ինքնաշարժներու շարասիւնով երթ՝ ի յարգանս  Արցախեան պատերազմին նահատակ հերոսներուն

Կիրակի 25 Հոկտեմբեր 2020-ի յետմիջօրէին,  Քէպէքի Հայ Համայնքի Միացեալ մարմինը կազմակերպած էր ինքնաշարժներու շարասիւնով երթ մը, ի յարգանս  Արցախեան պատերազմին  նահատակ հերոսներուն։ Երթը սկիզբ առաւ Լաւալի Ցեղասպանութեան յուշարձանէն, ընթանալով մինչեւ Մոնթրէալի Ցեղասպանութեան յուշարձան:
Մոնթրէալի Ցեղասպանութեան յուշարձանին շուրջ բոլորուելով, երթի մասնակիցները յարգանքի տուրք մատուցեցին Արցախի նորօրեայ նահատակ հերոսներուն յիշատակին: Ներկայ էին եկեղեցական, յարանուանական, կուսակցական եւ միութենական ներկայացուցիչներ:

Կիրարկուեցան ելոյթներ ու կոչեր:

ՀՅԴ Գանատայի ԳԵՄ «Լեւոն Շանթ» եւ «Բեկոր Աշոտ» մասնաճիւղի անունով ելոյթ ունեցաւ ատենապետը՝ Մովսէս Արզումանեանը, որ նշեց, թէ հայկական բանակը իր սխրագործութիւններով կը պաշտպանէ հայրենի հողը, իսկ սփիւռքի պատնէշը վերապահուած է երիտասադութեան, որոնք օրն ի բուն կ’աշխատին մեր արդար դատը ճանաչելի դարձնելու համար օտար պետութիւններուն:

Յանուն ՀՕՄ-ի Գանատայի Շրջանային վարչութեան ելոյթ ունեցաւ Անի Օհանեանը, որ յայտնեց թէ ՀՕՄ-ի աշխարհասփիւռ կառոյցը պատերազմի առաջին իսկ օրէն իր նիւթաբարոյական օժանդակութիւններով սատար հանդիսացաւ հայ զինուորին ու Արցախի հայրենակիցներուն: Ան նշեց, որ երթը կը շարունակուի եւ ՀՕՄ-ը ջանասիրութեամբ կը գործէ յանուն յաղթական բանակի, յանուն Հայաստանի բարգաւաճման:

ՀՅԴ Գանատայի Կեդրոնական Կոմիտէի անունով ելոյթ ունեցաւ ԿԿ-ի ներկայացուցիչ Ընկ. Մհեր Գարագաշեան: Ան հայ զինուորները նմանցուց Մամիկոնեան տոհմի քաջարի մարտիկներուն, որոնք ուխտեցին հայրենի հողին համար նահատակուիլ, քան թէ ապրիլ օտարի լուծին տակ: «Այսօր ալ մեր քաջարի բանակը հաւատարիմ Մամիկոնեաներու ուխտին, նոյն սխրանքներով ու սկզբունքներով կը պաշտպանէն հայրենիքը», եզրափակեց ընկ. Գարագաշեան, խրախուսելով միասնական պայքարի կարեւորութիւնը՝ յանուն մեր հայրենիքին ու հայ ժողովուրդին:

Աւարտին, Գանատայի Հայոց Թեմի Առաջնորդ Գերաշնորհ տ. Բաբգէն Արքեպիսկոպոս Չարեան «Պահպանիչ» ով փակեց հանդիսութիւնը:

Մանրամասները՝ Մոնթրէալի «Հայ Հորիզոն» հեռատեսիլի տնօրէնուհի Թամար Շահինեանի պատրաստած տեսանիւթով:

 

Car Rally for our Fallen Heroes

Կիրակի Հոկտեմբեր 25-ի կէսօրին, ինքնաշարժներու շարասիւնով, Մեծն Մոնթրէալի հայութիւնը միասնաբար իր յարգանքի տուրքը մատուցեց Արցախեան պատերազմին զոհ գացած մեր հերոս նահատակներուն։
#ArtsakhStrong #StrongerTogether #RecognizeArtsakh #ՈւժեղԵնքՄիասին #ArmenianArmy #ArmenianFallenSoldiers #ՀաղթելուԵնք

Posted by Hay Horizon on Monday, October 26, 2020

Leave a Comment

You must be logged in to post a comment.