«Մենք Կրնանք Եւ Պիտի Պաշտպանենք Մեր Սահմանը». Նախագահ Սերժ Սարգսեան՝ Արցախի Մէջ

 

ՍՏԵՓԱՆԱԿԵՐՏ.- Արցախի Հանրապետութիւն կատարած աշխատանքային այցելութեան երկրորդ օրը՝ 2 Դեկտեմբերին, հայկական երկու հանրապետութիւններու զինուած ուժերու փոխադարձ գործակցութեան շրջագիծին մէջ նախագահ Սերժ Սարգսեան Արցախի նախագահ Բակօ Սահակեանի, Հայաստանի եւ Արցախի հանրապետութիւններու պաշտպանութեան նախարարներուն եւ զինուած ուժերու բարձրաստիճան հրամանատարական կազմերու  ներկայացուցիչներուն հետ դիտեց Արցախի Հանրապետութեան հարաւարեւելեան հատուածին մէջ պաշտպանութեան բանակի համահաւաք զօրախումբին կողմէ կազմակերպուած  ռազմափորձերը եւ խրախուսեց զինուորները:

Նոյն օրը, հանրապետութեան նախագահը ներկայ գտնուեցաւ  զօրամասերէն մէկուն մէջ նորակառոյց ճաշարանի, այլ զօրամասի մը զօրանոցի եւ զինուորներու համար բազմաբնակարան բնակելի շէնքի բացման արարողութիւններուն, բարեխիղճ եւ գերազանց իրենց ծառայութեան համար պարգեւատրեց զօրամասի լաւագոյն սպաները, պայմանագրային եւ ժամկէտային զինուորները:

Նախագահը այցելեց նաեւ ռազմական նշանակութեան շարք մը կառոյցներ եւ ծանօթացաւ հակառակորդին առաւել արդիւնաւէտօրէն հակազդելու նպատակով ստեղծուած շարք մը բացայայտման եւ հանրայնացման ոչ ենթակայ նորամուծութիւններու, խրախուսեց նշուած եւ յարակից գործընթացներուն մէջ առաւելագոյն ներդրում ունեցած զինուորները:

«Ամուր պաշտպանութեան համար անհրաժեշտ է ջանք, եռանդ, քրտնաջան աշխատանք, որոնք վերջապէս իւրաքանչիւրս կը հասցնեն բարձր արհեստավարժութեան: Ժամանակակից զինուած ուժեր չի նշանակեր միայն արդիական սպառազինութիւն, այլ նաեւ կը նշանակէ ունակութիւն, որ թոյլ կու տայ այդ սպառազինութիւնը կիրարկել ժամանակին եւ ամբողջ հզօրութեամբ: Շնորհակալ եմ ձեզի: Այսօրուան ռազմափորձերը ապացուցեցին ձեր ունակութիւնը: Հաւատացէ՛ք, որ դուք այսպիսով կը պատասխանէք բոլոր անոնց, որոնք  ցանկութիւնը ունին մեր հայրենիքը մեզմէ խլելու, որոնք կը փորձեն իրենք զիրենք հզօր ցոյց տալ եւ բան մը պոկել մեզմէ: Ժողովուրդները կրնան իրենց հայրենիքը պաշտպանել, եթէ անոնց մէջ ձեր տեսակը կը գերակշռէ: Մենք կրնանք պաշտպանել եւ պիտի պաշտպանենք մեր սահմանը, մենք կրնանք պաշտպանել եւ պիտի պաշտպանենք մեր հայրենիքը: Կ՛ուզեմ շնորհակալութիւն յայտնել ձեր ծնողներուն, ձեր ուսուցիչներուն, բոլոր անոնց, որոնք իրենց նպաստը ունեցած են ձեր կայացման գործին մէջ», ըսաւ նախագահ Սարգսեան՝ մաղթելով զինուորներուն բարի ծառայութիւն եւ հպարտ կեցուածք:

Արցախի Հանրապետութեան նախագահ Բակօ Սահակեան Հայաստանի Հանրապետութեան նախագահ Սերժ Սարգսեանի հետ 4 Դեկտեմբերին այցելեցին Արցախի կեդրոնական եւ արեւելեան մասերուն մէջ տեղակայուած շարք մը զօրամասեր եւ ծանօթացան զինուորներու ծառայութեան ընթացքին:

Նախագահները դիտեցին զօրավարժութիւններ, ներկայ գտնուեցան շարք մը զօրանոցներու եւ այլ կառոյցներու բացման արարողութիւններուն:

Նոյն օրը, Ստեփանակերտի մէջ անոնք մարշալ Բաղրամեանի ծննդեան 120ամեակին առիթով, ծաղկեպսակներ զետեղեցին անուանի զօրավարի յուշարձանին:

Comments are closed.