Պրազիլի Կանաչներու Կուսակցութեան Ներկայացուցիչը Արցախ Կ՛այցելէ

Հայաստան կը գտնուի Պրազիլի Կանաչներու կուսակցութիւնը ներկայացնող, Երեւանի քոյր-քաղաք Սան Փաուլոյի աւագանիի անդամ Ճիլպերթօ Թոնոս Նաթալինի: Անոր կ՛ընկերակցի Պրազիլի Հայ Դատի յանձնախումբի նախագահ Գէորգ Զատիկեան:

Տեղեկացնենք, որ Նաթալինի աշխոյժ գործունէութիւն կը ծաւալէ Հայ Դատի աշխատանքներուն ուղղութեամբ: Ան կը պաշտպանէ նաեւ Արցախի ինքնորոշման իրաւունքը:

Նաթալինի 7 Յունուարէն ի վեր կը գտնուի Հայաստան ՀՅԴի հրաւէրով: Նշենք նաեւ, որ ան այս տարի պիտի մասնակցի Պրազիլի խորհրդարանական ընտրութիւններուն:

Նաթալինի հանդիպում ունեցած է Երեւանի քաղաքապետ Տարօն Մարգարեանի հետ: «Երկիր»ի հետ զրոյցի մը ընթացքին ան յայտնեց, թէ նկատի ունենալով, որ Երեւանն ու Սան Փաուլոն քոյր քաղաքներ են, շարք մը  համաձայնութիւններ ձեռք բերուած են Երեւանի քաղաքապետ Տարօն Մարգարեանի հետ: «Քաղաքապետին հետ խօսուած է երկու քաղաքներու փոխադարձ աշխատանքներուն մասին: Նոյնիսկ  պայմանաւորուածութիւն ձեռք բերուած է, որ Սան Փաուլոյի քաղաքապետը այցելէ Երեւան՝ քաղաքի 2800ամեակին մասնակցելու համար», ըսաւ Նաթալինի:

Ան նշեց, որ քաղաքապետին հետ հանդիպումին ընթացքին թէեւ խօսուած է զանազան նիւթերու մասին, բայց ամէնէն կարեւորը այն է, որ աւելի մօտեցնեն Սան Փաուլոն Երեւանին, նաեւ Արցախի հետ, ո՛չ միայն մշակութային իմաստով, այլ նաեւ՝ քաղաքական:

Երեքշաբթի օր, Նաթալինի այցելեց Հայոց Ցեղասպանութեան յուշահամալիր եւ յարգանքի տուրք մատուցեց զոհերու յիշատակին, այցելեց  նաեւ Ցեղասպանութեան թանգարան: «Շատ յուզուած եմ: Ես ծանօթ եմ ձեր պատմութեան եւ հիմա շատ յուզուած եմ, որ կրցայ անմեղ զոհերու  յիշատակի դամբարանին մօտ ծաղիկներ զետեղել», ըսաւ ան՝ աւելցնելով. «Դուք կարեւորութիւն կու տաք անցեալին՝ պաշտպանելով երկու կողմերը՝ արդիականը եւ արմատները: Այդ ձեւով կրնաք պատմութիւն պաշտպանել, եւ ես յուզուած եմ ձեր այդ ուժէն։ Նոյն մաքուր, աշխատասէր ազգն էք. այն, ինչը կը կարծէի, որ էք, այստեղ կրցայ աւելի պարզօրէն նկատել եւ հաստատել»։

Նաթալինի նաեւ տեղեկացուց, որ 5էն 7 Յունուարին եռօրեայ այցելութեամբ գտնուած է Արցախ: «Շատ տպաւորուած եմ Արցախով: Այնտեղ հայերուն հետ միասին նշեցի Ս. Ծնունդը, գտնուեցայ Շուշի եւ Գանձասար: Ուրախ եւ ոգեւորուած եմ Արցախ այցելելէն ետք», ըսաւ ան:

Comments are closed.