Հանրապետութեան Եւ Մայիսեան Հերոսամարտերու 100-ամեակին Նուիրուած Կազմակերպման Յանձնախումբի Նիստ

 

Վարչապետ Կարէն Կարապետեանին գլխաւորութեամբ երէկ վարչապետարանին մէջ տեղի ունեցած է Հայաստանի Ա. Հանրապետութեան եւ մայիսեան հերոսամարտերու 100-ամեակին նուիրուած նախաձեռնութիւններու նախապատրաստութեան եւ կազմակերպման պետական յանձնախումբի հերթական նիստը, որուն ընթացքին քննարկուած են նախաձեռնութիւններու նախագիծերը եւ հայեցակարգային մօտեցումները: Նիստին ներկայացուած են նաեւ տօնակատարութիւններուն առնչուող տարբեր առաջարկներ, քննարկուած են զանազան նախարարութիւններու կողմէ կատարուող աշխատանքները:

Պատասխանատուներուն համաձայն, վարչապետ Կարէն Կարապետեան նախաձեռնութիւններու կազմակերպման ուղղութեամբ յանձնարարականներ տուած է` կարեւոր նկատելով Հայաստանի եւ մայիսեան հերոսամարտերու 100-ամեակին նուիրուած նախաձեռնութիւններու բարձր մակարդակով իրականացումը:

Վարչապետ Կարէն Կարապետեան Յանձնարարեց
Աջակցիլ Տեղական Արտադրողին

Կառավարութեան նախանցեալ օրուան նիստին սկիզբը վարչապետ Կարէն Կարապետեան տեղական արտադրողին աջակցելու յանձնարարութիւն տուաւ:

Անոր համաձայն, գիւղատնտեսական սարքերու, կարկտապաշտպան ցանցերու, կաթիլային ոռոգման համակարգերու տեղադրման, ինչպէս նաեւ բազմաթիւ այգիներու հիմնումին եւ կայացման համար անհրաժեշտ սարքաւորումներու ներածման համար գոյութիւն ունեցող մաքսային վճարումները կրնան լրացուցիչ բեռ յառաջացնել:

Բացի ատկէ, վարչապետը նշեց, որ, հաշուի առնելով այն, որ տեղական արտադրողները տակաւին չեն ապահովեր շուկայի պահանջները, անհրաժեշտ է այս մարզին համար նախատեսուած ապրանքներու  ներմուծման համար սահմանել ժամանակաւոր խրախուսման մեքանիզմներ:

«Մեկնելով վերոնշեալէն` կը յանձնարարեմ գիւղատնտեսութեան եւ  տնտեսական զարգացման նախարարներուն, պետական եկամուտներու  կոմիտէի նախագահին` միամսեայ ժամկէտի մէջ միասին քննարկելու եւ կառավարութեան աշխատակազմին ներկայացնելու գիւղատնտեսութեան մարզի բարեփոխման ուղղուած պետական աջակցութեան ծրագիրներու  շրջագիծին մէջ անհրաժեշտ ապրանքներու ներմուծման մաքսային վճարումներու ժամանակաւոր արտօնութիւններ սահմանելու եւ տեղական արտադրողներուն աջակցելու ուղղուած առաջարկներ», ըսաւ Կարէն Կարապետեան:

Comments are closed.