Արծուաբոյն Արցախը վիրաւոր ու լքեալ …
Արցախում տեղակայուած ռուսական խաղաղապահ ուժերի կողմից Հայաստանի Հանրապետութեան Ազգային ժողովի ընդդիմադիր պատգամաւորների մուտքն Արցախի Հանրապետութիւն արգելուեց։ Սա անշուշտ նորագոյն, զաւեշտալի եւ գերվտանգաւոր նախադէպ է, որն դեռեւս կարող է աւելի մեծ վտանգների դուռ բացել Հայոց Արծուաբոյն Արցախի առանց այն էլ վիրաւոր ու լքեալ իրավիճակի առջեւ։
Աննախադէպ եւ կրկնակի զաւեշտալի էր դեռ մինչ այդ Երեւանի կեդրոնում իսկ, Արցախի դրօշի պղծումը հայանուն արկածախնդիրների կողմից։ Սա էլ իր հերթին բերեց նրան, որ Հայաստանաբնակ հայորդիներ պարտաւորուեն Հայրենի Արցախ պաշտպանել բուն Հայրենիքում՝ հայրենադաւներից…
Միւս կողմից, Հայաստանի խորհրդարանական ընդդիմադիր պատգամաւորները եւս պարտաւորուեցին Արցախ պաշտպանել՝ ի սկզբանէ Արցախեան 30-ամեայ գլխացաւանքից ազատուել փափաքող մեծամասնական ՔՊ-ականներից, որոնք զգուշացնում էին ընդդիմադիրներին, որ վերջիններիս պահուածքը խրտնեցնելու է Ադրբեջանին ու ձախողելու է իրենց խաղաղասիրական քայլերը…։ Այնուհետեւ ընդդիմադիր պատգամաւորները ի բողոք իշխանական մեծամասնականների կեցուածքի լքում են ԱԺ դահլիճն ու յայտարարում յաջորդ օրն իսկ Արցախ զօրակցական այց կատարելու մասին, որն էլ ինչպէս սկզբում նշուեց՝ աննախադէպօրէն արգելուեց։
Պարտուած, ծնկի եկած ու վախւորած իշխանութիւնների «խաղաղութեան սիրոյն» լոզունգները մէկ կողմից, իսկ մի շարք առկայ փաստերի համադրումը միւս կողմից, վկայում են այն մասին, որ Կապիտուլանտ իշխանութիւններն ու Նիկոլ Փաշինեանը հերթական ստուերային համաձայնութեան են եկել Ադրբեջանի իշխանութիւնների եւ Ալիեւի հետ՝ դէպի Արցախ տեղաշարժի (յատկապէս պետական-քաղաքական մակարդակով) սահմանափակումներ մտցնելու եւ Արցախը փաստացի մեկուսացնելու առումներով։
Յատկապէս, որ տուեալ միջադէպը կրկին ահազանգում է այն մասին, որ ՀՀ իշխանութիւններն արդէն համաձայնուել են յանձնել Արցախը…։ Այլապէս՝ ինչպէս բացատրել ապրիլի 12-ի առաւօտուանից միաժամանակ ՔՊ-ական պատգամաւորների եւ ադրբեջանական պատասխանատուների նոյնաբովանդակ յարձակումները՝ ընդդիմադիր պատգամաւորների վրայ, որոնք այցելում էին Արցախ:
Այս առնչութեամբ տեղին է յիշել նաեւ ՔՊ-ականների կնքահայր ԼՏՊ-ի անցեալ շաբաթուայ յայտարարութիւնն (Արցախի նախագահ Արայիկ Յարութիւնեանին իր տանը ընդունելութեանը) միեւնոյն «խաղաղութեան եւ Ադրբեջանին չգռգռելու» մասին …
Սիրելի ընթերցող, Թուրքիայի եւ Ադրբեջանի հետ «խաղաղութեան» համաձայնագրեր կնքել կամեցողների «հիմնաւորումները» լկտիութեան մարմնացումն են, իսկ լաւագոյն դէպքում իրենց ապիկար ու ապազգային իշխանութեան պահպանման գնով՝ հայրենակործանման տանող պոպուլիզմ…
Որովհետեւ նոյն «խաղաղութեան» հիմնաւորումներով, առանց այն էլ մինչ օրս նախապայմաններ պարտադրած Թուրքիան, կարող է պահանջել ՀՀ «խաղաղասէր» իշխանութիւններից, որ վաղը, միւս օրը երեւանեան փողոցներում Ապրիլ 24-եան ցոյցեր ու պահանջատիրական հաւաքներ չլինեն, յատկապէս երբ ՔՊ-ական իշխանատենչները օր առաջ փափաքում են մայրաքաղաք Երեւանում բացումը նշանաւորել «խաղաղութեամբ» հարեւանութիւն անող Թուրքիայի դեսպանութեանը…Դրան էլ զուգահեռ, այո՛, երկօրեայ հերթական խորհրդատուութեան համար ԱՄՆ-ից Երեւան կը ժամանի ԼՏՊ-ի ջատագով-խորհրդական Ժիրայր Լիպարիտեանը եւ երկուսով կը յայտարարեն, որ ազգային-քաղաքական շրջանակները զգուշաւոր լինեն Պահանջատիրական ու Հայոց Ցեղասպանութեան մասին յայտարարութիւններում… ու Հայ Դատի հարցով թողնել, որ լոկ Սփիւռքն զբաղուի, ինչպէս որ վերջերս բառացիօրէն մատնանշեց Նիկոլ Փաշինեանը կառավարութեան նիստերից մէկում…:
Եւ իսկապէս այս իշխանութիւնների գործունէութեան ու քայլերի շարունակականութիւնը անխուսափելիօրէն բերելու է նրան, որ բուն Երեւանում Հայոց Ցեղասպանութիւնը նշանաւորուելու է նոյն լիպարիտեանական ֆորմատով հայեւթուրք «պատմաբանների» սեմինարներում միայն ու ոգեկոչուելու է լոկ եկեղեցիներում ու Ծիծեռնակաբերդի համապատասխան թանգարանում… Ջահերով երթն էլ համարուելու է տեռորիզմ…, որն վտանգում է «տարածաշրջանի խաղաղութեա՜նը»…։
…. Արդէն կարելի է պատկերացնել, թէ ի՜նչ հրճուանքով ու բաւարարւածութեամբ են շնորհաւորելու թաւիշներո՜վ օծուն «Նոր Հայաստանի ժողովրդավարութիւնը» ԱՄՆ, Եւրոմիութեան եւ յատկապէս Մեծն Բրիտանիայի դեսպանները…:
ԴԵՐԵՆԻԿ ՄԵԼԻՔԵԱՆ
«ԱԼԻՔ» ՕՐԱԹԵՐԹԻ ԳԼԽԱՒՈՐ ԽՄԲԱԳԻՐ