Քառօրեայ Պատերազմէն Ետք Ատրպէյճանական Ամէնէն Լայնածաւալ Յարձակումը Ետ Կը Շպրտուի

 

25 Փետրուարին, առաւօտեան ժամը 3ի եւ 4ի շուրջ, սահմանագիծի հարաւարեւելեան (Մարտունի) եւ արեւելեան (Ակնա) ուղղութիւններով հակառակորդը, օգտագործելով ականազերծման «Տրոպա» տեսակի համակարգ՝  յարձակման փորձեր կատարած է:

Արցախի Հանրապետութեան պաշտպանութեան բանակի մամլոյ  ծառայութեան հաղորդումով՝ պաշտպանութեան բանակի յառաջապահ ստորաբաժանումները երկու ուղղութիւններով ալ ժամանակին նկատած են ատրպէյճանական յատուկ ջոկատայիններու յառաջխաղացքը եւ կորուստներ պատճառելով՝ ետ շպրտած են զանոնք իրենց ելման դիրքերը: Բանակի յառաջապահ ուժերու հակահարուած գործողութեան շնորհիւ հակառակորդը տուած է առնուազն երկու սպաննուած, որոնց մարմինները կը գտնուին չէզոք գօտիին մէջ: Պաշտպանութեան բանակը կորուստներ չէ ունեցած:

Աւելցնենք նաեւ, որ ատրպէյճանական յարձակման գործողութիւնները հետեւանք են վերջին շրջանին հակառակորդ երկրի քարոզչամեքենային կողմէ առաջնագիծին մէջ իբրեւ թէ արցախեան ուժերու յարձակումին վերաբերեալ անընդհատ տարածուող ապատեղեկատուութեան, որով  թշնամին հող նախապատրաստած է իր հետագայ սադրանքներուն համար:

Բացի յարձակման փորձերէն, 24էն 25 Փետրուարի լուսցող գիշերը, արցախեան-ատրպէյճանական հակամարտ զօրքերու սահմանագիծի ամբողջ երկայնքով, հակառակորդը ականանետերէ, հրանօթներէ, նռնականետերէ ու տարբեր տրամաչափի հրաձգային զինատեսակներէ խախտած է զինադադարը՝ հայ դիրքապահներուն ուղղութեամբ արձակելով աւելի քան 860 կրակոց: Յատկապէս բուռն խախտումներ արձանագրուած են շփման գիծի արեւելեան եւ հիւսիսային ուղղութիւններով: Նշուած հատուածներուն մէջ հակառակորդը 60, 82 եւ 120 միլլիմեթրնոց ականանետերու եւ Դ-44 տեսակի հրանօթներու կիրարկումով ընդհանուր առմամբ արձակած է 169 արկ:

Պաշտպանութեան բանակի համապատասխան կառոյցներուն կողմէ տրամադրուած հաւաստի տուեալներուն համաձայն՝ արեւելեան ուղղութեամբ նկատուած են հակառակորդի կենդանի ուժի եւ զինատեսակներու տեղաշարժներ:

Պաշտպանութեան բանակի յառաջապահ զօրամասերը սահմանագիծի ամբողջ երկայնքով անցած են կազմակերպուած պաշտպանութեան եւ պատրաստ են հակառակորդի որեւէ սադրանքի տալու արժանի պատասխան:

Միւս կողմէ, Հայաստանի պաշտպանութեան նախարարութիւնը հրապարակած է Ատրպէյճանի զինուած ուժերու յարձակման փորձին տեսագրութիւնը:

Ըստ Արծրուն Յովհաննիսեանի՝ տեսագրութեան մէջ երեւցող առաջին օղակը կը մատնանշէ «Տրոպա» ականազերծող համակարգի արձակումը: Երկրորդին մէջ կրնաք տեսնել անոր արձակումէն ետք յառաջացած փոշին, ինչպէս նաեւ հայկական կողմին պատասխան կրակը: Երրորդ պատկերին մէջ ատրպէյճանական ստորաբաժանումներուն փախուստն է՝ հայկական կողմի կրակին տակ: Պատկերները կ՛արտացոլեն գործողութիւնները Ակնայի (Աղտամի) ուղղութեամբ:

