Ազրպէյճան «Զօրաց Քարեր Բնակատեղի» Արգելոցը Կը Ներկայացնէ Իբրեւ «Հին Ազրպէյճան»-ի Տարածքին Մէջ Գտնուող Յուշարձան
Ազրպէյճան կը շարունակէ պետական խողովակներով տարածել «Արեւմտեան Ազրպէյճան»-ի կեղծ եզրոյթը: Այս մասին կ՛ահազանգէ «Գեղարդ» գիտական-վերլուծական հիմնարկը` ընդգծելով, որ այս անգամ թիրախ ընտրուած են Ազրպէյճանէն դուրս ապրող ազրպէյճանցի եւ այլազգի երիտասարդները:
«Օգոստոս 6-ին Բերձորի մէջ «Սփիւռքի երիտասարդութեան հինգերորդ ամառնային ճամբար»-ի շրջանակներուն մէջ, որուն մասնակցած էին աշխարհի 60 երկիրներէ շուրջ 115 երիտասարդներ, տեղի ունեցած է «Արեւմտեան Ազրպէյճանի համայնք» կազմակերպութեան ղեկավարութեան հանդիպումը ճամբարականներուն հետ:
«Այս «Հէյտար Ալիեւ» հիմնադրամի եւ Ազրպէյճանի Հանրապետութեան սփիւռքի հետ աշխատանքի պետական կոմիտէին կողմէ կազմակերպուած հերթական ձեռնարկ մըն էր: Հանդիպման ընթացքին «Արեւմտեան Ազրպէյճան համայնք» կազմակերպութեան անդամները ելոյթ ունեցան Հայաստանի Հանրապետութեան տարածքին հանդէպ ազրպէյճանական բացայայտ նկրտումներու, «Արեւմտեան Ազրպէյճան» կեղծ թեզի մասին: Ձեռնարկին ցուցադրուեցան «Մօտիկից հայեացք Արեւմտեան Ազրպէյճանին» վաւերագրական ժապաւէնը, լուսանկարներու սահիկաշար, որուն մէջ Հայաստանի Հանրապետութեան պատմական ճարտարապետական յուշարձանները, բնական բնապատկերները ներկայացուած են իբրեւ «Հին ազրպէյճանական»», նշուած է հիմնարկին տարածած յայտարարութեան մէջ: Անոր մէջ նաեւ շեշտուած է, որ ի շարս այլ յուշարձաններու` իբրեւ «Հին Ազրպէյճանի տարածքին մէջ գտնուող յուշարձան» կը ներկայացուի նաեւ Սիսիանի տարածաշրջանին մէջ գտնուող «Զօրաց քարեր բնակատեղի» պատմամշակութային արգելոցը:
«Ազրպէյճանի կողմէ տարածաշրջանի ժառանգութեան ինքնութեան կեղծման եւ սեփականաշնորհման քաղաքականութիւնը միտուած է օրինականացնել Ազրպէյճանի յաւակնութիւնները Հայաստանի Հանրապետութեան եւ առհասարակ տարածաշրջանի նկատմամբ: Ազրպէյճանական պետական քարոզչութիւնը չի սահմանափակուիր միայն հայկական ժառանգութեան բռնաիւրացմամբ, այլ կ՛ընդգրկէ նաեւ Իրանի Ատրպատական նահանգի մշակութային ժառանգութիւնը: Ազրպէյճանի կողմէ հայկական մշակութային ժառանգութեան իւրացումը եւ խեղաթիւրումը, ծաւալապաշտական քաղաքականութիւնը սպառնալիք են հայ ժողովուրդին ու Հայաստանի Հանրապետութեան: Ազրպէյճանի իշխանութիւններու թիրախին մէջ կը գտնուին յատկապէս երիտասարդ սերունդի ներկայացուցիչները, որոնց կը հրամցուին հայատեաց, նենգափոխուած պատկերացումներ տարածաշրջանի պատմութեան եւ մշակոյթի մասին, կը կազմակերպուին ձեռնարկներ, որոնց ընթացքին տեղի կ՛ունենան ալիեւեան վարչակարգին կողմէ ուղղորդուած «Ուղեղներու լուացում: Այսպիսով, նմանատիպ ձեռնարկներու կազմակերպումը եւ անոնց մէջ երիտասարդները ընդգրկելը ցոյց կու տան, որ ազրպէյճանական պետութիւնը իր առջեւ հարց կը դնէ ապահովել հայատեաց քաղաքականութեան սերնդափոխութիւնը», եզրափակած է յայտարարութիւնը:
Comments are closed.