Վրացահայերը Հայոց Ցեղասպանութիւնը Ճանչնալու Կոչ Կ՛ընեն

 

ԹԻՖԼԻՍ.- Վրաստանի Հայ համայնքի մամլոյ դիւանը կը տեղեկացնէ, թէ երկրին մէջ գործող հայկական կազմակերպութիւնները դիմած են երկրի խորհրդարանին, նախագահին եւ վարչապետին՝ պահանջելով, որ Վրաստանի մէջ սկսի 1915-1923 թուականներու Հայոց Ցեղասպանութեան ճանաչման պաշտօնական քննարկումը:

Յայտարարութեան մէջ ըսուած է հետեւեալը.

«1915-1923 թուականներուն կատարուած յանցագործութեան իբրեւ հետեւանք, հայ ժողովուրդը կորսնցուց իր որդիներէն եւ դուստրերէն աւելի քան 2,000,000, իսկ Հայաստանի մեծ մասը գրաւուեցաւ հայ ժողովուրդին կոտորածը իրականացուցած թրքական պետութեան կողմէ: 1915-23ին Թուրքիոյ կողմէ կատարուած յանցագործութիւնը կը համարուի ցեղասպանութիւն՝ յանցագործութի՛ւն մարդկայնութեան դէմ:

1915ի Մայիսին իսկ, Մեծ Բրիտանիա, Ֆրանսա եւ Ռուսիա կատարեցին համատեղ յայտարարութիւն մը, զոր ստորագրած ուժերը Թուրքիոյ յանցագործ գործողութիւնները կը բնութագրէին իբրեւ «նոր յանցագործութիւն՝ մարդկութեան եւ քաղաքակրթութեան դէմ»: Հայ ժողովուրդի ոտնահարուած իրաւունքներու վերականգնման եւ հատուցման հարցը քննարկուած է նաեւ 1919ին, Փարիզի հաշտութեան համաժողովին ընթացքին:

Մենք՝ Վրաստանի մէջ գործող հայկական պետական եւ հասարակական ներքոստորագրեալ կազմակերպութիւններս, յանուն արդարութեան եւ ժողովրդավարական արժէքներու՝ կոչ կ՛ուղղենք միանալու համաշխարհային քաղաքակիրթ հանրութեան, յարգելու Վրաստանի Հանրապետութեան քաղաքացիներուն կամքը եւ Վրաստանի խորհրդարանին մէջ նախաձեռնելու Օսմանեան կայսրութեան տարածքին հայ ժողովուրդի Ցեղասպանութեան ճանաչման հարցի քննարկումին»:

Յիշենք, որ Վրաստանի մէջ գործող հայկական կազմակերպութիւնները արդէն իսկ 12րդ անգամն ըլլալով կը դիմեն երկրի իշխանութեան՝ Վրաստանի կողմէ Հայոց Ցեղասպանութեան փաստի պաշտօնական ճանաչման խնդրանքով: Ցարդ, Վրաստանի իշխանութիւնը կ՛անտեսէ իր երկրի բնակչութեան ընդհանուր թիւին աւելի քան 6 տոկոսը կազմող հայ քաղաքացիներուն կամքը:

Վրաստանի մէջ Ցեղասպանութեան ճանաչման հարցի քննարկումներուն սկսելու կոչով վերոնշեալ դիմումը ստորագրած են Վրաստանի հայ համայնքը, Վիրահայոց թեմի «Հայարտուն» մշակութա-լուսաւորչական կեդրոնը, Պ. Ադամեանի անուան Թիֆլիսի Պետական Հայկական դրամատիկական թատրոնը, «Վրաստան» թերթը՝ Վիրահայերու միութիւն, «Խաղաղութեան հիմնադրամ»ը, Սամուէլ Պետրոսեան, Սամցխէ-æաւախքի եւ Քուէմօ Քարթլիի հայկական հասարակական կազմակերպութիւններու խորհուրդը, Ախալցխայի Երիտասարդական կեդրոնը եւ այլք:

Comments are closed.