Ֆլին Ընդունած Է, Որ Իր Լոպիական Ջանքերը Նպաստած Են Թուրքիոյ

 

ՈՒԱՇԻՆԿԹԸՆ, «Էյ.Փի.».- Չորեքշաբթի, Մարտ 8ին բացայայտուեցաւ, որ նախագահ Տանըլտ Թրամփի հրաժարած՝ ազգային ապահովական հարցերու խորհրդական Մայք Ֆլինի լոպիական հիմնարկը, մէկ օր առաջ արդարադատութեան նախարարութեան փոխանցած է Թուրքիոյ ի նպաստ կատարած իր աշխատանքին մասին տեղեկութիւններ, որոնք սակայն պէտք է անցեալ տարի փոխանցուած ըլլային։

Արդարեւ, Ֆլինի «Քլին Ինթել Կրուփ» հիմնարկը տեղեկացուցած է, որ մօտաւորապէս 530,000 տոլարի փոխարէն՝ Թուրքիոյ կառավարութեան ի նպաստ քարոզչական աշխատանք կատարած է այն միջոցին, երբ Ֆլին Թրամփի ընտրապայքարին համար կ՛աշխատէր։

Ֆլին անցեալ տարուան Օգոստոսէն մինչեւ Նոյեմբեր 22 (այսինքն՝ նախագահական ընտրութիւններէն ետք եւս) գործակցած է Հոլանտա հաստատուած թուրք գործարար Էքիմ Ալփթեքինի պատկանող «Inovo BV» հաստատութեան հետ, անկէ ստանալով իր վարձատրութիւնները։

Ալփթեքին Սեպտեմբերի կիսուն կրցած է Նիւ Եորքի մէջ հանդիպում մը իրականացնել Ֆլինի եւ Թուրքիոյ արտաքին գործոց եւ ուժանիւթի նախարարներուն հետ։

Comments are closed.