավարութիւնը, որը կարող է նաեւ ունենալ քննադատողներ, հակառակորդներ: Այսինքն միշտ ծափահարուել չի կարող Դաշնակցութիւնը եւ դա ողբերգութիւն չի: Կարեւորն այն է, որ մեզ կարողանան հասկանալ այնպէս, որ մենք միշտ աշխատում ենք Հայաստանի եւ հայ ժողովրդի շահերից ելնելով: Ծափահարել-չծափահարուելու հետ մենք հաշտ ենք, դա երկրորդական է, մի օր կարող ես ծափահարուել, մի օր՝ ոչ: Դա չէ, որ կարեւոր է: Կարեւրորը՝ որ այն ինչ Դաշնակցոյթունն անում է անկեղծ է անում, Հայաստանի ու հայ ժողովրդի զարգացման լիարժէք հնարաւորութեան համար է անում:

 

ԱԳՆԵՍԱ ԽԱՄՈՅԵԱՆ.- Պարոն Մարգարեան, ոստիկանների գործողութիւններն այս օրերին համաչա՞փ էին եւ ցուցարարների արարքներում քայլերում կա՞յ մի բան, որ ձեզ համար անընդունելի է:

ՀՐԱՆԴ ՄԱՐԳԱՐԵԱՆ.- Երբ այդքան մեծ թուով ժողովուրդ է դուրս գալիս, շատ դժուար է կարգ ու կանոնի մէջ պահել բոլորին: Կը լինեն մարդիկ, որոնք ընդհանուր կանոներից դուրս կը գան: Այսօր ցոյցերի հինգերորդ օրն է, նկատելի է, որ ցուցարարների կողմից նուազագոյն հակաօրինական կամ ժողովրդավարութեան դէմ դէպքեր են եղել, որի համար ես ուրախ եմ նաեւ ողջունում եմ, որ այս ընթացքը շարունակուի, որովհետեւ բախումը ոչ միայն ցանկալի չի, այլեւ դէմ է ժողովրդային շարժման նպատակներին, երկրի կայունութեանը, հեղինակութեանը:

Երկրորդ՝ ոստիկանութիւնն է, որ մինչեւ այս պահը կարողացել է մնալ պարկեշտութեան, չափի, զսպուածութեան սահմաններում, որի համար ես դարձեալ ուրախ եմ, եւ ուզում եմ, որ այս ընթացքը շարունակուի: Մենք բախումը պէտք է բացառենք:

 

ԱԳՆԵՍԱ ԽԱՄՈՅԵԱՆ.- Եւ շարունակուի մինչեւ որտե՞ղ պրն. Մարգարեան: Անկախ մեր ցանկութիւններից, ի՞նչ ելք էք կանխորոշում: Խոհեմութիւն կը ցուցաբերե՞ն երկու կողմերն էլ եւ հանգուցալուծումը՝ եթէ ամփոփէք:

ՀՐԱՆԴ ՄԱՐԳԱՐԵԱՆ.- Երկու բան չպէտք է պատահի. առաջին՝ բախման չպէտք է գնանք: Երկրորդ՝ չպէտք է անենք մի բան, որ արտաքին միջամտութեան անհրաժեշտութիւն, կարելիութիւն ստեղծուի: Եթէ կարողանանք այս երկու բանը չանել, որքան կուզի թող տեւի, դրանից միայն երկիրը կ՛օգտուի եւ կարող է լուրջ օգուտներ քաղել, մենք կարող ենք մեր կեանքը փոխել եւ նոր որակի իշխանութիւն ձեւաւորել: Բայց նաեւ պէտք է հասկանանք, որ դա շատ դժուար, նուրբ աշխատանք է թէ՛ շարժումը ղեկավարողների առումով եւ թէ ոստիկանութեան: Մենք մարդկային գործօնի հետ գործ ունենք՝ նուրբ զգայարաններ, նեարդեր: Կարող է մի փոքր առիթ բախման պատճառ հանդիսանայ, եւ հետեւանքը շատ ծանր լինել: Մենք չենք ուզում, որ դա տեղի ունենայ: Կարծում եմ շարժումը նուաճել է այն իրաւունքը, որ այսօր կարողանայ դրա հետեւանքների առումով նոր ձեռքբերումների ձգտել:

 

ԱԳՆԵՍԱ ԽԱՄՈՅԵԱՆ.- Այն որ ցուցարարների մէջ մեծամասնութիւն են կազմում երիտասարդները, ինչի մասին է խօսում՝ պրն. Մարգարեան։

ՀՐԱՆԴ ՄԱՐԳԱՐԵԱՆ.- Ուրախ եմ, որ մեր ուսանողութիւնը, երիտասարդութիւնը, քաղաքական օրակարգը իր համար դարձրել է հիմնական օրակարգ: Եւ որ նրանց մտահոգում է ազգի, երկրի, ժողովրդի ճակատագիրը եւ ինքն ուզում է դերակատար լինել: Կարեւոր չի որ ուղղութեամբ, կարեւոր չի որ քաղաքականութեան ռազմավարութեամբ, կարեւորը՝ որ ինքը երկրի քաղաքական ճակատագրի մէջ ուզում է դերակատար լինել: Ուզում եմ, դա քաղաքականացման մի նոր ընթացք ստեղծի երիտասարդութեան մէջ, որպէսզի նրանք կարողանան հասկանալ քաղաքական ուղղութիւնները, գործընթացները եւ քաղաքական ուղղութիւնների ընտրութեան հարցում ամբողջութեամբ ճիշդ ճանաչողութիւն ձեռք բերեն եւ քայլերը կատարեն գիտակցաբար:

 

ԱԳՆԵՍԱ ԽԱՄՈՅԵԱՆ.- Շնորհակալութիւն զրոյցի համար, պրն. Մարգարեան:

Leave a Comment

You must be logged in to post a comment.