Հայերու Աքսորի Օրերուն Թուրքերը Աւելի Շատ Կորուստներ Ունեցած Են. Էրտողան

 

ԵՐԵՒԱՆ, «Թերթ».- Թուրքիոյ նախագահ Ռեչեփ Թայիփ Էրտողան Պուրսայի մէջ ունեցած ելոյթի մը ընթացքին խօսած է Հայոց Ցեղասպանութեան մասին ու պնդած, թէ թուրք ժողովուրդը այդ տարիներուն աւելի՛ շատ կորուստներ ունեցած է, քան՝ հայերը:

Ըստ թրքական «Աքշամ» թերթին՝ Էրտողան ըսած է. «Հայկական աքսորին պատճառով տեղի ունեցած կոտորածներու ընթացքին մահացած թուրքերուն թիւը շատ աւելի է, քան այն թիւերը, որոնց մասին իրենք կը խօսին՝ զայն կոչելով «Հայոց Ցեղասպանութիւն»»։

Էրտողան Հայոց Ցեղասպանութեան անդրադարձած է Ալճերիոյ դէպքերուն մասին խօսելու ընթացքին, միաժամանակ մեղադրելով եւրոպացիները՝ Ալճերիոյ մէջ տեղի ունեցած կոտորածներուն համար եւ յիշեցնելով, որ հիւսիսային Ափրիկէի այդ տարածքները նախապէս կցուած էին Օսմանեան կայսրութեան:

Էրտողան նաեւ ըսած է, որ թուրք ժողովուրդը ժամանակին «իր զաւակները կորսնցուցած է Պալքաններուն եւ Կովկասի մէջ», եւ յայտարարած է, թէ թրքական զինուորական ուժերու հրամանատարութեան արխիւներուն մէջ միայն կան Հայկական Հարցին առնչուող 1.7 միլիոն փաստաթուղթ, որ կրնայ տրամադրելի ըլլալ բոլորին, «սակայն հայկական կողմը անպատասխան կը ձգէ երկկողմանի կերպով արխիւները բանալու առաջարկները:

Comments are closed.