Մեր Նպատակն Է Երեւանը Դարձնել Համահայկական Մայրաքաղաք. ՀՅԴականները Այցելեցին Աջափնեակ

ԵՐԵՒԱՆ, «Երկիր».- Երեւանի աւագանիի ընտրութիւններու քարոզարշաւի շրջագիծին մէջ, 11 Սեպտեմբերին, ՀՅԴի թեկնածուները հանդիպեցան Երեւանի Աջափնեակ վարչական շրջանի բնակիչներուն հետ եւ ներկայացուցին իրենց ծրագիրը:

ՀՅԴի կողմէ առաջադրուած քաղաքապետի թեկնածու Միքայէլ Մանուկեան «Երկիր»ի հետ զրոյցի մը ընթացքին յայտնեց, որ իրենց նպատակն է Երեւանը դարձնել համահայկական մայրաքաղաք: «Մենք կը պատկերացնենք, թէ ինչպէ՛ս պէտք է այդ մէկը ընել: Մենք կրնանք հաւաքել մեր ուժերը սահմանամերձ բնակավայրերուն համար, կրնանք յադ մէկը ընել նաեւ Երեւանի համար», ըսաւ ան:

Ըստ Մանուկեանի՝ Սփիւռքի մէջ ՀՅԴ կառոյցները գործընկերային յարաբերութիւններ ունին իրենց շրջանի քաղաքապետներուն եւ աւագանիներուն հետ: «Ունինք աղբիւր՝ թէ՛ փորձառութեան փոխանակում եւ թէ ֆինանսական աջակցութիւն ստանալու: Մենք կրնանք իսկապէս համայն հայութիւնը կապել Երեւանին. Երեւանի հոգերով զբաղելու առիթ պէտք է ունենայ համայն հայութիւնը», յայտնեց ան:

Մանուկեան ըսաւ, որ քարոզարշաւի ընթացքին Երեւան պիտի ժամանեն արտասահամանի տարբեր քաղաքներէ ժամանած դաշնակցական  քաղաքապետներ:

ՀՅԴ ցուցակով աւագանիի անդամ Խաչատուր Ստեփանեան, դիմելով բնակիչներուն՝ յայտնեց, որ իրենք կը փափաքին Երեւանի մէջ հաստատել աւելի լաւ կառավարման եղանակ: «Մեր խումբով կը խոստանանք, որ մեր առաջադրած սկզբունքներով պիտի փորձենք Երեւանը դարձնել առաւել բարեկարգ, առաւել գեղեցիկ, առաւել անվտանգ, աւելի  գրաւիչ քաղաք՝ ոչ միայն երեւանցիներուն, այլեւ Երեւան այցելող հիւրերուն համար», շեշտեց ան:

Ստեփանեան նոյնպէս յայտնեց, որ կ՛առաջարկեն Երեւանը համահայկական մայրաքաղաք հռչակելու սկզբունքը եւ որ իրենց աշխարհասփիւռ կառոյցին շնորհիւ պիտի առաջարկեն, որ Երեւանը ունենայ այն բոլոր պայմանները, որոնք յարիր են քաղաքակիրթ մայրաքաղաքներուն: «Մեր երիտասարդ, մասնագէտ խումբը ի զօրու է ձեր վստահութեան քուէն ստանալէ ետք իրագործել իր բոլոր ծրագիրները: Կոչ կ՛ուղղենք անպայման մասնակցելու աւագանիի ընտրութիւններուն եւ քուէարկելու խիղճով», եզրափակեց ան:

Այնուհետեւ ՀՅԴականները զրուցեցին քաղաքացիներուն հետ եւ ծանօթացան համայնքի հարցերուն:

Comments are closed.