Երբ նախարարը տգէտ է. բաց նամակ ՀՀ վարչապետին
Երբ նախարարս տգէտ է
Պատմագիտութեան դոկտոր, «Վէմ» հանդէսի խմբագիր Գէորգ Խուդինեանը բաց նամակով դիմել է ՀՀ վարչապետ Նիկոլ Փաշինեանին՝ ազատուելու կրթութեան ու գիտութեան ոլորտում խիստ անհրաժեշտ ու գերհասունացած բարեփոխումների գաղափարը վարկաբեկող Արայիկ Յարութիւնեանից.
Ստորև ներկայացնում ենք ՀՀ վարչապետին ուղղուած Գէորգ Խուդինեանի բաց նամակը.
«Մեծարգոյ պարոն վարչապետ։
ԿԳՍՄ նախարար Արայիկ Յարութիւնեանը Օգոստոսի 26-ին ֆեյսպուքեան ուղիղ եթերում կազմակերպած համապետական ծնողական ժողովի ընթացքում իրեն թոյլ տուեց այնպիսի արտայայտութիւններ, որոնք խայտառակում են ոչ միայն պետական բարձր պաշտօնեայի, այլեւ գիտական կոչում ունեցող մտաւորականի անունն ու համբաւը։ Փորձելով յիմարութիւններ եւ ախմախութիւններ անուանել իր եւ իր գլխաւորած նախարարութեան հասցէին հնչող քննադատութիւնները եւ դրանք վերագրել իր քաղաքականութեան դէմ արշաւ սկսած խաւարամիտներին, գիտութիւնների թեկնածուի կոչում ունեցող անձը արտաբերեց մի այնպիսի հասկացութիւն, որը վկայում է Արայիկ Յարութիւնեանի կատարելապէս անգրագէտ լինելու մասին։ Թէ ինչպէս է նրան յաջողուել Մոսկուայում ձեռք բերել պատմական գիտութիւնների թեկնածուի կոչումը, մեզ յայտնի չէ։ Բայց մենք լաւ գիտենք, որ ոչ միայն գիտութիւնների թեկնածուն, այլեւ սովորական ուսանողը պարտաւոր են իրարից տարբերել ՝ լուսաւորական եւ լուսաւորչական հասկացութիւնները, որոնցից երկրորդը գործածւում է Հայաստանեայց Առաքելական եկեղեցու գաղափարաբանութիւնը բնորոշելու համար։ Իր նախաձեռնած բարեփոխումները բնութագրելու համար Ձեր գլխաւորած կառավարութեան սուպերնախարարը յայտարարեց՝ «Սա ՀՀ-ի համար լուսաւորչական նոր շարժում է, որովհետև տասնամեակներ շարունակ այս փոփոխութիւնների դէմ պայքարողները մեզ տարել են դէպի խաւար, հիմայ խաւարից ինչ-որ ձայներ են փորձում հանել, մենք խաւարամիտներին կը թողնենք խաւարի մէջ»:
Յարգելի պարոն վարչապետ։
Խնդրում եմ տեղեակ պահէք Ձեր անգրագէտ նախարարին, որ լուսաւորութիւն հասկացութիւնը եւ այն բնութագրող լուսաւորականութիւնը՝ որպէս 17-18- րդ դարերի գաղափարաքաղաքական շարժում, որեւէ կապ չունեն Հայաստանեայց Առաքելական եկեղեցու գաղափարաբանութեան՝ լուսաւորչականութեան հետ, որի դէմ ի դէպ՝ նոյն Արայիկ Յարութիւնեանը բաւականին հետեւողական պայքար է սկսել։ Եթէ նման արտայայտութեամբ նա ցանկանում է վերադառնալ հարազատ եկեղեցու գիրկը, ապա ինչո՞ւ է իր ընդդիմախօսներին բնորոշում որպէս խաւարամիտներ։ Իսկ եթէ ոչ, ապա հերթական անգամ կարելի է արձանագրել, որ Արայիկ Յարութիւնեանը պարզապէս անգրագէտ է։ Քանի որ սա առաջին դէպքը չէ, երբ Ձեր գլխաւորած կառավարութեան բարձր պաշտօնեաներն իրենց թոյլ են տալիս նման անգրագէտ արտայայտութիւններ, ստիպուած եմ արձագանգել այս արգահատելի իրողութեանը, որն ինքնին կասկածի տակ է դնում բարեփոխումներ իրականացնելու Ձեր կառավարութեան ինտելեկտուալ հնարաւորութիւնները եւ վերջում էլ Ձեզ յիշեցնել մեծն Քանդի հեղինակած Լուսաւորութեան կարգախօսը՝ խիզախութիւն ունեցիր օգտուելու սեփական բանականութիւնից։
Եկել է ժամանակը, որպէսզի Դուք նոյնպէս խիզախութիւն դրսեւորէք եւ օգտուելով սեփական բանականութիւնից՝ ազատուեք կրթութեան ու գիտութեան ոլորտում իսկապէս որ խիստ անհրաժեշտ ու գերհասունացած բարեփոխումների գաղափարը վարկաբեկող Արայիկ Յարութիւնեանից»։