Իսկ ապա, պարզօրէն կ՛երեւին Մարտունիի հատուածին մէջ ձգուած  դիակները:

Նոյն ծիրին մէջ, Արցախի Հանրապետութեան պաշտպանութեան նախարարութեան մամլոյ ծառայութիւնը ներկայացուց գիշերուան ընթացքին հակառակորդին կողմէ արեւելեան ուղղութեամբ ձեռնարկուած յարձակման փորձի մասին վկայող երկու տեսագրութիւն:

Առաջին տեսանիւթին մէջ ներկայացուած է Մարտունիի ուղղութեամբ՝

Ա. Հակառակորդի հետախուզական խումբի ներթափանցման եւ հայկական ուժերուն կողմէ զանոնք վնասազերծելու գործողութիւնը:

Բ. Հակառակորդին կրած կորուստները (5 դիակ): Ըստ պաշտպանութեան բանակի համապատասխան ծառայութիւններուն կողմէ ձեռք բերուած տուեալներուն, սպաննուածներուն շարքին են Ատրպէյճանի զինուած ուժերու 181րդ ջոկատի հետախուզութեան պետ, գնդապետ Ապտուլայեւ, ջոկատի հետախուզական վաշտի հրամանատար, աւագ հարիւրապետ Աշիմլի Շախլար, հետախոյզ Ատըհուսէյնով եւ երկու զինուոր, որոնցմէ մէկը՝ սակրաւոր:

Երկրորդ տեսանիւթին մէջ կ՛երեւի Ակնայի ուղղութեամբ՝

Ա. Հակառակորդին կողմէ ականազերծման «Տրոպա» տեսակի զինամթերքի կիրարկումը:

Բ. Հակառակորդին կողմէ կիրարկուած նռնականետերու եւ խոշոր տրամաչափի այլ զինատեսակներու պայթիւնը:

Գ. Հակառակորդի հետախոյզներու խումբին նահանջը:

Բացի տեսագրութիւններէն, ներկայացուած են նաեւ հակառակորդին ճամբարին մէջ տեղի ունեցած հեռախօսազրոյցի ձայնագրութիւնը:

Աւելի ուշ, Արցախի Հանրապետութեան պաշտպանութեան նախարարութիւնը տեղեկացուց, որ 25էն 26 Փետրուարի լուսցող գիշերը արցախեան-ատրպէյճանական հակամարտ զօրքերու շփման գիծի ամբողջ երկայնքով հակառակորդը 122 միլլիմեթրնոց Դ-30 հաուպից եւ Դ-44 տիպի հրանօթներէ, ականանետերէ եւ նռնականետերէ շարունակած է ուժգնօրէն խախտել զինադադարի պահպանման դրութիւնը՝ հայ դիրքապահներու ուղղութեամբ արձակելով աւելի քան 2200 կրակոց: Աւելի ուժգին խախտումներ արձանագրուած են արեւելեան, հիւսիս-արեւելեան եւ հիւսիսային ուղղութիւններուն վրայ: Նշուած հատուածներուն մէջ ատրպէյճանական զինուժը Դ-30, Դ-44 հրանօթներէ եւ ականանետերէ հայ դիրքապահներու ուղղութեամբ արձակած է 113 արկ, որոնցմէ 36ը՝ հրանօթներէ, 77ը՝ ականանետերէ:  Հակառակորդը հրանօթներով կրակած է նաեւ Թալիշ գիւղին ուղղութեամբ (18 արկ):

Պաշտպանութեան բանակի յառաջապահ զօրամասերը հակառակորդի նախայարձակ գործողութիւնը ճնշելու համար դիմած են պատասխան գործողութիւններու եւ շարունակած վստահօրէն իրականացնել մարտական հերթապահութիւն:

Comments are closed.