Արցախն անցեալ չէ, այն պատմական հայրենիք է
Ն․Ս․Օ․Տ․Տ․ Գարեգին Բ Ծայրագույն Պատրիարք և Ամենայն Հայոց կաթողիկոսն ուղերձ է հղել Արցախի Հանրապետութեան անկախութեան օրուայ առիթով.
«Սիրելի ժողովուրդ,
Սեպտեմբերի 2-ը Արցախի անկախութեան օրն է:
Արցախի բռնազաւթման և ամբողջական հայաթափման պայմաններում մենք շարունակում ենք նշել պատմական այս օրը, քանզի Արցախն անցեալ չէ, այն պատմական հայրենիք է, ուր արցախահայութիւնը հազարամեակներով ապրել ու արարել է, արեամբ ու քրտինքով պաշտպանել իր ինքնութիւնը, հայրերի աւանդներն ու սրբազան արժէքները, փայփայել լուսաւոր գալիքի իր նուիրական երազները։
Մենք շարունակում ենք նշել Արցախի անկախութեան օրը նաև որպես արդար ընդվզում ընդդէմ մեր ժողովրդի հանդէպ իրագործուած ցեղասպանութեան, բռնութեան ու ատելութեան: Բռնութիւնը չի կարող ջնջել մարդկային յիշողութիւնը և չի կարող խլացնել արդարութեան ձայնը: Մենք հաւատում ենք, որ պատմական մեր յիշատակները և մեր նախնեաց սխրանքները զօրացնելու են մեզ և մեր ժողովուրդը հաւատով ու յոյսով յաղթահարելու է պատերազմի աղետալի հետևանքները, հայրենասէր ու ազգանուէր ոգով հետամուտ է լինելու իր համազգային իղձերի ու տեսիլքների իրականացմանը:
Արցախի Անկախութեան օրուայ յիշատակումը ևս մեկ պատգամ է մեր ժողովրդին և մարդասիրութեան բարձր արժէքների ջատագով միջազգային հանրութեանը՝ գործօն ջանքեր ներդնելու յանուն արդարութեան ու ճշմարտութեան յաղթանակի, յանուն արցախահայութեան ոտնահարուած իրաւունքների պաշտպանութեան և Արցախի հայկական բազմադարեայ հոգևոր-մշակութային ժառանգութեան պահպանութեան:
Նուիրական այս օրը մեր սրտաբուխ աղօթքը բարձրացնենք առ Աստուած յանուն Արցախի ազատագրութեան ու պաշտպանութեան իրենց կեանքն ընծայած բոլոր քաջորդիների, ինչպէս և Տիրոջ օգնականութիւնը հայցենք Արցախի պատանդառուած ռազմաքաղաքական ղեկավարների և գերեվարուած մեր բոլոր զաւակների շուտափոյթ ազատ արձակման համար:
Թող Երկնաւոր Տէրը միշտ առկայծ պահի մեր ժողովրդի զաւակների հոգիներում սէրն ու հաւատարմութիւնը հանդեպ հայրենի երկիրը, խաղաղութիւն ու մխիթարութիւն սփռի հայրենական մեր կեանքում և դէպի լուսաւոր ու յաղթական հանգրուաններ առաջնորդի համայն ազգիս:
Ամէն»։
Comments are closed.