Աւելորդ Հանդուրժողութիւն Ցուցաբերած Ենք Թուրքիոյ. Պերլին

ԵՐԵՒԱՆ, «Էրմենիհապեր».- Արտայայտուելով թուրք-գերմանական յարաբերութիւններուն մէջ առկայ ճգնաժամին մասին՝ Գերմանիոյ պաշտպանութեան նախարար Ուրսուլա վոն տեր Լէյէն ըսած է. «Թուրքիոյ հանդէպ աւելորդ հանդուրժութիւն ցուցաբերած ենք»։

Ըստ «Կազեթաքարինչա» լրատուական կայքին, նախարարին գնահատականով՝ Թուրքիա աւելի ու աւելի կը հեռանայ Եւրոպայէն:

Լէյէն, նկատի ունենալով Թուրքիոյ իշխանութիւններուն քայլերը՝ ըսած է, որ օրէնքի սկզբունքներէն ետ կանգնիլը եւ խօսքի ազատութիւնը սահմանափակելը ո՛չ մէկ պատճառաբանութիւն կրնան ունենալ:

Ան նաեւ անընդունելի համարած է Գերմանիոյ քաղաքացիներու ձերբակալութիւնը Թուրքիոյ մէջ, եւ աւելցուցած. «Թուրքիոյ կառավարութիւնը ինքն իրեն հանդէպ պահանջած յարգանքը մեզի՛ նկատմամբ եւս պէտք է ցուցաբերէ»։

Յիշեցնենք, որ թուրք-գերմանական յարաբերութիւններուն մէջ լարուածութեան նորագոյն ալիքը յառաջացուց Թուրքիոյ կողմէ Գերմանիոյ քաղաքացի Փեթըր Շթոյտների բանտարկութիւնը։ Ան մաս կը կազմէ մարդկային իրաւանց պաշտպան Միջազգային Ներում կազմակերպութեան:

Comments are closed.