Արցախը Եւ Ազատագրուած Տարածքները Մեզի Համար Զարգացման Հնարաւորութիւն Են, Ոչ Թէ՝ Բեռ. Արմէն Ռուստամեան

 

 

ԵՐԵՒԱՆ, «Թերթ».- Հայ Յեղափոխական Դաշնակցութեան Գերագոյն մարմինի ներկայացուցիչ Արմէն Ռուստամեան, «Թերթ»ի հետ ունեցած զրոյցին ընթացքին անդրադառնալով Արցախի հակամարտութեան վերաբերեալ ՀՅԴի դիրքորոշման՝ նշած է, որ իրենք երկրի զարգացումը չեն փորձեր կապել Արցախի հետ:

«Յայտնի թէզ կայ, որ քանի որ դեռ Արցախի հարցը չէ լուծուած, Սերգօ՛ ջան, լաւ չես ապրիր, բնականաբար մենք ատոր բացարձակ հակառակ դիրքերէն կը նայինք: Մեզի համար զարգացման հնարաւորութիւն են, ոչ է բեռ են Արցախը եւ ազատագրուած տարածքները, որոնցմէ պէտք է ազատուիլ: Ատոր համար մեր կարգախօսն է, որ Հայաստանը պէտք է զարգանայ առանց ազգային շահերը զիջելու», ըսած է ան:

Ան ըսած է, որ Արցախի հարցի բանակցային գործընթացին հետ կապուած յստակ ըսած են, որ պէտք է պաշտպանել այն, ինչը Արցախի ժողովուրդը իր Սահմանադրութեամբ փաստած է:

Ինչ կը վերաբերի այն հարցումին, թէ ԼՂ հակամարտութեան կարգաւորման հարցով ՀՅԴի մօտեցումները որոշ առումով կը տարբերի՞ն այսօրուան իշխանութեան դիրքորոշումներէն՝ Արմէն Ռուստամեան պատասխանած է. «Ղարաբաղի ժողովուրդին մօտեցումը մեզի համար ուղղորդող մօտեցում է: Քանի որ դեռ Ղարաբաղի անկախութիւնը չէ ճանչցուած, Ղարաբաղի տարածքային ամբողջականութիւնը չէ վերականգնուած, խօսիլ որեւէ զիջման մասին անիմաստ է. վե՛րջ: Փոխզիջումը այդտեղէն կը սկսի. կարգավիճակ տարածքներու դիմաց հասկացութիւնը, որ գլխիվայր շրջած են, պէտք է վերականգնի, եւ ըստ էութեան այսօրուան իշխանութիւնները ատիկա կը փոձեն վերականգնել: Այսինքն՝ սկիզբը կարգավիճակ, ապա տարածքներու մասին խօսակցութիւն: Մինչեւ հիմա եղած է հակառակը, որ մեզի համար անընդունելի է»:

Ան նշած է, որ չեն խօսիր որեւէ զիջման մասին, որովհետեւ դեռ Ղարաբաղի անկախութիւնը Ատրպէյճանը չէ ճանչցած: Ա. Ռուստամեան նկատեց, որ Ատրպէյճան պատրաստ չէ որեւէ ձեւով հարցը կարգաւորելու խաղաղ բանակցութիւններու միջոցով:

«Անիկա կը հասկնայ, որ ապացոյցներ չունի բանակցային սեղանին ներկայացնելու, միակ փաստարկը ուժով հարցը լուծելն է, սա է իր մօտեցումը: Ատրպէյճանին ձեռնտու չէ հրադադարի պահպանումը, ատոր համար բոլոր այն մեքանիզմները, որոնք կոչուած են ատիկա փաստելու, ան կը մերժէ: Այսինքն՝ անիկա ցոյց չի տար, որ պատրաստ է խաղաղ բանակցութիւններու միջոցով հարցը կարգաւորել», ըսաւ  Ռուստամեան եւ նշեց, որ Ատրպէյճան չի կատարեր նաեւ Մինսկի խումբի պահանջները:

Ըստ անոր՝ Մինսկի խումբի արձագանգը համարժէք չէ Ատրպէյճանի գործողութիւններուն եւ կը գտնէ, որ պէտք է աւելի հասցէաւորուած՝ յստակ ըսուի, որ Ատրպէյճան չի կատարեր իր պարտաւորութիւնները:

 

 

Comments are closed.