«ԵԱՀԿ-ի Մինսքի Խմբակի Համանախագահները Մէկ Հարց Ունին` Կանխել Զինուորական Հաւանական Զարգացումները» Կ՛ըսէ Շաւարշ Քոչարեան

Կառավարութեան նիստէն ետք լրագրողներու հետ զրոյցի մը ընթացքին Հայաստանի արտաքին գործոց փոխնախարար Շաւարշ Քոչարեան նշած է, որ երբ Ռուսիոյ տնտեսութեան մէջ տեղի կ՛ունենան բացասական երեւոյթներ, ատիկա իր անդրադարձը կ՛ունենայ բոլոր դրացիներուն վրայ, ներառեալ Հայաստանը:

«Երբ Ռուսիոյ մէջ ճգնաժամ եղաւ, ատիկա անդրադարձ ունեցաւ թէ՛ Եւրասիական տնտեսական միութեան անդամ Հայաստանի վրայ, թէ՛ ոչ անդամ Ազրպէյճանի վրայ, թէ՛ դէպի Եւրոպական Միութիւն գացող Վրաստանին վրայ: Այդ տեսակէտէն բոլորին համար ակնյայտ է, որ այդ պետութիւնները տարբեր ձեւերով կախուած են Ռուսիայէն», ըսաւ Քոչարեան:

Պատասխանելով այն հարցումին, թէ կարելի չէ՞ չէզոքացնել վտանգները, ան պատասխանեց, որ Ռուսիոյ դէմ Արեւմուտքի կիրարկած պատժամիջոցներուն նկատմամբ Հայաստանը ազդեցութիւն չի կրնար ունենալ: «Մեր ընդհանուր տնտեսական քաղաքականութիւնը հետեւեալն է` եղած տնտեսական կապերը խորացնել եւ ստեղծել նոր տնտեսական կապեր, նոր յարաբերութիւններ: Իսկ անոր համար արդէն կան թիրախաւորուած տարբեր երկիրներ: Բոլորին հետ, որուն որ ձեռնտու է, պէտք է յարաբերինք տնտեսական առումով», եզրափակեց Քոչարեան:

Շաւարշ Քոչարեան յայտարարեց, որ ԵԱՀԿ-ի Մինսքի խմբակի համանախագահները ղարաբաղեան տագնապին շուրջ բանակցութիւններուն մէջ այսօր մէկ հարց ունին` կանխել զինուորական հաւանական զարգացումները:

«Անոնց թիւ մէկ հարցը այն է, որ զինուորական լարուածութեան աստիճանը նուազի», ըսաւ ան, ապա աւելցուց, որ համանախագահները կեդրոնացած են այս հարցին վրայ:

Քոչարեանի համաձայն, ԵԱՀԿ-ի Մինսքի խմբակի համանախագահներու միւս առաքելութիւնը` նպաստել, որ կողմերը գան ինչ որ համաձայնութեան, չ՛իրականացուիր: «Անոնք շատ լաւ կը հասկնան, որ այս հարցին մէջ որեւէ յառաջընթացի մասին կարելի չէ խօսին, եւ անոր պատճառը Ազրպէյճանն է` իր քաղաքականութեամբ», ընդգծեց Քոչարեան:

Comments are closed.