Արցախի Հանրապետութեան Ազգային Ժողովի Խմբակցութիւններու Յայտարարութիւնը` Ազրպէյճանի Ապակառուցողական Ու Յարձակողապաշտ Քաղաքականութեան Վերաբերեալ
Արցախի Հանրապետութեան Ազգային ժողովի խմբակցութիւնները Ազրպէյճանի յարձակողապաշտ քաղաքականութեան վերաբերեալ հրապարակեցին հետեւեալ միացեալ յայտարարութիւնը.
«2020 նոյեմբերի 9-ի եռակողմ յայտարարութիւնից յետոյ Ազրպէյճանը Արցախի Հանրապետութեան եւ Հայաստանի Հանրապետութեան սահմաններին պարբերաբար լարուած իրավիճակ է ստեղծում` հիմնականում թիրախաւորելով հայկական երկու հանրապետութիւնների խաղաղ բնակչութեանը:
Վերջին օրերին աւելի յաճախակի դարձած այդօրինակ սադրանքները վկայում են, որ Ազրպէյճանը չի հրաժարուել տասնամեակներ շարունակ վարած հայատեաց քաղաքականութիւնից, ինչը կասկածի տակ է դնում խաղաղութեան օրակարգերի շուրջ այդ երկրի ռազմաքաղաքական ղեկավարութեան` միջազգային կառոյցների համար երբեմն հնչեցուող յայտարարութիւնների անկեղծութիւնը:
2020 աշնանը Արցախի ժողովրդի դէմ Թուրքիայի ու միջազգային ահաբեկիչների մասնակցութեամբ սանձազերծուած եւ մարդու իրաւունքների զանգուածային խախտումներով ուղեկցուած Ազրպէյճանական յարձակումները, չնայած Մինսքի խմբի համանախագահ երկրներից մէկի` Ռուսաստանի Դաշնութեան խաղաղարար ջանքերի, շարունակւում է այլ մեթոտներով, եւ այդ ամէնը պարբերաբար բորբոքւում է Ազրպէյճանի ղեկավարի կողմից մշտապէս հնչեցուող սպառնալիքներով, մասնաւորապէս կասկածի տակ դնելով ռուս խաղաղապահների կողմից վերահսկուող միջանցքի անվտանգութիւնը:
Հայաստանի ղեկավարութեան, միջազգային կառոյցների ու ազդեցիկ երկրների կողմից այդ ամէնի անտեսումն ու համարժէք արձագանգների բացակայութիւնը սխալ ազդանշան են դարձել հարեւան երկրի ղեկավարի համար, ով, մոռացութեան տալով եւրոպական հեղինակաւոր կառոյցներին անդամակցելիս իր երկրի կողմից ստանձնած պարտաւորութիւնները, հիմա էլ յաւակնում է ՄԱԿ Անվտանգութեան խորհրդի երեք մշտական անդամ երկրներից` Ռուսաստանի Դաշնութիւնից, Միացեալ Նահանգներից եւ Ֆրանսայից կազմուած ԵԱՀԿ Մինսքի խմբի գործունէութեան սահմանափակմանը:
Ղարաբաղեան հակամարտութեան խաղաղ կարգաւորումը 1992 թուականից յանձն առած եւ տեւական ժամանակ տարածաշրջանային կայունութեանը իր նպաստը բերած վերոնշեալ հեղինակաւոր կառոյցի նկատմամբ նմանօրինակ քամահրական վերաբերմունքը համարում ենք անթոյլատրելի ու գնահատում որպէս բացայայտ արհամարհանք միջազգային իրաւունքի եւ միջազգային հանրութեան ջանքերի նկատմամբ:
Դատապարտելով Ազրպէյճանի ղեկավարութեան նման պահուածքը` տարածաշրջանում հասունացող նոր լարուածութիւնը կանխելու նպատակով կոչ ենք անում Մինսքի խմբի համանախագահ երկրներին գործնական քայլեր ձեռնարկել Ազրպէյճանի ապակառուցողական քաղաքականութեան չէզոքացման եւ այդ երկրի պատասխանատուներին միջազգային իրաւունքի դաշտ վերադարձնելու համար»:
«Ազատ Հայրենիք – ՔՄԴ»
«Միասնական հայրենիք»
«Արդարութիւն»
«Հայ յեղափոխական դաշնակցութիւն»
«Արցախի ժողովրդավարական կուսակցութիւն»
Ստեփանակերտ
14 յունուար 2022