Լիբանանեան Պասքեթպոլ. ՀՄԸՄ-ի Զոյգ Խումբերուն Փառաւոր Յաղթանակները` Ռիատիի Դէմ

Լիբանանի պասքեթպոլի տղոց եւ աղջկանց Ա. դասակարգի ախոյեանութեան աւարտական հանգրուանի մրցումներուն ծիրին մէջ, երէկ ՀՄԸՄ-ի տղոց եւ աղջկանց զոյգ խումբերը փառաւոր յաղթանակներ արձանագրեցին` Ռիատիի տղոց (61-57) եւ աղջկանց (67-59) դէմ:

Կը շնորհաւորենք, ՀՄԸՄ Անթիլիասի աղջկանց այս երկրորդ յաղթանակը, իսկ ՀՄԸՄ-ի տղոց առաջին յաղթանակը` Ռիատիի զոյգ խումբերուն, նոր յաղթանակներու ակնկալութեամբ եւ մաղթանքով:

Տղոց Աւարտական

ՀՄԸՄ Շարունակեց Իր Դաշտին Վրայ
Մնալ Անպարտելի Եւ 1-0 Արդիւնքով
Գերազանցեց Ռիատին

Լիբանանի պասքեթպոլի տղոց Ա. դասակարգի ախոյեանութեան աւարտական հանգրուանի առաջին ճակատումը տեղի ունեցաւ երէկ գիշեր «Աղբալեան-ՀՄԸՄ» մարզամշակութային համալիրի «Ատոմ եւ Սելլա Թնճուկեան» մարզադաշտին վրայ, երբ ՀՄԸՄ հիւրընկալեց Ռիատին:

ՀՄԸՄ շարունակեց իր դաշտին վրայ մնալ անպարտելի, երբ 61-57 արդիւնքով արձանագրեց յաղթանակ մը (18-7, 32-23, 52-42 եւ 61-57):

Բնականաբար, իր արձանագրած այս յաղթանակին շնորհիւ 1-0 արդիւնքով գերազանցեց Ռիատին, որ թէեւ պայքարեցաւ, սակայն չկրցաւ յաղթել ՀՄԸՄ-ի աշխուժ եւ զօրաւոր կազմին:

Պէտք է ըսել, որ մրցումին տեւողութեան ՀՄԸՄ առիթով մը կէտերու տարբերութիւնը բարձրացուց մինչեւ 12 կէտի (23-11):

Երկու կազմերն ալ կրցան կիրարկել պաշտպանողական բարձր խաղաոճ մը եւ այդ պատճառով ալ մրցումին արդիւնքը այդքան ալ բարձր չեղաւ:

Յամենայնդէպս, աւարտականի այս մրցումներուն կէտերու տարբերութիւնը երբեք կարեւոր չէ, այլ յաղթանակը, նոյնիսկ եթէ անիկա կէտի մը տարբերութեամբ է միայն:

ՀՄԸՄ-էն տապըլ-տապըլի հեղինակ դարձան Տուայն Ճեքսըն (21 կէտ, 12 ռիպաունտ) եւ Քեւին Կալոուէյ (12 կէտ, 11 ռիպաունտ) իսկ Ռիատիէն` Ալատէ Ամինու (21 կէտ, 11 ռիպաունտ), Ֆետի Խաթիպ նշանակեց` 10 կէտ, 4 ռիպաունտ, 4 էսիսթ, Աթեր Մաճոք` 10 կէտ:

ՀՄԸՄ, 26 փորձերէ ետք, նշանակեց 6 թրի փոյնթ (Ճեքսըն` 3, Էլի Շամուն` 1, Քարամ Մըշրեֆ` 1), մինչ Ռիատի` 3, 20 փորձերէ ետք:

Եթէ, ՀՄԸՄ-ի մարզիկները դաշտին վրայ պայքարեցան յաղթանակ արձանագրելու, անդին դաշտը ամբողջութեամբ լեցուցած ՀՄԸՄ-ի համակիրները, ՀՄԸՄ-ի շեփորախումբին ընկերակցութեամբ, անդադար քաջալերեցին իրենց կազմը եւ, դառնալով խումբին 6-րդ մարզիկը, բառին բուն իմաստով եղան օրինակելի համակիրներ եւ իրենց մարզիկներուն հետ տօնեցին շատ կարեւոր յաղթանակ մը:

Կը շնորհաւորենք ՀՄԸՄ-ի արձանագրած այս յաղթանակը եւ կը գնահատենք ՀՄԸՄ-ի համակիրներուն տիրական եւ դրական ներկայութիւնը:

Comments are closed.