Արցախի Թեմի Առաջնորդի ուղերձը 2023 թուականի սեպտեմբերեան ողբերգական իրադարձութիւնների տարելիցի առիթով

Սիրելի՛ արցախցիներ.

Այսօր լրանում է մէկ տարին այն ողբերգական իրադարձութիւնների, որ տեղի ունեցան մեր ժողովրդի հետ։ Հակառակ մեր ժողովրդի հերոսական մաքառումներին՝ իննամսեայ շրջափակման, սովի ու կարիքի մէջ գտնուելով եւ արտաքին աշխարհից օգնութիւն չստանալով, 2023 թուականի Սեպտեմբերի 19-ին ու դրան յաջորդած օրերին Ատրպէյճանը պատերազմական գործողութիւններով եւ ցեղասպանական քաղաքականութեան միջոցով ամբողջութեամբ ռազմակալեց ու հայաթափեց հայ ժողովրդի բնօրրան Արցախի Հանրապետութիւնը: Տեղի ունեցաւ աւելի քան 120.000 արցախահայերի բռնագաղթը։

Ողբերգական այս իրադարձութիւններին գումարուեց Ստեփանակերտում վառելիքի պահեստի պայթիւնը, որի հետեւանքով անմեղ զոհ դարձան ու վիրաւորում ստացան բազմաթիւ հայորդիներ։ Այնուհետեւ գերեվարուեցին մեր անկախ պետականութեան խորհրդանիշներ հանդիսացող Արցախի պետական այրերը։ Ինչպէս որ ամէն աղօթքի մէջ մենք յիշատակում ենք մեր հերոս նահատակների հոգիներին, այնպէս էլ մեր աղօթքը պէտք է լինի, որ օր առաջ ազատութիւն ստանան Պաքուի բանտերում գտնուող մեր գերիները։

Սրտի մեծագոյն ցաւով ենք արձանագրում տեղի ունեցածը, սակայն, քաւ լիցի, թէ կսկիծն ու տառապանքը մեզ համար վերաճեն յուսահատութեան, եւ Աստծուց ու մեր հայրենիքից երես թեքենք։ Այո, մեծ ու աննկարագրելի է այն կորուստը, որ կրել ենք մենք, թէ՛ որպէս հաւաքականութիւն, եւ թէ՛ որպէս անհատներ։ Թշնամու ցեղասպան քաղաքականութեանը զոհ են գնացել մեր զաւակների կեանքերը, մեր տներն ու օճախները, մեր արիւնն ու քրտինքը։ Աւելին, մենք մարդկային ու նիւթական կորուստներից բացի կորցրել ենք մեր հոգեւոր ինքնութեան ու մեզ՝ մեր հողին կանգուն պահող հիմնաքարերը։ Մեր սուրբ Հայրենիքի կորստի հետ միասին մենք կորցրել ենք մեր վանքերը, եկեղեցիները, հարազատների գերեզմանները։

Սակայն, սիրելի արցախցիներ, սա մեզ պէտք է տայ նոր ուժ, նոր յոյս առ Աստուած եւ նոր վստահութիւն մեր ազգային միասնականութեան մէջ, որպէսզի երբեք Սեպտեմբերի 19-ը չդառնայ լոկ յիշատակի օր։ Այն պէտք է դառնայ մեր կեանքը վերաիմաստաւորելու, մեր ինքնութիւնը վերագտնելու, առ Արցախ վերադառնալու գաղափարի շուրջ համախմբուելու օր։ Յիրաւի, արդարադատ ու ողորմած է մեր Տէր Աստուած։ Եւ հաւատով ու յոյսով լցուելու եւ սիրով ամրանալու դէպքում է, որ կարող ենք հոգու խռովքով, բայց եւ պարզերես կերպով թերթել մեր պատմութեան այս ամօթալի էջը եւ վերաշարադրել նոր սկիզբ, ուղենշել վերելքի ու ազգային զարթօնքի նոր հորիզոններ։

Փառք Աստծոյ, որ Հայաստանի մեր քոյրերն ու եղբայրները աներկբայօրէն ջերմ ընդունելութիւն ցոյց տուեցին մեզ՝ չթողնելով, որ մենք Մայր Հայրենիքում մեզ օտարականներ զգանք։ Մեր հայրենակիցների ջանքերով է նաեւ, որ արցախցին կարողանում է այսօր Հայաստանի Հանրապետութիւնում ինտեգրուել հանրային կեանքին՝ միաժամանակ պահպանելով իրեն իւրայատուկ դիմագիծը։

Հաւատաւո՛ր զաւակներ, թող մեր սրտերում ու հոգիներում երբեք չմարի վերադարձի յոյսի ճրագը։ Այն ամէն գնով պէտք է վառ պահել՝ անընդհատ զօրացնելով սիրոյ, ողորմութեան եւ նուիրումի գործերով։

Հաւատալ եւ գործել. այս է բանաձեւը վերադարձի եւ ազգային նոր ձեռքբերումների։ Ժամանակն է լծուելու մեր ազգային նուիրական իղձերի իրականացմանը, ամէն գնով, պատեհ ցանկացած առիթ օգտագործելու, որպէսզի արդարութիւնը վերահաստատուի մեր կեանքում, որպէսզի Արցախ աշխարհը կրկին մասը դառնայ Մայր Հայրենիքի՝ այն Հայաստանի, որին ձգտել ու ձգտում ենք բոլորս։

Առ Աստուած իմ աղօթքներն ու սրտի խորքերի ամենանուիրական իղձերն ուղղուած են մէկ բանի՝ կրկին հայացած տեսնել Արցախը։ Եւ իմ պարտքն է՝ հայրաբար նոյն յորդորը յղել ամէնքիդ, որ դուք եւս ձեր կեանքի ուղիներում միշտ ամուր պահէք այդ նոյն իղձը։

Թող Ամենակալ Տէրն Իր շնորհները առատօրէն բաշխի մեր ժողովրդին՝ պարգեւելով ուժ, եռանդ եւ եղբայրասիրութեան առատ պտուղներ։ Թող Աստծոյ կամօք նուիրագործուի մեր ազգային երազանքը եւ մօտ ապագայում կրկին ղօղանջեն Արցախի եկեղեցիների զանգերը՝ իրենց զաւակներին կանչելով մայրական օրրան։ Թող մշտապէս վառ մնայ մեր հերոսացեալ հայորդիների յիշատակը, եւ թող անիրաւ գերութեան մէջ գտնուող մեր զաւակները կրկին ազատութեան պարգեւին արժանանան։

Ամէն։